Kicukiro: Bamwe mu banyamadini ntibahuza na Leta ku buryo bwo kuboneza imbyaro mu rubyiruko

Uburyo bwo kwinjiza gahunda zo kuboneza imbyaro mu kiciro cy’ingimbi n’abangavu, cyavugishije abatari bake ubwo Minisitiri w’Intebe yasobanuriraga abasenateri ko ari kimwe mu byafasha kugabanya inda ziterwa abangavu. Abanyamadini n’amatorero bo mu karere ka Kicukiro bo ntibavuga rumwe hagati yabo hakurikijwe imyemerere ya buri cyiciro.

Kuringaniza imbyaro ni uburyo bukunze gukoreshwa ku bashakanye ariko ku rubyiruko bo bagakoresha kuboneza urubyaro. Mu madini n’amatorero bakunze gukoresha gukomera ku busugi, bamwe bakemera ko igihe kwifata byananiranye hakwitabazwa ubundi buryo kuko ahanyura inda hanyura n’izindi ndwara, ariko na none abandi bagasaba gukomera ku isengesho no ku mahame y’ukwemera.

Sheikh Gatete Mussa, Imam wa Kicukiro, mu kiganiro n’Ikinyamakuru Panorama, yavuze ko Idini ya Islam ari umufasha wa Leta mu gushaka icyatuma abaturage babaho neza, kandi na none inda ziterwa abangavu zikaba na bo zibahangayikishije. Bityo asanga kwigisha ubuzima bw’imyororokere urubyiruko no kubafasha kuboneza urubyaro ari ugushyigikira Leta muri gahunda zayo igenera abaturage.

Agira ati “Gahunda yo kuboneza urubyaro mu rubyiruko twayakiriye nk’uko twakira izindi gahunda za Leta, n’ubwo turi abanyamadini, ntitunyuranya na gahunda za Leta zigamije kugeza ku baturage ibyiza. Dusanzwe tugerageza kubyigisha abayoboke bacu mu buryo busanzwe bitewe n’uko gahunda imeze, bitewe nanone n’uko tubona igihugu cyacu”.

Akomeza agira ati “Abana bataruzuza imyaka y’ubukure usanga batwara inda zitateganyijwe, ariko bigishijwe kuboneza urubyaro hari icyo byafasha. Uburyo bwakoreshwa tugomba kubwigisha urubyiruko rwacu rukabyumva, rukabisobanukirwa.”

Asaba urubyiruko kwirinda kwishora mu mibonano mpuzabitsina ari abana, kuko byabagiraho ingaruka mbi, ahubwo bakagendera muri gahunda nziza zituma batera imbere.

Padiri Mukuru wa Paruwasi ya Kicukiro, Habineza François, we avuga ko Kiliziya Gatolika yafashe umurongo kandi itazawutezukaho kuko badashyigikira ikoreshwa ry’imiti haba ku bakuru ndetse no ku rubyiruko.

Agira ati “Twe ntikwemera kwigisha urubyiruko kuboneza urubyaro kandi batarabyara, ntitwabigisha gukoresha imiti ihagarika gusama kuko twaba dutije umurindi ibikorwa by’ubusambanyi, kandi morali yacu idutoza kwifata, kugeza igihe umuntu yemerewe gushaka akubaka urugo, akagira umuryango, akawuvunikira mu buryo bwemewe n’Imana. Nk’umushumba sinakangurira abakirisitu nyobora gukoresha iriya miti.”

Padiri Habineza avuga ko bamagana inda ziterwa abangavu n’imbaraga zabo zose, n’umutima wabo wose cyane cyane bashishikariza abantu gukangura imitima.

Abantu bakuru bangiza abana bakamaganwa kandi bagahanwa by’intangarugero, abantu bifitemo kandi imbaraga zo gutsinda ibishuko akaba afite ikizere ko bazabishobora binyuze mu isengesho rituranywe umutima wemera kandi uyoboka.

Minisitiri w’Intebe, Dr. Edouard Ngirente, ubwo yari mu Nteko Ishinga Amategeko, umutwe wa Sena, mu kwezi k’Ugushyingo 2018, yagarutse ku kibazo cy’inda ziterwa abangavu, kuko mu mwaka wa 2017 abagera ku 17500 bose batewe inda nk’uko byagaragajwe muri raporo ya Minisiteri y’uburinganire n’iterambere ry’Umuryango. Agaragaza ko uburyo bwo kuboneza urubyaro bukwiye kwegerezwa urubyiruko.

Ubusanzwe amabwiriza ntiyemera ko umwanya ajya kwa muganga gusaba gahunda zo kuboneza urubyaro atari kumwe n’ababyeyi be mu gihe atarageza ku myaka 18.

Rwanyange Rene Anthere

Be the first to comment

Leave a Reply

Your email address will not be published.


*