Nyamagabe: Umuhango wo Kwibuka ku nshuro ya 25 Jenoside yakorewe Abatutsi i Murambi (Live)

11:10: Hafashwe umunota wo kwibuka abazize Jenoside yakorewe Abatutsi

11:12: Hakurikiyeho gusenga, Uhagarariye Kiliziya Gatolika ayoboye isengesho.

11:16: Ijambo ry’ikaze ry’umuyobozi w’akarere ka Nyamagabe, Uwamahoro Bonaventure. Ati “Aha duteraniye i Murambi ni hamwe mu habereye Jenoside ifite ubukana bukabije. By’umwihariko ni ikimenyetso cy’uko Jenoside yakorewe Abatutsi yateguwe n’amwe mu mahanga akabigiramo uruhare…

Hano hiciwe abarenga ibihumbi 50 bashyinguye hano, harashyingurwa abandi 254 bakuwe mu rwibutso rwa Gasaka n’abandi bari bashyinguye hirya no hino mu miryango bakaba baremeye gushyingurwa mu Rwibutso rwa Jenoside rwa Murambi. Abashyingurwa uyu munsi harimo n’abana bari bahungiye muri SOS bakaza kuhicirwa.

11:21: Hakurikiyeho indirimbo ya Munyanshoza Dieudonne (Mibirizi). Aririmbye indirimbo ivuga amateka y’u Bunyambiriri, amateka ya Jenoside yakorewe Abatutsi hano i Bunyambiriri.

11:37:  Hakurikiyeho ubutumwa bw’abashyitsi baturutse mu Budage.

Uhagarariye itsinda ry’abadage bari i Murambi mu kwibuka ku nshuro ya 25 Jenoside yakorewe Abatutsi (Ifoto/Munezero)

Avuze ko bavuye kure mu Budage Yatangiye gufatanya n’u Rwanda kuva mu 2005. Ni umwarimu muri Kaminuza akazi ke akaba ari ako kubaga imibiri y’abantu bapfuye ngo amenye icyabishe. Avuze ko mu kinyejana cya 20 Jenoside y’abayahudi yabaye, bavuga ko bitazongera ukundi ariko Jenoside yakorewe Abatutsi iraba. Cyari igihe cy’umwijima, birababaje cyane. Bafatanya n’u Rwanda mu kubungabunga imibiri y’abazize Jenoside yakorewe Abatutsi.

Mugenzi we atanze ubutumwa bwa Minisitiri w’Umuco, Ubushakashatsi n’ubumenyi w’u Budage bushima ubufatanye n’u Rwanda kandi bazakomeza gufatanya kugira ngo bigire ku mateka ya Jenoside yakorewe Abatutsi ayo mateka abafashe kwiteza imbere kandi Jenoside ntizongere kubaho ukundi.

12:07: Hakurikiyeho ijambo ry’Umunyamabanga Nshingwabikorwa wa CNLG, Dr Bizimana Jean Damascene. Yihanganishije imiryango ifite ababo baguye i Murambi n’ahandi ku itariki ya 16 Mata. Avuze ko by’umwihariko Urwibutso rwa Jenoside rwa Murambi ruri mu nzibutso 10 Urwibutso ruzasura kugira ngo rwigishwe amateka kuko batayazi.

Ingengabitekerezo ya jenoside yatangiye kubibwa n’abanyapolitiki babifashwamo n’abihayimana barimo Musenyeri Perraudin mu ibaruwa ye yanditse ivuga ko akarengane n’ubusumbane byari mu Rwanda bituruka ku batutsi ngo bihariye byose abahutu ntacyo bafite. Ibaruwa ye yagaragazaga ko hari ikibazo cy’amoko, hari ikibazo cy’ubutegetsi n’ubucamanza byihariwe n’abatutsi kandi ataribyo. Ntavuga ko abahutu bari mu nzego z’ubuyobozi bavanywemo n’abakoloni. Iyo baruwa Gitera na Kayibanda bayishingiyeho kugira ngo bage kwigisha urwango n’iya Jenoside. Inzego zose zagiye zibigiramo uruhare, nta rwego rudakwiye kwisuzuma.

