Abakoresha abana imirimo ivunanye babangamiye uburenganzira bwa muntu

Umuryango utegamiye kuri Leta uharanira uburenganzira bwa muntu, MPDEH (People’s Movement for Human Right Education) uratangaza ko abana bakomeje kugaragara mu mirimo ivunanye yo mu bucukuzi bw’ amabuye y’agaciro mu Rwanda no mu bihugu bya Repubulika ya Demokarasi ya Kongo (DRC), Uganda n’u Burundi.

Umuhuzabikorwa w’umuryango MPDEH, Bwana Kanyangusho Fabien, yavuze ko abana bakomeje kugaragara mu bucukuzi bw’amabuye y’agaciro, igikorwa kibangamiye uburenganzira bwabo aho bakora imirimo ivunanye.

Yagize ati “akazi ko mu birombe ntigakwiye gukorwamo n’abana kuko kangiza imikurire yabo, kakababuza kugana amashuri kandi ubusanzwe umwana kugera ku myaka cumi n’itandatu nta kindi yakabaye akora uretse kwiga.”

Akomeza agira ati “iki kibazo kigaragara cyane mu gihugu cya Kongo aho usanga umubare munini w’abana bakora mu birombe by’amabuye y’agaciro, mu gihe u Rwanda ruza ku isonga mu gukumira iryo koreshwa ry’abana muri ubwo bucukuzi n’ubwo naho hakiri abana bakoreshwa iyo mirimo; akaba ariyo mpamvu turimo guhugura imiryango igera kuri cumi n’ibiri itegamiye kuri Leta iharanira uburenganzira bwa muntu, kugira ngo dufatanyirize hamwe gukumira iryo koreshwa ry’abana muri iyo mirimo ivunanye.”

Yakomeje aburira abagikoresha abana iyo mirimo ko hari ibihano bibateganyirijwe. Avuga ko amategeko ateganya ko umukoresha wo mu bigo byanditse ukoresha abana cyangwa ugaragarwaho uruhare urwo ari rwo rwose rutuma umwana akoreshwa imirimo mibi, acibwa amande ari hagati y’amafaranga y’u Rwanda ibihumbi Magana atanu (500,000Frw) na miliyoni imwe (1,000,000Frw).

Bwana Kanyangusho Fabien, atangiza amahugurwa, yasabye abayitabiriye ko bagomba gukangurira abantu kumva ko umwana ari umwana, ko ari umutware, ko ari we Rwanda rw’ejo, aho kubahohotera ahubwo baharanire uburenganzira bwabo.

Ubusanzwe itegeko riteganya ko umuntu yemererwa gukora nibura agejeje imyaka 16 y’amavuko ariko umuryango MPDEH uvuga ko n’abari munsi y’iyo myaka ubasanga mu mirimo itandukanye harimo no kujya mu bucukuzi bw’amabuye y’agaciro, aho bakoreshwa mu koza amabuye y’agaciro, kuyungurura ibitaka ndetse harimo n’ababakoresha muri magendu.

Ubushakashatsi bwerekana ko abana bajyanwa muri iyi mirimo kubera ubukene bukabije buba bwibasiye imiryango yabo ndetse n’ihohoterwa n’amakimbirane mu miryango, bikaba aribyo biri ku isonga mu guteza ibi bibazo.

Kugeza ubu abana basaga ibihumbi Magana abiri na makumyabiri (222.918) bakoreshwa imirimo ivunanye hirya no hino mu gihugu, aho abagera hafi ku bihumbi mirongo itandatu (59.931) bangana na 41 ku ijana bakora imirimo yo mu rugo. Abasaga gato 31 ku ijana (31.1) ni ukuvuga abarenga gato ibihumbi mirongo itanu na kimwe (51.200) bakora imirimo y’ubuhinzi, ubworozi n’uburobyi; abagera hafi ku 10 ku ijana (9.7) ni ukuvuga abasaga ibihumbi cumin a bine (14.181) bakora iy’ubwubatsi mu gihe abagera hafi ku bihumbi bitanu (4.888) bangana na 3.3 ku ijana bakora mu birombe bicukurwamo amabuye y’agaciro.

Mwitende J. Claude

Be the first to comment

Leave a Reply

Your email address will not be published.


*