Ireme ry’uburezi n’iterambere ntibyagerwaho hadakozwe ubushakashatsi

Kuva ku wa gatatu tariki ya 24 kugeza ku wa 25 Ukuboza 2018, abarimu ba kaminuza n’abashakashatsi  bo muri Afurika y’Iburasirazuba, bateraniye i Kigali mu nama y’iminsi ibiri. Ku munsi wa mbere, abayitabiriye bagaragaje ko igihe cyose hadakozwe ubushakashatsi, ireme ry’uburezi n’iterambere muri rusange bidashobora kugerwaho, kuko ubushakashatsi bushyizwemo imbaraga bwateza imibere imibereho y’abatuye Isi.

Abarimu ba za kaminuza bagaragaje ibibazo bahura na byo mu bushakashatsi bakora. Ibyo bibazo birimo ko habura ubushobozi bwo gukora ubushakashatsi, banabukora ugasanga rimwe na rimwe za Leta zidakurikiranye kandi ngo zishyire mu bikorwa ibyagaragajwe.

Dr. Ndikubwimana Theonetse, umuyobozi ukuriye ibijyanye n’ireme ry’uburezi mu nama nkuru y’uburezi, ari na ho ubushakashatsi  buhereye, avuga ko ubushakashatsi bufite akamaro ku iterambere ry’igihugu.

Agira ati “ibyo abarimu barimo gukora n’ibintu byiza ku iterambere ry’igihugu muri rusange. Nk’uko tubizi twese, uburezi ni umusingi w’iterambere, kuko iy’uburezi bujyanye n’ubushakashatsi butanga igisubizo gikenewe.”

Akomeza agira ati “Iy’umuntu yize akongeraho ubushakashatsi bw’ibyo yabonye nk’umushakashatsi biba bigamije gushaka ibisubizo by’ibibazo biriho, kuko umushakashatsi agaragaza ibibazo n’ibisubizo biriho,  bifasha igihugu kuko iyo ukemuye ibyo bibazo uba ufashije igihugu muri rusange.”

Amashuri makuru na za kaminuza asabwa gushyiraho ingengo y’imari mu bushakashatsi buri mwaka, bitewe n’ubushobozi bwa za kaminuza ariko hagomba kubamo igice cy’ubushakashatsi.

Na ho muruhande rwa Leta, munsi yashize guverinoma yatangije ikigega kijyanye n’ubushakashatsi cyafunguwe ku mugaragaro na Minisitiri w’intebe, bikaba byizewe ko  ikibazo cy’ubushobozi kizagenda kirangira buhoro buhoro ariko bikazaterwa n’ubushobozi bw’ubushakashatsi bugiye gukorwa, icyo ari cyo n’icyo busubiza  ndetse n’icyo bugamije, kuko buri wese atakwaka ayo mafaranga uko yishakiye.

Iki kigega cyashyiriweho kugira ngo abantu bakore ubushakashatsi ariko bijyanye n’icyo bigiye gukemura bizanira inyungu abaturage.

Hari igihe ubushakashatsi bushyirwa hanze ariko ibyavuyemo ntibyihute nyamara umushakashatsi yabukoze akagaragaza ibyavuyemo, biba byiza ko na we ubwe akurikirana, hakabaho n’ubufatanye hagati y’amashuri yigenga, aya leta ndetse n’abashinzwe ubushakashatsi, hakongerwa imbaraga  mu bikorwa bya Leta ndetse n’abikorera kugira ngo ibivuye mu bushakashatsi birusheho gushyirwa mu bikorwa.

Dr Mbarushimana Nelson, avuga ko ubushakashatsi bugira ireme iyo ubukora abifitemo ubumenyi n’ubushobozi, na ho muri za Kaminuza ikibazo bahura na cyo ari uko ari ubushobozi bw’amafaranga.

Agira ati “Kaminuza ikibazo bahura na cyo ni uko kugira ngo ukore ubushakashatsi bisaba kuva hamwe ujya ahandi, kandi nta bushobozi buba buhari,  bigatuma ababukora batabukora neza kubera ubushobozi.”

Akomeza avuga ko hakiri imyumvire itarahabwa agaciro cyane nko muri za Kaminuza aho usanga nta ngengo y’imari ihagije babiha, ibyo bigatuma n’ubushakashatsi umwarimu aba afite atabona ukwo abugararagaza. Ni muri urwo rwego Kaminuza ya UTB ifatanije na JRIIE  babishyize mu ngengo y’imari kuko ubushakashatsi buzana udushya bugamije kongera ubuzima bwiza bw’abaturage ndetse n’amajyambere arambye.

Agira ati “Ubushakashatsi burimo kwiga uburyo bwajya bugira agashya kandi bukanagirira abaturage akamaro, bigatuma tugira n’ireme ry’uburezi mu bukerarugendo no mu buhinzi.”

Bamwe mu bitabiriye inama baganiriye n’Ikinyamakuru Panorama, bavuga ko ikibazo gihari kuri za kaminuza ari ingengo y’imari ikiri hasi, hakaba hasabwa ko za kaminuza zakongera ubushobozi mu bushakashatsi bwo ku mashuri kandi ubusohoka bujya hanze n’abashinzwe kubwakira bakajya babukurikirana kugira ngo barebe ko ibyavuyemo bifasha mu gutanga igisubizo kandi bikazana impinduka zizamura imibereho y’umuturage.

Basaba ko ababishinzwe mu mashuri bakongererwa ubushobozi, kuko  bituma abarimu bazamuka mu ntera. Ibi kandi bikaba bitareba abarimu gusa, kuko n’abanyeshuri bagomba gufashwa kugira ngo nabo bakore ubushakashatsi, kuko igihugu cy’u Rwanda kiaganisha heza mu guteza imbere ubukerarugendo n’amahoteli.

Munezero Jeanne d’Arc

Dr. Ndikubwimana Theonetse, Umuyobozi ukuriye ibijyanye n’ireme ry’uburezi mu nama nkuru y’uburezi (Ifoto/UTB)
Dr. Callixte Kabera, Umuyobozi wa UTB (Ifoto/UTB)

Be the first to comment

Leave a Reply

Your email address will not be published.


*