Muri 59 guhera mu kwezi 11 nibwo Jenoside yatangiye biturutse mu Byimana ko Mbonyumutwa akubiswe urushyi, abatutsi batangira kwicwa mu gihe cy’ibyumweru bibiri hakorwa icyo bise gutanga ihumure abantu bareka kwicwa. Mu ntangiriro ya 1960 abakoloni bategetse ko abishwe bose babarurwa. Ibaruwa yanditswe na Adimisitrateri wayoboraga teritwari ya Nyanza yageneye abashefu bose ba Nyanza, abasaba kubaha urutonde rw’abishwe mu 1959, handitswemo izina ry’uwapfuye, ababyeyi n’icyo yazize.

Ibi byerekana ko ubutegetsi aribwo bwayoboraga ubwicanyi, uyu muzungu yasabaga urutonde rw’abishwe adasaba urw’ababishe bigaragaza umuco wo kudahana. 1963, muri Gikongoro habaye ubwicanyi bubi, abashakashatsi babitangamo ubuhamya ko ari Jenoside. Hari agatsiko k’impunzi zateye ziturutse i Burundi batera i Bugesera bafata ikigo cya Gisirikare, bagera ku iteme rya Kanzenze. Habaye imirwano, birangiye batangira gushishikariza abantu ubwicanyi uhereye mu Bugesera.

Inyenzi zateye ku itariki 20/12/1963 bukeye Kayibanda yakoresheje inama avuga ko igihugu cyatewe, avuga ko niba Inyenzi zishoboye gufata Kigali n’ubwo bitazashoboka bizaba imperuka y’ubwoko bw’Abatutsi. Iryo jambo na Bagosora yararikoresheje. Kuri 22, hoherejwe umuminisitiri muri Perefagitura zituwemo n’abatutsi benshi, bakorana n’abaperefe kuyobora uko ubwicanyi bugomba kugenda. Kuri 23 habaye inama n’abaperefe n’abayobozi b’imirimo bagena uburyo kwica abatutsi bigomba gukorwa. Kuri 24 Abatutsi bari bahungiye muri za Paruwasi nibwo ubwicanyi bwatangiye gukorwa, kuri 25 batangira kurya inka zabo. Kuri 26/27 ubwicanyi bwabaye bwinshi cyane kandi bubi nk’uko bigaragazwa na raporo z’abapadiri. Abatutsi bajugunywe mu migezi bahambiriwe amaboko abandi batwikirwa mu nzu.

Ibyaranze ubwo bwicanyi: Nibwo bwa mbere hatangiye umuco wo guhemba abicanyi: icya kabiri ni uko bwamenyekanye mu mahanga kandi bugaha inyito ya Jenoside; Icya gatatu nibwo hatangiye umuco wo gupfobya Jenoside bigakorwa na Leta na Kiliziya. Musenyeri Perraudin yandikiye Papa na Radio Vatican ko ibyavuzwe mu Rwanda ko ari Jenoside ari ibinyoma ahubwo byatewe n’abatutsi kuko aribo bateye kandi ko Kayibanda atashoboraga kwica kuko ari umukirisitu. Abashakashatsi bavuga ko Perezida Kayibanda na we yanditse ibaruwa ijya guhura n’iya Musenyeri Perraudin mu kwa mbere 1964. Avuga ko hari ubwicanyi bwabaye bwatewe n’uko abatutsi bari barabaye ibyitso by’inyenzi hagategurwa gahunda yo kwica abahutu biturutse ku gitero cyagabwe mu Bugesera.

Ipfobya n’Ihakana rya Jenoside ryatangiye kuva kera bikorwa n’ubutegetsi. Leta ya Kayibanda yakoresheje ikinyoma. Hakurikiyeho kohereza intuma za Guverinoma y’u Rwanda mu mahanga kujya gusobanura ko nta bwicanyi bwabaye ziyobowe na Anastase Makuza wari Perezida w’Inteko Ishinga Amategeko icyo gihe.

Ibyabaye mu 1963 birumvisha impamvu mu 1994 abantu bishe ntacyo bikanga. Mu 1964 Leta yashyizeho imbabazi ko abishe batazigera bakurikiranwa. 20/05/1963 ingingo y’itegeko yavugaga ko imbabazi zisesuye zitanzwe kuva 1959 kugeza 1962 batagomba gukurikiranwa niba ubwo bwicanyi bwarakozwe mu kwibohora kw’abahutu. Ingingo ya kabiri ivuga ko niba hari umutsi wishe umuhutu izo mbabazi zitamureba.

