Itegeko Rigenga Umurimo mu Rwanda (Igice cya mbere)

ITEGEKO N° 66/2018 RYO KU WA 30/08/2018 RIGENGA UMURIMO MU RWANDA

 

Twebwe, KAGAME Paul,

Perezida wa Repubulika;

INTEKO ISHINGA AMATEGEKO YEMEJE, NONE NATWE DUHAMIJE, DUTANGAJE ITEGEKO RITEYE RITYA KANDI DUTEGETSE KO RYANDIKWA MU IGAZETI YA LETA YA REPUBULIKA Y’U RWANDA

INTEKO ISHINGA AMATEGEKO:

Umutwe w’Abadepite, mu nama yawo yo ku wa 9 Nyakanga 2018;

Ishingiye ku Itegeko Nshinga rya Repubulika y’u Rwanda ryo mu 2003 ryavuguruwe mu 2015, cyane cyane mu ngingo zaryo, iya 29, iya 30, iya 31, iya 32, iya 33, iya 69, iya 70, iya 88, iya 90, iya 91, iya 106, iya 120, iya 122, iya 168 n’iya 176;

Isubiye ku Itegeko n° 13/2009 ryo ku wa 27/05/2009 rigenga umurimo mu Rwanda;

 

YEMEJE:

UMUTWE WA MBERE: INGINGO RUSANGE N’UBURENGANZIRA BW’IBANZE

Ingingo ya mbere: Icyo iri tegeko rigamije

Iri tegeko rigenga umurimo mu Rwanda.

Ingingo ya 2: Ibigengwa n’iri tegeko

Iri tegeko rigenga:

1 º imikorere y’umurimo ishingiye ku masezerano y’umurimo hagati y’umukozi n’umukoresha mu nzego z’abikorera;

2 º imikorere y’umurimo ishingiye ku masezerano y’umurimo hagati y’umukozi n’umukoresha mu nzego za Leta, uretse igihe biteganyijwe ukundi na sitati rusange igenga abakozi ba Leta;

3 º uwitoza umurimo;

4 º uwimenyereza akazi;

5 º uwikorera ku birebana n’ubuzima n’umutekano bye ku kazi;

6 º umukozi ukora umurimo utanditse ku bijyanye n’ibi bikurikira:

a) ubuzima n’umutekano ku kazi;

b) uburenganzira bwo kwibumbira mu masendika n’amashyirahamwe y’abakoresha;

c) uburenganzira ku mushahara;

d) umushahara fatizo mu byiciro by’imirimo bigenwa n’iteka rya Minisitiri ufite umurimo mu nshingano ze;

e) uburenganzira ku kiruhuko;

f) ubwiteganyirize bw’abakozi;

g) kurindwa ivangura mu kazi;

h) kurindwa imirimo y’agahato;

i) imirimo ibujijwe umwana, umugore utwite cyangwa uwonsa.

Ingingo ya 3: Ibisobanuro by’amagambo

Muri iri tegeko, amagambo akurikira afite ibi bisobanuro:

1 º amasezerano rusange: amasezerano yanditse arebana n’uburyo umurimo ukorwa cyangwa arebana n’izindi nyungu zihuriweho akorwa hagati y’Inzego zihagararira abakozi cyangwa intumwa z’abakozi aho inzego zihagararira abakozi zitari ku ruhande rumwe n’umukoresha umwe cyangwa benshi cyangwa Inzego zihagararira abakoresha ku rundi ruhande;

2 º amasezerano y’umurimo: amasezerano hagati y’umukoresha n’umukozi wiyemeza gukora akurikije amabwiriza y’umukoresha akabihemberwa umushahara;

3 º gufunga ikigo: kwangira abakozi gukora by’igihe gito bikozwe n’umukoresha umwe cyangwa benshi, hagamijwe gutuma abakozi be cyangwa ab’undi mukoresha bemera, bahindura cyangwa bareka ibyo basaba cyangwa gushyigikira abandi bakoresha mu byo binubira cyangwa ibyo basaba;

4 º guhagarika umurimo: guhagarika akazi bikozwe n’abakozi bamwe cyangwa bose bigamije guhatira umukoresha umwe cyangwa benshi cyangwa ishyirahamwe umukoresha arimo, kwemera, guhindura cyangwa kureka icyemezo cyafashwe;

5 º ihuriro ry’abakoresha: amashyirahamwe y’abakoresha yanditse akora ibikorwa by’ubucuruzi kandi akora imirimo isa cyangwa imirimo ijya gusa, yishyize hamwe, hagamijwe kurengera no guteza imbere inyungu zihuriweho mu by’ubukungu, imibereho myiza n’uburenganzira;

6 º ikiruhuko cy’ingoboka: igihe umukozi ahabwa uruhushya n’umukoresha rwo kutaza ku kazi kubera ibyiza cyangwa ibyago yagize kandi agakomeza guhembwa umushahara we wose;

7 º ikosa rikomeye: ikosa rikozwe n’umukozi, hashingiwe ku buremere by’icyakozwe, ikitakozwe, imyitwarire, uburyo ryakozwemo cyangwa ingaruka ryateje ku buryo umukoresha aba atagishoboye gukomeza kumukoresha;

