Iburasirazuba: Guhangana n’inzoga zitemewe byashyizwemo imbaraga

Polisi y’u Rwanda k’ubufatanye n’abaturage ndetse n’abayobozi  mu nzego z’ibanze, bakomeje ibikorwa byo kurwanya inzoga zitemewe hirya no hino mu gihugu, by’umwihariko mu ntara y’Iburasirazuba, bimaze gutanga umusaruro ugaragara.

Ni muri urwo rwego tariki 24 Nzeri 2018  Polisi y’u Rwanda k’ubufatanye n’abaturage bo mu turere twa Ngoma, Kayonza, Kirehe na Rwamagana  two mu ntara y’Iburasirazuba habaye igikorwa cyo gufata no kumenera mu ruhame  litiro zisaga ibihumbi bine  z’inzoga zitemewe.

Nk’uko tubikesha Polisi y’u Rwanda, muri uwo mukwabu, mu karere ka Kirehe, mu murenge wa Gatore, hafatiwe litiro 150 z’inzoga zitemewe. Mu karere ka Ngoma mu murenge wa Mutenderi hafatwa litiro 1980 zizwi ku izina ry’Inkumburwa, mu murenge wa Gashanda hafatirwa litiro 660, na ho  mu murenge wa Zaza hafatirwa litiro 300.

Mu karere ka Kayonza, mu murenge wa Kabarondo, mu kagari ka Cyinzovu, hafatiwe litiro 580 na ho mu kagari ka Rusera hafatirwa litiro 120. Mu karere ka Rwamagana, mu murenge wa Karenge hafatirwa litiro 410.

Umuvugizi wa Polisi y’u Rwanda mu ntara  y’Iburasirazuba, Chief Inspector of Police(CIP) Theobard Kanamugire, yavuze ko ubwo hafatwaga ziriya nzoga, na banyirazo bahise bafatwa bacibwa amande n’ubuyobozi bw’inzego z’ibanze.

Ubwo izi nzoga zamenerwaga mu ruhame, CIP Kanamugire yasabye abaturage kuzirinda  mu rwego rwo kurengera ubuzima bwabo ndetse no kwirinda ibyaha zibakoresha.

Yagize ati “Izi nzoga bazikora mu bintu bibi bitandukanye, byagera mu mubiri w’uwazinyoye bikamutera indwara zitandukanye, ndetse hari n’abazinywa zikabatera gukora ibyaha bitandukanye nko gufata abagore n’abana ku ngufu, urugomo rushingiye ku gukubita no gukomeretsa.”

Yakomeje ashimira abaturage uburyo bakomeje kugaragaza ubufatanye mu kurwanya izi nzoga ndetse n’ibindi byaha,ariko abasaba kudacika intege.

Yagize ati “Abantu bakora izi nzoga muturanye nabo,muba mubazi, turabasaba gukomeza kudufasha kubagaragaza kugira ngo iki kibazo gicike, kandi intambwe imaze guterwa irashimishije kubera uruhare rwanyu.”

CIP Kanamugire ashishikariza abagifite umuco mubi wo gukora no gucuruza inzoga zitemewe kubireka, ahubwo  bakavugurura ubucuruzi bwabo bacuruza ibyemewe n’Amategeko.

Panorama

Be the first to comment

Leave a Reply

Your email address will not be published.


*