Ubwicanyi bwo mu kwa 12/1963 bwaje abantu bafite iryo tegeko ribarengera bazi ko uwishe umututsi ntacyo azabazwa. 1973 Gikongoro yagiraga amashuri atatu gusa yisumbuye na yo yaranzwe no kwirukana abatutsi. 1990 abatutsi baratotejwe barafungwa. Gikongoro hari abantu bahakomoka batigeze bayoboka MRND bashinga ayabo mashyaka barimo Gapyisi, Nzamurambaho hanyuma abayoboke benshi barabayoboka MRND itangira kubura abantu.

Icyo gihe Gikongoro yayoborwaga na Habiyambere w’Umunyagisenyi ariko abantu ntibayoboka MRND. Bazanye Bucyibaruta kugira ngo abantu bose bamuyoboke, inganda n’imishinga bishyirwamo kuyiyobora bakomoka mu majyaruguru mu kazu. Birangiye bazanye interahamwe bagenda bazinjiza mu mirimo bagakora mu gitondo nyuma ya saa sita bagahabwa imyitozo mu mirimo no mu ishyamba rya Nyungwe. Hakomeje gutera ubwoba abatutsi b’ahangaha no kubatoteza.

Visi Perezida wa PL, Twagirayezu Joseph, bamwandikiye ibaruwa ivuga ko hari igihe kizagera ijuru, inzuzi zigahinduka umutuku, abagore bakabagwa, umumarayika uzamurinda azamukuruha. Iyo baruwa yari yanditswe n’abakozi ba Perefegitura na bamwe mu bacamanza. Umwe mu baburugumesitiri wari ukuze wategetse kuva mu 1960 kugeza 1992, Philippe Murasandonyi, hari inama yakoresheje abaturage ku itariki 10/06/1991, ivuga ko ikibazo cy’ingorabahizi batazibagirwa ari igitero cyo 1990, badakwiye kwirara ko abo banzi ntaho batandagaye hirya no hino mu gihugu. Yavugaga ko Abatutsi bose ari abanzi b’igihugu.

Mu 1994, mu kwezi kwa 3 n’ukwa 4, Cap Sebuhura, Col Simba na Perefe Bicyibaruta batangiye kurundanya intwaro. Ku itariki 11 Abatutsi bari batangiye guhungira kuri za Paruwasi, abayobozi babategetse kubohereza i Murambi. Ku 19/04, Perefe na Minisitiri w’intebe Kambanda bakoresheje inama bategura uko bazakora ubwicanyi, niho muri Gikongoro abantu batangiye kwicwa. I Murambi batangiye kwicwa ku itariki 20, hakurikiraho Kaduha… Ku itariki 20 nibwo bakusanyirijwe i Murambi barenga 43,000, habaye inama muri Gendarmerie iyobowe na Perefe na Capt. Sebuhura, hafatirwamo uburyo bwa Tekiniki bwo kugaba ibitero i Murambi.

Uruhare rw’u Bufaransa, rugaragara ku byapa biri hano mu Rwibutso rwa Jenoside rwa Murambi. Ntitwakwibagirwa guharanira ko ubutabera bubaho abagize uruhare mu bwicanyi bagahanwa. Dufite amateka mabi ariko igihugu cyariyubatse, turifuza ko aya mahoro dufite twayakomeza abana bacu bakiga aya mateka, Jenosidee ntizongere kubaho ukundi.

12:51: Mzehe Kayitaba Michel atanze ubuhamya bw’ibyamubayeho kuva mu 1959. Avuze ku ruhare rw’abazungu kuva mu 1959 aho bafatanyaga n’abaparimehutu guhiga abatutsi bigera aho bakoresha abasirikare ba Kamina bakoresha imbunda n’indege. Imiryango yashoboraga kwirwanaho bayitatanyaga n’indege, abahunze bakabarashisha imbunda nto. Mu 1960 batwikiwe mu nzu ariko ku’ubw’amahirwe bose bavamo. Kuri Noheli ya 1963, bababwiye ko inyenzi zateye bahungira mu ngo vuba, yageze mu rugo uwitwa Nzabamwita Yohani yamufashe afite umuhoro utyaye amusaba kumubwira aho se ari yamubura akamwica. Yakijijwe n’abagore bavugije induru basaba imbabazi, ariko hepfo babagaga inka aramurekura yirukankira kugabana inyama.

