Umuyobozi w’Akarere ka Gakenke yihakanye umuturage

Umuyobozi w'Akarere ka Gakenke, Nzamwita Deogratias, yihakanye umuturage wagejeje ikibazo ke cy'akarengane kuri Perezida wa Repubulika ndetse anavuga ko icyo kibazo ari ubwa mbere acyumvise. Yasabwe kugikemura vuba.

Ubwo Perezida wa Repubulika y’u Rwanda, Paul Kagame, yasuraga abaturage bo mu karere ka Burera, ku wa 8 Gicurasi 2019, umuturage wo mu karere ka Gakenke yamugejejeho ikibazo cye avuga ko abayobozi bamutereranye ariko Meya aramwihakana.

Umuturage wo muri Gakenke, Rudahunga Benjamin, yaregeye Perezida Paul Kagame uko yambuwe imitungo ye atekewe imitwe, ariko ngo Guverineri w’Intara y’Amajyaruguru akabwirwa ngo nagende “arye ibigori yaratsinzwe.” Umuyobozi w’Akarere ka Gakenke, Nzamwita Deogratias yarahiye izina ry’Imana abwira Perezida Kagame ko ikibazo acyumviye aho.

Rudahunga Benjamin agaragaza ikibazo ke mu kirera, yagize ati “Nyakubahwa Perezida nahuye n’ikibazo c’akarengane, umugabo w’umucire yaraje afata inzu zanje akoresheje inyandiko z’impimbano, ndegera Porokireri abica amazi, nja Kacyiru naho babica amazi.”

Perezida Kagame abajije Rudahunga impamvu inzu ze zatwawe ndetse n’uwazitwaye ndetse niba ikibazo ke atarakibwiye abayobozi, yamusibije agira ati “Yakoresheje impapuro mpimbano ajyana mu Rukiko, n’ubu ndazifite hano naregeye na Porokireri biranga, bagahamagaza uwo mugabo yagerayo … nta kintu bakoze… Ni Nturanyi Nicolas atuye mu Ruhengeri, amazu ganje agarimo. Nta hantu ntageze na nabibwiye Guverineri, arambwira ngo ningende ndye ibigori, ngo naratsinzwe.”

Rudahunga abajijwe Guverineri wamubwiye kujya kurya ibigori, yasubije ko ari uwavuyeho wasimbuwe na Gatabazi Jean Marie Vianney.

Rudahunga yabajijwe niba ikibazo ke yarakigejeje ku muyobozi w’akarere asubiza ko yakimugejejeho akizi ariko Meya yahise arahira Imana ko ikibazo aribwo acyumvise. Yagize ati “Ni izina ry’Imana Nyakubahwa Perezida wa Repubulika, uyu mugabo nibwo mubonye bwa mbere! Kuko abaturage bose bazana ibibazo dufite aho tugenda tubyandika ariko ikibazo cy’uyu nkimenyeye aha!”

Perezida Paul Kagame yasabye Umuyobozi w’Akarere ka Gakenke ko kuba yumvise ikibazo ahita agikurikirana kigakemurwa vuga. Yasabye kandi abayobozi bose kumva ibibazo by’abaturage bakabikemura vuba.

Panorama

Be the first to comment

Leave a Reply

Your email address will not be published.


*