Rusizi: Abahinzi ba kawa barijujutira igiciro cyashyizweho

Ikigo k’igihugu gishinzwe kohereza mu mahanga ibikomoka ku buhinzi n’ubworozi (NAEB) cyatangaje ko igiciro fatizo cya kawa y’igitumbwe sizeni ya 2019, ikiro kizagura amafaranga y’u Rwanda 190. Iki giciro ntikivugwaho rumwe n’abahinzi ba kawa bo mu karere ka Rusizi bavuga ko ayo mafaranga ari make ugereranyije n’ayo bahawe muri sizeni iheruka.

Mu kugena igiciro cya kawa y’igitumbwe igomba kugura muri sizeni bihuza icyo kigo n’abafite aho bahuriye n’igihingwa cya kawa barimo abayobozi b’inganda zitunganya kawa, bamwe mu bahagarariye amakoperative y’abahinzi ba kawa, abashinzwe ubuhinzi mu mirenge n’abo mu turere na NAEB bakagena igiciro. Iyi sizeni ikiro cya kawa y’igitumbwe kizagura amafaranga y’u Rwanda 190.

Abahinzi ba kawa bo mu karere ka Rusizi bavuga ko ayo mafaranga ari make ku kiro ugereranyije na sizeni ishize ya 2018, kuko umwaka ushize ikiro cya kawa idatonoye cyaguze amafaranga 260.

Karasira Paul, umuhinzi w’ikawa utuye mu murenge wa Bugarama, yavuze ko ayo mafaranga ari make ku kiro ko hagakwiye ko byigwaho kugira ngo kawa iteze imbere abahinzi bayo.

Yagize ati “Kawa idufitiye akamaro gakomeye, ni yo mpamvu tuyikorera kugira ngo idufashe kwiteza imbere. Ahubwo nibadufashe ikawa igure menshi maze iterambere turigereho ku buryo bwihuse.”

Yakomeje avuga ko iyo kawa iguze menshi bituma umuturage agera ku iterambere maze agakemura ibibazo bimwugarije mu muryango.

Ushinzwe ubuhinzi mu karere Rusizi, Madame Bayizere Alice, avuga ko Ikigo k’igihugu gishinzwe guteza imbere ibikomoka ku buhinzi n’ubworozi mu Rwanda (NAEB) n’abafatanyabikorwa bacyo bagena igiciro bigendeye ku isoko kawa ifite ku ruhando mpuzamahanga. Ahamya ko uko isoko rigenda riboneka ariko bagenda bagena igiciro.

Yagize ati “iyo ku ruhando mpuzamahanga isoko ryigiye hejuru, ni ukuvuga iyo bongereye igiciro, umuhinzi na we abyungukiramo maze ikiro k’igitumbwe kikazamurwa.”

Uyu muyobozi akomeza avuga ko kawa iri mu bihingwa bizamura akarere ka Rusizi ikaba yinjiza amafaranga menshi muri kano karere igwa mu ntege igihingwa cy’umuceri.

Mu karere ka Rusizi habarirwa inganda zitunganya kawa zigera kuri 75, hamwe na kompanyi zitandukanye zikorera muri izo nganda.

Ndayisenga James utuye mu murenge wa Gihundwe, avuga ko kawa iyi sizeni ya 2019 yaguze make ariko n’ayo make inganda zidahita ziyabishyura, batanga ikawa ku ideni.

Yagize ati “Nabe make ariko na yo tuyabone. Urajyana ikawa ku ruganda bakaguha agapapuro kagaragaza ibiro wagemuye, maze ugataha bakakubwira ko uzagaruka kureba amafaranga yaje. Ubu ugemura kawa ku ruganda ukarara utariye amavuta kubera kubura amafaranga.”

Denis Fabrice Nsengumuremyi

Be the first to comment

Leave a Reply

Your email address will not be published.


*