Mu 1973, yarigishaga ariko atotezwa cyane. Yatumwe kujya kuba umuyobozi w’ishuri ariko bimubera icyaha aregwa guhungabanya umutekano ko amafaranga azajya ayoherereza abari hanze bagatera igihugu. Mu minsi mike yabonye ibaruwa imusaba guhita yoherezwa i Rulindo, yahamereye neza agaruka ku Gikongoro afite imodoka. Umwe yamuciriye umugani ngo “Igoronzora amahembe iyatonora”.

Mu 1990, ku Gikongoro basatse mu ngo ariko ntibagera iwange, umuturanyi wange ajyana ikirego ko mfite imbunda zirunze mu gikari kandi batansatse. Baje kuntwara bagota urugo rwacu, bantegeka gufungura inzu no kuzana amavarisi, amafoto n’inzandiko nandikirana n’abantu. Umwana yanzaniye agapauro kanditseho ngo “Witinya ndi kumwe nawe….” Umujandarumwe twatangiye kuganira ambwira ibirimo kuba, banjyanye kuri Parike atangira kumbaza ambwira ko ari inzangano z’abaturanyi banjye.

Mu gihe cy’amashyaka menshi twari tuzi ko nta MRND izakandagiramo sinarinzi ko ibyo twabonye hano byari kuba. Ibintu byagiye bihinduka buhoro buhoro na Gapyisi ajya mu gipande cy’abahutu ngo batangiye kumva ko bashutswe bajya mu gipande cy’abapawa. Hari umupadiri witwa Emmanuel wari ushinzwe amashuri nawe yamamazaga CDR, umukobwa wabinekewe bwa mbere na we yagiye mu nyigisho z’abasederi. Btangiye kugira imbaraga amashyaka yabarwanyaga barayabohoza, ingengabitekerezo yo kwica itangira kugira imbaraga.

Rurangwa yagiye kuyobora IGA, nyuma asimburwa na Celestin, Rurangwa yabwiye Celestini amagambo amugaragariza ko azamutema. Hari uwamwatse imodoka amubwiye ko idahari amubwira ko azamuca umutwe bukeye. Mu 1994, twumvise ko indege yahanuwe dutegekwa kuguma mu ngo, byatumye tutamenya amakuru yo hanze. Muturanyi wanjye we yamenyaga amakuru kuko yari afite telefoni akayambwira. Numvaga ntawe uzaza kunyica ariko nkumva ko kubera ibintu bazaza. Nashatse abasore tugumana mu rugo bakirinda, Kamanzi na Nyirimanzi barabimwemerera, nagiye ku muturanyi wange nsanga hari abantu bane barimo n’umuyobozi wa CDR, ninjiye bandeba ukundi, mbavugishije baranyihorera. Nabasabye gushyira kuri Radio Muhabura, barambwira ngo nanshyirireho kuko nijye bifasha. Naragiye nabo turajyana ariko njya hagati yabo, bagiye bavuga imigambi y’ibyo bakoze mu ijoro.

Nageze mu rugo mbwira ba bahungu ko tugiye kwirarira, nko mu masaa moya n’igice umuturanyi wanjye yaraje ambwira ko abagabo bari kumwe bavugaga umugambi wo kwica abatutsi ansaba ko nibantera mvuza induru bakantabara. Iryo joro ntibanteye. Bavuze ko hari ihumure, hanyuma tujya guhaha, abo twahuye bazanye amakuru atandukanye harimo ko abantu babamaze, aho impunzi ziri…

