Imihango, imigenzo n’imiziririzo mu Rwanda rwo hambere (Igice cya kabiri)

Bakunzi bacu, mu gice cya mbere cy’imihango, imigenzo n’imiziririzo mu Rwanda rwo hambere, twabagejejeho ibirebana n’umuntu n’undi muntu muri rusange. Muri iki gice cya kabiri turarebera hamwe ibyavugwaga hagati y’umuntu n’umugore, umuntu n’umukobwa, umuntu n’umwana n’umuntu na Shebuja.

2. Umuntu n’umugore

  1. Umuntu yirinda kuvuga icyo umugore yabyaye akiri mu rweyo, ngo yahora abyara abahungu, yaba ari umukobwa agahora abyara abakobwa
  2. Inka, intama n’ihene, ntawe uvuga icyozabyaye ngo akivugire hafi y’aho zabyariye, ngo yahora ikibyara. Bakivugira kure y’aho cyangwa se ku wundi munsi
  3. Umuntu ushaka guhindura umugore ubyara abakobwa gusa, amukubita igisura. Inka, ihene n’intama bibyara ibimasa gusa babigenza batyo zigahindura imbyaro

3. Umuntu n’umukobwa

  1. Umuntu azira kugera umukobwa intorezo niyo baba bakina, ngo aba amuzinze akazapfa atarongowe.
  2. Umuntu ushaka kuzinga umukobwa aragenda, akareba inzuzi ebyiri urw’igihaza n’urw’umwungu, akazijyana mu mayirabiri, imitwe iterekeranye, ati “Izi nzuzi umunsi zahuye nyiranaka azabone umugabo”.

4. Umuntu n’umwana

  1. Umuntu azira kurenga umwana ataragenda, iyo amurenze arahindukira akamurengura, kutamurengura ni ukumuzinga ntazagende
  2. Umuntu yirinda kurenga ingobyi cyangwa umusambi baryamishaho umwana utaragenda, kuba ari ukumuzinga umwana agakura nabi
  3. Umuntu yirinda guterera ku rutugu umwana utaramera amenyo, byatuma atayamera vuba
  4. Umuntu ntiyakinisha kubika umutemeri ku mwana ukiri muto cyane, kuba ari ukumuzinga ntazakure
  5. Umuntu ubikiriye umwana akanga gusinzira, ntiyagira ngo nasinzire vuba, ni ukumukenya, bakomeza kumubikira
  6. Umuntu yirinda guca hagati y’abana b’inkurikirane, ngo ni ukubateranya bakazahora bazirana.
  7. Umuntu iyo avuye ku mugezi yikoreye amazi, ntiyahirahira ngo ace hagati y’abana b’abavandimwe, iyo abaciye hagati akoramu mazi avuye kuvoma, akajugunya hagati yabo ngo atabakenya bagapfa.

5. Umuntu na Shebuja

  1. Umuntu ahora yirinda kunyura inyuma ya shebuja ngo ni ukwivutsa ntazagire icyo amugabanaho
  2. Umuntu uri mu buhake yirinda kwicarira intebe ya shebuja, iyo ayicariye aba ari ukwivutsa ntazagire icyo amugabanaho
  3. Umuntu uri kwa shebuja kurya barimo kota igishirira kikamutarukiraho ngo kiba kimusuriye neza aragabana.

Tuzagenda tubagezaho aya mateka mu byiciro. Ubutaha tuzabagezaho igice cya gatatu.

Byakusanyijwe n’itsinda ry’abanyamakuru ba Panorama.

Be the first to comment

Leave a Reply

Your email address will not be published.


*