Kicukiro: Hafashwe umuzamu ukekwaho kwiba amadolari mu rugo yakoragamo

Polisi y’u Rwanda ikorera mu karere ka Muhanga ku bufatanbye n’Urwego rw’igihugu rw’ubugenzacyaha (RIB), bafashe Ndagijimana Emmanuel ukekwaho kwiba amadorari y’amanyamerika ibihumbi 5500 ahwanye na Miliyoni 4,800,000 z’amafaranga y’u Rwanda mu rugo yakoragamo akazi k’ubuzamu ruherereye mu kagari ka Rukatsa, Umurenge wa Kagarama mu karere ka Kicukiro.

Mbarushimana Yves Theoneste wibwe aya mafaranga tariki 23 Ugushyingo, avuga ko nyuma yo kwibwa, Ndagijimana wari umuzamu mu rugo rwe yahise ata akazi ari yo mpamvu yahise akeka ko ari we wamwibye akihutira kumenyesha inzego z’umutekano.

Umuvugizi wa Polisi mu Ntara y’Amajyepfo, Chief Inspector of Police (CIP) Bonaventure Karekezi, yavuze ko Mbarushimana akimara kubona ko yibwe yahise ashyikiriza ikirego Urwego rw’igihugu rw’ubugenzacyaha(RIB) ishami rya Kicukiro narwo rubimenyesha urwa Muhanga aho Ndahimana akomoka, bafatanyije na Polisi hatangira ibikorwa byo ku mushakisha.

Yagize ati “Twahawe amakuru na RIB ikorera mu karere ka Muhanga ko hari umusore witwa Ndahimana ukomoka muri ako karere wibye amadorari i Kigali kandi ko bicyekwa ko yaba ariho yihishe”.

CIP Karekezi yavuze ko bakimara guhabwa ayo makuru ku munsi w’ejo ku wa gatandatu bahise bakora umukwabu wo kumufata.

Yagize ati “Twaje kumenya amakuru ko atigeze agera aho iwabo tugenzura no mu nshuti ze nuko tumufatira mu murenge uhana imbibi n’uwo akomokamo wa Nyarubaka wo mu karere ka Kamonyi, aho yari yihishe ku nshuti ye mu rukerera rwo kuri iki cyumweru tariki ya makumyabiri na gatanu Ugushyingo”.

Akomeza avuga ko basanze amafaranga yayatabitse munsi y’amase y’inka, akaba yarasigaranye amadolari 4200 (hafi 3,700,000frw) n’ibihumbi 40,000 by’amanyarwanda. Ubu yashyikirijwe Sitasiyo ya Nyamabuye aho arigukurikiranwa na RIB ku byaha akekwaho.

CIP Karekezi aragira inama abantu nk’aba baba bahawe ikizere n’abakoresha babo nyuma bakagaragaza ingeso z’ubujura ko babireka.

Aho yavuze ko iki ari icyaha gihanwa n’amategeko; harimo gufungwa ugatakaza ka kazi wakoraga bityo umuryango wari utunze ugahura n’ubukene n’igihugu muri rusange kikahahombera kuko kiba gitakaje wa muntu wakoraga kandi agatunga benshi.

CIP Karekezi yanibukije abantu babika amafaranga angana gutyo mu nzu ko atari byo, kuko mu nzu batakwizera umutekano wayo ko ahubwo bajya bayabika muri za banki aho bizeye umutekano usesuye, ikindi kandi yaanabibukije kujya bakoresha abakozi bizeye ho ubunyangamugayo no kujya bamenya imyirondoro ya bo n’aho bakomoka.

Panorama

Be the first to comment

Leave a Reply

Your email address will not be published.


*