Umwepisikopi wa Kigeme yazanye Madamu wanjye amukuye ku isoko. Nasabye umudamu n’abana kwihanga ko dusenga, Umwepisikopi yaraje ansaba kuva mu rugo [iyo ntava mu rugo uyu munsi najye muba munyibuka]…Nabajije abahungu banjye bambwira ko umwuka wabaye mubi hanze, abana bamwe Musenyeri yarabatwaye. Ku wa gatanu kuri 13 nibwo  bahateye bwa mbere, aho abahutu bahururizwaga gutabara kuko hari abahutu bishwe barimo Kamanzi na Samsoni. Numvise bagenzi banjye batangiye kubica barataka, umuborogo uratangira. Icyo gihe i Murambi bihagazeho ariko ngo barabahumuriza bababwira ko Caritas ngo yemeye kubaha ibyo kurya batazongera kubica. Ahubwo bagiye umugambi wo kugota inzira zose nanjye aho narindi bansabye kuhava narimutse njya kwa Normand nsanga na we yaragiye.

Ku itariki 20 abantu bose babazanye hano ni ho babiciye. Ku itari ya 22 bashatse mu mirambo yose baburamo uwanjye. Barashakishije bambuze bajya kwa Normand nyirinzu aba ariwe ujya kubwira interahamwe ngo zitaza kumusenyera inzu abanze abibwire Normand abajije icyo bakora kirabura. Nahereye mu gitondo saa tatu nitegura urupfu ndiyeza pe, mbaza madamu ati ‘turajyana’ mbajije abana na bo biba uko. Turategerezaaaa bigeze saa moya wa mugabo yaragarutse ati ‘maze gucisha icyanzu, ntuce kw’irembo batakubona musange wa muhungu bita Kamanzi twavuganye biteguye kubakira saa sita z’ijoro’. Kuva aho narindi kugera kwa Kamanzi hari iminota 15 ariko twakoresheje amasaha, twageze iwe iratwakira.

13:52: Indirimbo ya Mariya Yohana.

14:00: Ubutumwa bw’uhagarariye Ibuka mu karere ka Nyamagabe. Mu butumwa bwe afashe umwanya wo gufata mu mugongo abacitse ku icumu rya Jenoside yakorewe Abatutsi, abibutsa ko kubaho bishoboka kandi babifitiye ikizere. Avuze ko uyu musozi wivugira udakeneye abavugizi benshi cyane.

Abantu benshi bibaza aho abacitse ku icumu rya Jenoside yakorewe Abatutsi bakura imbaraga no kwihangana ariko biri mu bintu bikurikira:

-Indangagaciro z’abo twibuka kuko bari bazi kwihangana bikomeye, gukora cyane kandi mu maso habo hagahora hakeye cyane ntihagaragare agahinda. Dufite amahirwe yo kuba mu Rwanda rwazutse rutandukanye n’urwa mbere rwaranzwe n’amacakubiri. Leta y’ubumwe bw’abanyarwanda yagize uruhare rukomeye mu kudukomeza no kutwubaka, u Rwanda rutanga ikizere ko Jenoside itazongera ukundi, ko ntavangura rizongera kubaho.

Hari byinshi byakozwe ariko icyadushimishije cyane ni uguca umuco wo kudahana, kwica abatutsi byari byarabaye umuco, ariko kwica abatutsi byabaye icyaha kigomba guhanwa n’amategeko.

Uyu mwanya wo kwibuka Leta yaduhaye ni uw’agaciro ni uwo gusubiza abacu icyubahiro bambuwe. Uyu ni umwanya mwiza wo kwicara umuntu wese akareba umusanzu we mu gukomeza kubaka ikerekezo u Rwanda rwahisemo.

Ashimiye FPR Inkotanyi yabohoye igihugu ikanahagarika Jenoside yakorewe abatutsi, ikubaka igihugu giha ikerekezo buri munyarwanda nta vangura.

14:14: Ubutumwa bwa Rwamuhizi Fidele, uhagarariye imiryango iribushyingure mu cyubahiro imibiri y’ababo bazize Jenoside yakorewe Abatutsi. Ashimiye ababatabaye bose baba ab’imbere mu gihugu n’abaturutse hanze yacyo. Avuze ko mu bishwe hari uwo batashoye kumenya abe witwa Nsabimana Emmanuel, wakomokaga i Kibungo, nyuma baje gushakisha bagasanga umuryango we barawumaze.

Asaba ko hakwiye kugira igikorwa ngo abakoraga ku Kigeme kandi n’ubu bakihakora babafasha gutanga amakuru ku haba haherereye imibiri y’abishwe muri Jenoside yakorewe Abatutsi na bo bagashyingurwa mu cyubahiro.

