Kiziguro: Hashyinguwe mu cyubahiro imibiri 17 y’abazize Jenoside yakorewe Abatutsi

Ku wa 11 Mata 2019, mu karere ka Gatsibo wari umunsi wo Kwibuka ku nshuro ya 25 Jenoside yakorewe abatutsi mu Rwanda. Imihango y’uwo munsi yashojwe no gushyingura mu cyubahiro imibiri 17 y’abazize Jenoside yakorewe Abatutsi, mu rwibutso rwa Jenoside rwa Kiziguro.

Urwibutso rwa rwa Kiziguro rusanzwe rushyinguwemo imibiri y’abazize Jenoside yakorewe abatutsi 14,284. Kuri uyu munsi hashyinguwemo indi mibiri 17 yari itarashyingurwa mu cyubahiro, yakuwe mu mirenge ine.

Imibiri itatu yavuye mu murenge wa Kiziguro akaba ari ubwa mbere ishyinguwe, ine iva muri Rugarama muri yo umwe ni ubwa mbere ugiye gushyingurwa, Umurenge wa Murambi havuyemo imibiri ine yashyinguwe mu cyubahiro ubwa mbere, na ho mu murenge wa Kiramuruzi harimurwa imibiri irindwi.

Kugeza magingo aya Urwibutso rwa Jenoside yakorewe Abatutsi rwa Kiziguro rushyiguyemo imibiri 14,301.

Padiri Mukuru wa Paruwasi ya Kiziguro, Rutinduka Laurent, mu butumwa nyigisho yatanze bukubiyemo incamake y’amateka ya Jenoside yakorewe Abatutsi mu karere ka Gatsibo, by’umwihariko mu cyahoze ari Komini Murambi, yahamije ko Jenoside itegurwa inyuze mu guhembera amacakubiri, hagakurikiraho kubiba ingengabitekerezo nyuma hakaza ubwicanyi.

Avuga ko mu itegurwa rya Jenoside yakorewe abatutsi bamwe mu bayobozi barimo Gatete Jean Baptiste wari Burugumesitiri wa Komini Murambi yashyizeho Umutwe w’Interahamwe zigera ku 2100, ni ukuvuga 150 muri buri segiteri, kuko Komini Murambi yari igizwe na Segiteri 14; agamije gutsemba abatutsi bari batuye muri iyo komini.

Padiri Rutinduka avuga ko izo nterahamwe zose zahawe imyitozo ya Gisirikare zitorezwa i Nyabisindu, zindi zigatorezwa mu kigo cya gisirikare i Gabiro. Asaba ko ingunguru batorezwagaho kurasa ikwiye gushyirwa mu mateka yaranze Jenoside yakorewe Abatutsi muri Komini Murambi.

Mu bikorwa by’ubugome Gatete yakoze agamije kwica abatutsi birimo ko yashinze ishyaka rya CDR agamije kumara abatutsi, yashinze ikinyamakuru cyabibaga urwango cyitwaga “Ukuri kwa Murambi” ashinga umutwe w’Interahamwe z’abagore witwa Interamwete, wari ugizwe n’abagore n’abakobwa bari bashinzwe kwica abana n’abagore no gutera imbaraga abagabo bicaga.

Mu kwezi k’Ugushyingo 1993 Abanyamurambi bari mu mashyaka ya Opozisiyo barwanyije Gatete akurwaho asimburwa na Mwange Jean de Dieu w’i Rwankuba. Nubwo yakundaga Siporo akaba yaranakinnye muri Zebre, yahaye ijambo rikomeye abakonseye barimo Mirasano, na Kamari bakinaga umupira babashyira mu gipolisi. Abandi bakinaga umupira babaye interahamwe zikomeye.

Gatete avuyeho yagiye gukora muri Minisiteri y’umuryango yayoborwaga na Nyiramasuhuko Paulina, ariko yakomezaga kuza muri Murambi ahubwo noneho mitingi zirakomera.

Muri Mata 1994, karekare mu gitondo Gatete yashyize mikoro ku modoka azenguruka abwira Interahamwe ko ashaka Komini idafite umututsi n’umwe kandi bigakorwa mu minsi itarenze icumi.