8 º imirimo y’agaciro kangana: imirimo isa, ifitanye isano, ishobora kugereranywa cyangwa idasa rimwe na rimwe ikorwa n’abakozi ku mukoresha umwe ariko ifite agaciro kangana;

9 º imishyikirano rusange: ibiganiro biba hagati y’inzego zihagararira abakozi cyangwa intumwa z’abakozi aho inzego zihagararira abakozi zitari ku ruhande rumwe n’umukoresha umwe cyangwa benshi cyangwa inzego zihagararira abakoresha ku rundi ruhande hagamijwe guteza imbere uburyo bw’imikorere y’umurimo;

10 º impaka rusange z’umurimo: impaka hagati y’umukoresha umwe cyangwa benshi ku ruhande rumwe, itsinda ry’abakozi cyangwa abakozi bose ku rundi ruhande, zishingiye ku masezerano rusange cyangwa imikorere y’umurimo;

11 º impaka zihariye z’umurimo: impaka hagati y’umukozi umwe cyangwa benshi n’umukoresha, bitewe no kutubahiriza amasezerano y’umurimo bagiranye;

12 º impuzamasendika: ihuriro ry’amasendika ryanditse rigamije kurengera no guteza imbere inyungu zihuriweho mu by’ubukungu, imibereho myiza n’uburenganzira;

13 º impuzangaga z’abakoresha: inganga z’abakoresha zishyize hamwe zikora ibikorwa by’ubucuruzi kandi zikora imirimo isa cyangwa ijya gusa, hagamijwe kurengera no guteza imbere inyungu zihuriweho mu by’ubukungu, imibereho myiza n’uburenganzira;

14 º inzego zihagararira abakoresha: ishyirahamwe ry’abakoresha, ihuriro, urugaga rw’abakoresha n’impuzangaga;

15 º inzego zihagararira abakozi: sendika, impuzamasendika n’ urugaga rw’abakozi;

16 º ishyirahamwe ry’abakoresha: abakoresha bakora ibikorwa by’ubucuruzi kandi bakora imirimo isa cyangwa imirimo ijya gusa bishyize hamwe hagamijwe guteza imbere inyungu zihuriweho mu by’ubukungu, imibereho myiza n’uburenganzira;

17 º kwirukanwa nta mpamvu: gusesa amasezerano y’umurimo bikozwe n’umukoresha nta mpamvu ifite ishingiro cyangwa bidakurikije uburyo buteganywa n’amategeko;

18 º sendika: ishyirahamwe ry’abakozi ryanditse rikora imirimo imwe, imyuga isa cyangwa imirimo ijya gusa, rigamije kurengera no guteza imbere inyungu zihuriweho mu by’ubukungu, imibereho myiza n’uburenganzira;

19 º serivisi zidahungabanywa: ibikorwa bidashobora guhagarikwa hatitawe ku miterere bwite cyangwa rusange y’ubikora cyangwa ubikorerwa bigamije gutuma uburenganzira n’ubwisanzure by’abandi bidahungabanywa;

20 º umurimo ubujijwe ku mwana: umurimo ubangamira uburenganzira, ubuzima, cyangwa ubundi buryo bw’imibereho y’umwana;

21 º umukoresha: umuntu ku giti cye, urwego rwa Leta cyangwa ikigo cyigenga bikoresha umukozi umwe cyangwa benshi ku buryo buhoraho cyangwa budahoraho;

22 º umukozi wo mu murimo utanditse: umukozi ukorera ikigo cyangwa umuntu ku giti cye mu murimo utanditse mu gitabo cy’ubucuruzi cyangwa mu buyobozi bwa Leta;

23 º umukozi: umuntu wemeye gukorera umukoresha hakurikije amasezerano bagiranye akabihemberwa umushahara;

24 º umunsi w’ikiruhuko rusange: ikiruhuko rusange giteganywa n’itegeko;

25 º umurimo w’agahato: umurimo umuntu akoze atabishaka ashyizweho imbaraga cyangwa igikangisho;

26 º umurimo woroheje: umurimo udashobora kubangamira ubuzima, imikurire, n’imyigire by’umwana, cyangwa ibindi biri mu nyungu z’imibereho ye;

27 º umushahara fatizo: umushahara muto wemewe n’itegeko hashingiwe kuri buri cyiciro cy’umurimo;

28 º umushahara w’ibanze: amafaranga umukozi ahembwa, kubera akazi yakoze, hatarimo indamunite;

29 º umushahara: umushahara w’ibanze umukozi ahembwa hiyongereyeho indamunite kubera akazi yakoze;

30 º urugaga rw’abakoresha: amahuriro y’abakoresha yishyize hamwe akora ibikorwa by’ubucuruzi kandi akora imirimo isa cyangwa ijya gusa, hagamijwe kurengera no guteza imbere inyungu zihuriweho mu by’ubukungu, imibereho myiza n’uburenganzira;

31 º urugaga rw’abakozi: ihuriro ry’impuzamasendika ryanditse rigamije kurengera no guteza imbere inyungu zihuriweho mu by’ubukungu, imibereho myiza n’uburenganzira.

Biracyaza  

1 Trackbacks & Pingbacks

  1. Itegeko rigenga umurimo mu Rwanda (Igice cya kabiri) – Panorama

Leave a Reply

Your email address will not be published.


*