Yavuze ko abacitse ku icumu rya jenoside yakorewe Abatutsi bafitanye igihango n’Inkotanyi kandi uzagitatira kizamusama.

14:26: Hagiyeho indirimbo yahimbiwe ubufundu.

14:35: Ubutumwa bwa Minisitiri w’Ubutabera akaba n’Intumwa nkuru ya Leta, Busingye Johnston, umushyitsi mukuru kuri uyu munsi. Afashe mu mugongo abibuka ababo bazize uko bavutse, bitewe na politiki yahanze kandi ikimakaza irondakoko. Ashimira abagize uruhare mu mushinga wo imibiri iruhukiye mu rwibutso rwa Jenoside yakorewe Abatutsi rwa Murambi.

Avuze ko icyahoze ari Perefegitura ya Gikongoro yabayemo ubwicanyi bukomeye buhereye ku itotezwa ry’abatutsi kuva mu 1959, hanyuma mu 1963 haba ubwicanyi bukomeye cyane bwa mbere bwiswe Jenoside. Ubutegetsi bwabayeho bwatereranye aka karere ahubwo bwimika ubwicanyi. Igihe cya Jenoside yakorewe Abatutsi abenshi biciwe mu nsengero za Kiliziya Gatolika….iz’andi madini, inzu nyinshi za Leta bikozwe n’ubutegetsi bwa Perefegitura ya Gikongoro. Hano i Murambi hiciwe abasaga ibihumbi mirongo itanu bishwe n’abagombaga kubarinda.

Dr Bizimana, azadushakire imbarutso, urwitwazo bakomeje gushingiraho, bagiye baheraho hakicwa abantu. Buri bwicanyi bwagiye buba hagiye haba ikintu kiswe imbarutso.

Ikibazo cy’ubutabera nicyo agarutseho ko ICTR yafunguye Col Simba atararangiza igihano n’ubwo cyari gito bitewe n’ibyaha yakoze. Hakozwe ibishoboka byose ngo ye gufungurwa ariko Umucamanza Theodore Meloni aramurekura. Tuzakomeza gukora ibishoboka byose ngo abakoze ibyaha bya Jenoside iburanishwa ryabyo ryitonderwe.

Dosiye ya Bucyibaruta yoherejwe mu Bufaransa hasabwa ko ishyikirizwa urukiko ariko n’ubwo yajuririye iki kemezo turizera ko ubutabera buzakora akazi kabwo. Ikibazo cy’ubufaransa ku byaha bakoreye hano na cyo kizakomeza gukurikiranwa.

Jenoside yatwaye abantu benshi ndetse inahungabanya ubuzima bw’igihugu. Byagaragaye ko Abanyarwanda badashobora gupfira gushira. Abacu b’u Rwanda bashingiye ku bushake n’urukundo bashoboye kubohora igihugu bahagarika Jenoside yakorewe Abatutsi none ubu kirimo kwiyubaka.

Abagifite amacakubiri, urwango,… ndatse n’abagipfobya n’abahakana Jenoside yakorewe Abatutsi bazakomeza gukurikiranwa kandi turasaba amahanga ko yashyira mu mategeko yabo ahana ibyo byaha n’ababikora bari hanze y’u Rwanda bakurikiranwe.

Igihugu cyacu ntikizongera kwegurirwa abandi. Ejo heza hazaza h’igihugu cyacu ni ahacu.

Umunsi nk’uyu uge utubera uwo gushimangira amahitamo yacu. Uyu munsi turibuka abacu… ubwitange n’ubushake byahagaritse Jenoside yakorewe Abatutsi byariyongereye nta Jenoside izongera kuba ukundi.

Minisitiri Busingye yibukije aho Pasika ihurira n’amateka y’abanyarwanda ko abanyarwanda batsinze urupfu. Abifurije Pasika nziza.

14:57: Gushyingura mu cyubahiro imibiri 254 mu rwibutso rwa Jenoside rwa Murambi rusanzwe rushyinguwemo imibiri isaga ibihumbi mirongo itanu.

 

 

Be the first to comment

Leave a Reply

Your email address will not be published.


*