Nyarugenge: Abakarani barasaba kongererwa amafaranga bakorera ku muzigo

Ifoto yo mu bubiko

Abakora umurimo wo kwikorera imizigo no kuyitwaza abagenzi mu mujyi wa Kigali, bazwi kw’izina ry’Abakarani, bahangayikishijwe n’ifaranga rimwe bakishyurwa ku kilo k’ibyo bikorera. Ni igiciro kidahinduka hakaba hagiye gushira imyaka 20, nyamara ubuzima i Kigali burushaho guhenda.

Uko iminsi ihita indi igataha ibiciro by’ibintu bikomeza guhindagurika akenshi bihenda kurushaho. Abakarani babona k’ubwabo nta terambere bakwigezaho mu gihe umurimo bakora udahabwa agaciro, kuko mu kwikorera imizigo bishyurwa habazwe ibiro umuzigo wikorewe upima aho ikilo kimwe gihwana n’ifaranga ry’u Rwanda rimwe (1frw) kuva mu mwaka wa 2000.

Umujyanama muri Koperative y’Abakarani (Union Karani Ngufu 2020) ikorera ku isoko rya Nyarugenge mu mujyi wa Kigali, Sibobugingo Jean Baptiste, avuga ko amafaranga bakorera atajyanye n’igihe barimo kuko usanga basabwa ibintu byinshi mu mibereho yabo ya buri munsi. Ibintu akenshi birenga n’ubushobozi bitewe n’amafaranga bakorera akiri make.

Atanga urugero ku biribwa avuga ko ikiro k’isukari cyaguraga amafaranga 350 ubu kigeze kuri magana inani (800frw). Inzu yakodeshwaga amafaranga ibihumbi bitanu, ubu udashobora kuyibona munsi y’ibihumbi mirongo itatu (30.000frw); ubu bishyuzwa imisoro, isuku n’umutekano buri kwezi n’ibindi.

Akomeza avuga ko n’ibyo bagerageza gukora biteza imbere nk’imihigo ya Koperative yabo,nabyo usanga nta nyungu bibasigira ahanini kubera cya giciro kitongerwa.

Ati “Ibyo twahize gukora birimo gutunganya ubusitani, ntanze nk’ingero z’ubwa Kimicanga n’ubwa La Palisse Nyandungu, bwombi bwatunganyijwe na Koperative yacu (Union Karani Ngufu 2020). Twateye ibiti ku muhanda wa Giti k’inyoni. Ibyo byose twishyurwa kuri cya giciro kikiri hasi ugereranyije n’ibyo tuba tugomba gukemura mu buzima bwacu bwa buri munsi.”

Ahishakiye Bowazi ukorera akazi ke k’ubukarani muri Koperative ‘Ejo heza Kiyovu’ nk’umunyamuryango, avuga ko binjiza amafaranga make bagasabwa gusohora adahwanye n’ayo bakorera bityo bakabaho nabi bidakwiye uwakoze.

Agira ati “Nigeze kumena ikirahuri k’imodoka nsabwa kukishyura ibihumbi umunani, kandi iyo modoka twapakiraga twari buhembwe amafaranga ibihumbi bitatu, twagombaga ndetse kugabana turi batatu. Byabaye ngombwa ko abandi bayamparira na Koperative iranguriza k’ubwo gukorera hamwe, mbasha kwishyura. Ikitubabaza n’uko iyo tuvuze ibyo kuzamurirwa igiciro cy’amafaranga dukorera ku kilo bititabwaho.”

Ushinzwe itangazamakuru mu rugaga rw’abikorera (PSF) asaba abakarani ko bakwegera ubuyobozi, bagasobanurirwa neza ndetse n’ibyifuzo byabo bigashakirwa umuti.

Ihuriro ry’amakoperative akorera mu karere ka Nyarugenge rigizwe n’abanyamuryango bagera kuri mirongo inani, bibumbiye mu makoperative 14.

UMUBYEYI Nadine Evelyne

Be the first to comment

Leave a Reply

Your email address will not be published.


*