Rwamagana: “Gira ubuzima” yafashije abajyanama guhangana n’ibibazo by’isuku n’imirire mibi

Igikoni cy'Umudugudu cyafashije ababyeyi kurwanya imirire mibi n'igwingira ku bana (Ifoto/U Marie Josee)

Gusura ingo muri gahunda ya “Gira ubuzima”, byafashije abajyanama b’ubuzima bo mu karere ka Rwamagana kumenya ahari ibibazo by’isuku nke n’ahari abana bafite ikibazo cy’imirire mibi; baboneraho gufata ingamba zo kubirwanya.

Mbonyumuvunyi Radjab, Umuyobozi w’Akarere ka Rwamagana, agereranya abajyanama b’ubuzima n’abaganga kuko akazi bakora kagaragaza impinduka mu mibereho y’abaturage. Aragira, ati “abajyanama b’ubuzima badufashije guhangana n’ikibazo cy’imirire mibi.

Mu myaka itatu twavuye ku bana 550, ubu dusigaranye 24 kandi na bo ni uko bahuye n’ibindi bibazo, bakomeje kubitaho”.

Mu mudugudu haba hari abajyanama b’ubuzima bane bakurikirana ibyiciro bitandukanye by’abaturage. Abarwayi babasanga  aho batuye bakabavura, ariko nabo bagira gahunda yitwa “Gira ubuzima” aho bafata umunsi umwe mu cyumweru bagatembera mu ngo bareba ibibazo bishobora kubangamira ubuzima bw’abazituye.

Nyirahabimana Solange, umuturage w’umudugudu wa Janjagiro, akagari ka Mununu mu murenge wa Fumbwe, ashima uburyo abajyanama bahwitura abaturage ku kwita ku isuku. Ati “kera hajyaga habaho abantu badakaraba, ntibasukure aho baba ariko kuri buri wese aba atinya ko umujyanama amusura agasanga asa nabi”.

Abajyanama b’ubuzima bahamya ko kwita ku buzima bw’abaturage ari inshingano za bo. Imihigo bahigiye mu itorero ry’igihugu yatumye barushaho kuzubahiriza kuko yabafashije gukorera ku ntego.

Semana Wellars, umujyanama mu kagari ka Nkomangwa, umurenge wa Munyiginya mu karere ka Rwamagana, avuga nyuma yo gutozwa muri 2009, abajyanama bahize kurandura Malaria, kurwanya imirire mibi, guhagarika impfu z’ababyeyi kandi kuri ubu asanga uwo muhigo  ngo bawugezeho ku kigero cya 98 ku ijana.

Aragira, ati “hashize imyaka 10 twiyemeje kurandura malaria kandi koko twabigezeho nta muntu ukicwa na Malaria. Iyo afashwe tumushyiramo igipimo, dufite n’udukoresho dupima Malaria twayimusangamo tukamuvura cyangwa yaba arembye cyane tukamujyana kwa muganga. Abana bari bafite imirire mibi twarabakurikiranye, ubu mu kagari nta n’umwe dufite.”

Uwiringira Marie Josee

Be the first to comment

Leave a Reply

Your email address will not be published.


*