Bambanze Felesiyani watanze ubutumwa mw’izina ry’imiryango yashyinguye ababo mu cyubahiro, yavuze ko abagiye gushyingurwa ari bimwe mu bimenyetso by’ingaruka za Jenoside yakorewe Abatutsi aho abantu bishwe hakaba hari hashize imyaka 25 batarabona imibiri yabo ariko ubu baruhutse.

Yabasabye abacitse ku icumu rya Jenoside yakorewe Abatutsi kudaheranwa n’agahinda ahubwo baharanire kubaho, barebe ko uyu munsi bariho kandi bazasiga amateka meza. Agira ati “Imbabazi tugomba kuzitanga kugira ngo dusige amateka meza kubazadukomokaho…. Twubake igihugu cyacu kuko ntawundi uzakitwubakira, kandi amateka azahore avuga ko twashoboye kubabarira, twashoboye gutanga imbabazi.” Yashimye kandi ingabo zari iza RPF-Inkotanyi zabashije kubarokora no kubohora igihugu.

Perezida wa Ibuka mu karere ka Gatsibo, Sibomana Jean Nepo Rwema, yihanganishije abacitse ku icumu n’imiryango yashyinguye mu cyubahiro mu rwibutso rwa Jenoside yakorewe abatutsi rwa Kiziguro imibiri igera kuri 17, abasaba gukomera no gukomeza abandi.

Sibomana yashimye leta ko ibaha ubutabera ariko asaba ko abantu  bagambanira abandi bakicwa nabo bashyikirizwa ubutabera bakabazwa ibyo bakoze mu gihe cya Jenoside yakorewe abatutsi mu Rwanda

Bimwe mu byifuzo abacitse ku icumu bafite birimo gukomeza kubonerwa amacumbi, kwigishwa imyuga ku rubyiruko rwacikirije amashuri, kuvugurura urwibutso rwa Kiziguro hagamijwe gufata neza amateka ya Jenoside mu Rwanda ko kurangiza imanza z’Inkiko Gacaca zitararangizwa.

Guverineri w’Intara y’Iburasirazuba Mufulukye Fred yasabye abacitse ku icumu bo mu karere ka Gatsibo gukomera kubera ibyo banyuzemo mu gihe cya Jenoside yakorewe abatutsi, asaba abaturage, by’umwihariko urubyiruko, kumenya amateka ya Jenoside n’uburyo bwo kuyirandura burundu ingengabitekerezo yayo.

Yasabye abanyarwanda kurangwa n’ineza bakirinda ingengabitekerezo ya Jenoside ishingiye ku bwoko, Akarere n’ibindi bishobora gusubiza inyuma iterambere ryabo n’Igihugu.

Umunyamabanga wa Leta muri Minisiteri y’ubuzima, Dr. Ndimubanzi Patrick, wari n’Umushyitsi mukuru yavuze ko abacitse ku icumu Leta izakomeza kubitaho, imfubyi zigahabwa amashuri bakiga kandi asaba abanyarwanda kwibuka biyubaka.

Agira ati “Twarahiye ko Jenoside itazongera kubaho ukundi kandi ko Jenoside n’Ingengabitekerezo ya Jenoside bitazongera kubaho ukundi. Buri wese afite inshingano yo kurwanya ingengabitekerezo ya Jenoside mu buryo bwose bushoboka. Abarokotse Jenoside muhanire gukomeza kwiyubaka no kubaho neza. Twibuke twiyubaka.”

Imibiri 17 yashyinguwe mu cyubahiro mu Rwibutso rwa Jenoside yakorewe Abatutsi rwa Kiziguro mu karere ka Gatsibo (Igoto/Panorama)
Imibiri 17 yashyinguwe mu cyubahiro mu Rwibutso rwa Jenoside yakorewe Abatutsi rwa Kiziguro mu karere ka Gatsibo (Igoto/Panorama)

Rwanyange Rene Anthere

Be the first to comment

Leave a Reply

Your email address will not be published.


*