Remera: Gukorerahamwe mu makoperative byabereye abagore inzira yo kwihesha agaciro

Abagore bo mu murenge wa Remera bavuga ko kwibumbira mu makoperative ari inzira yo kwizigamira (Ifoto/Panorama)

Abagore bo mu murenge wa Remera, mu karere ka Gasabo, bavuga ko kwibumbira mu makoperative byabafashije kwiteza imbere, kwigirira, kunga ubumwe no kuzamura imyumvire mu kubaka umuryango nyarwanda.

Dusabimana Philomene ahagarariye inama y’igihugu y’abagore mu murenge wa Renera. Avuga ko kumurika ibyo abagore bamaze kugeraho bijyanye no kwitegura umunsi mpuzamahanga w’umugore wo mu cyaro uzizihizwa ku wa 15 Ukwakira 2018.

Agira ati “Umugore wo mu murenge wa Remera hari aho amaze kwigeza binyuze mu makoperative y’ubukorikori ku buryo hari aho bageze biteza imbere. Iyo duhuye ni umwanya wo guhiga no kugaragaza ibyo twagezeho.”

Avuga ko abagore bo muri uyu murenge, ubu bafite byinshi bamaze kugeraho binyuze mu kwishyira hamwe ku buryo n’abagore bacururizaga mu muhanda ubu bashyizeho Koperative yabo, bagacika ku kuzereza imbuto na caguwa.

Tuyishime Sawuda, ni umuyobozi wa Koperative Imbadukanamihigo ikorera mu murenge wa Remera, Akagari ka Rukiri I, Umudugudu w’izuba. Iyi koperative ikora ubudozi. Uyu muyobozi avuga ko kujya muri koperative ari ugukora ubwishingizi, kuko uretse kumenya umwuga ari n’uburyo bwo kwizigamira.

Agira ati “Kujya muri koperative ni inzira yo kwizigamira, uri muri koperative ntasesagura kandi bidufasha kunga ubumwe hagati yacu. Tunasuzumira hamwe ibibazo dufite mu muryango, tugafatanya kubishakira umuti.”

Akariza Jeanne ni umunyamuryango wa Koperative Imbadukanamihigo ikora ubudozi. Avuga ko bamaze kwiteza imbere binyuze mu guhanga udushya mu budozi dore hari modeli ziba zigezweho abantu bakunze zirimo izitwa Knowless (Nolesi) na Convention (Komvenshoni).

Avuga ko atarajya muri koperative yari mu bwigunge kandi ntacyo yari yagashoboye kwigezaho. Anavuga ko kandi byatumye abona inshuti nyinshi ndetse arushaho kunga ubumwe na bo basangiye koperative.

Agira ati “Ntarajya muri koperative nari mu bwigunge. Ubu iyo turi hamwe tuganira ku iterambere ryacu, ubumwe n’ubwiyunge n’imibereho mu muryango. Mbere yo kwisungana n’abandi nta kintu nari nakigejejeho. Ubu nateye intambwe, kandi umuryango wanjye uriyubashye.”

Iyi koperative itangira, buri munyamuryango yatanze amafaranga y’u Rwanda ibihumbi makumyabiri, ubu bakaba bageze ku mugabane w’amafaranga asaga ibihumbi ijana na makumyabiri.

Agira ati “Iyo wishyize hamwe n’abandi muri koperative, umenya urugendo rwo kwizigamira. Kubera ko twishyize hamwe, twigishanyije uburyo bwo kuzigama kandi umunyamuryango wacu hari aho ageze.”

Anavuga ko kwibumbira muri koperative byabafashije kurwanya ihohotera ryo mu ngo ku buryo iyo baganiriye hagati yabo cyangwa basuranye, babona ko ingo zabo zifite umutekano.

Umuhoza Triphonie ni Visi Perezida wa Koperative Nyampinga, ihinga ibihumyo mu murenge wa Remera, Akagari ka Rukiri I, Umudugudu w’Amajyambere. Avuga ko kujya muri koperative ari ukwiteganyiriza.

Agira ati “Kwibumbira hamwe n’abandi muri koperative ni inzira y’ubwiteganyirize, kuko amafaranga yacu ntidupfa kuyakoresha uko tubonye. Tubanza kujya inama y’ibyo ddukeneye hanyuma tukareba n’amafaranga bikoreshwa. Umunyamuryango ufite ikibazo ntitumutererana kuko ikibazo cye tukigira icyacu.”

Abagore bibumbiye mu makoperative bo mu murenge wa Remera bagirana imihigo n’inama y’Igihugu y’abagore, ku buryo buri mwaka haba igihe cyo kugaragaza aho bageze. Ibi bibafasha kutirara kandi bagaharanira kutaba ibigwari.

Rwanyange Rene Anthere

Ijipo yitiriwe Knowless abagore bo muri Koperative Imbadukanamihigo bavuga ko ikunzwe cyane kandi yabateje imbere (Ifoto/Panorama)
Abagore bo mu murenge wa Remera bavuga ko kwibumbira mu makoperative ari inzira yo kwizigamira (Ifoto/Panorama)

 

 

Be the first to comment

Leave a Reply

Your email address will not be published.


*