Abahoze ari abasirikare barahatanira igikombe cy’irushanwa rigamije gusakaza Amahoro

Umukino wahuje Kigali na Nyanza ntiwari woroshye. Warangiye Kigali itsinze Nyanza ibitego 2-1 (Ifoto/Panorama)

Abahoze ari abasirikare barimo abari mu ngabo z’u Rwanda (Ex-FAR), abahoze mu ngabo za FPR Inkotanyi (RPA), ababaye mu bacengezi, abasezerewe mu ngabo z’igihugu (RDF) n’abasiviri, ku nshuro ya karindwi barahatanira igikombe cy’amahoro mu irushanwa ryiswe “Peace Tournament”. Iyi mikino yateguwe na Komisiyo y’Igihugu ishinzwe gusubiza mu buzima busanzwe abari abasirikare (RDRC).

Iyi mikino yatangiye ku wa 19 Kamena 2019 yitabirwa n’amakipe umunani arimo ikipe y’i Nyanza mu ntara y’Amajyepfo, ikipe ya Kigali ihagarariye Umujyi wa Kigali, Intara y’Iburasirazuba ihagarariwe n’amakipe abiri ariyo Kayonza na Bugesera, Intara y’Iburengerazuba ihagarariwe na Nyabihu na Rubavu; na ho Intara y’Amajyaruguru ihagarariwe n’ikipe ya Mutobo n’iya Musanze.

Imikino ya ¼ yaranzwe no gukina bakuranamo ku wa 19 Kamena 2019. Ikipe ya Kigali yasezereye iya Nyanza iyitsinze ibitego 2 kuri 1. Ikipe ya Nyabihu yasezereye iya Rubavu kuri Penaliti 5-4 nyuma yo kunganya ibitego 2-2. Ikipe ya Kayonza yasezereye iya Bugesera kuri Penaliti 4-2 nyuma yo kunganya igitego 1-1; hanyuma ikipe ya Musanze isezerera iya Mutobo iyitsinze ibitego 6-1.

Imikino ya ½ iteganyijwe ku wa Gatandatu tariki ya 22 Kamena 2019. Ikipe ya Kigali izahura n’iya Kayonza, hanyuma ikipe ya Nyabihu ihure n’iya Musanze. Umukino wa nyuma uteganyijwe ku wa gatanu tariki ya 28 Kamena 2019.

Nkunduwimye Jean Claude uzwi ku izina rya Jokolove, akinira ikipe ya Nyanza, yahoze muri Ex-FAR, aba no mu bacengezi. Avuga ko igikombe cy’amahoro ari umwanya w’ubusabane ku bahoze bahanganye mu rugamba rw’amasasu, ubu bakaba bahuzwa no kubaka igihugu. Agira ati “Uyu ni umwanya wo gusabana hagati yacu, ntiduhuzwa no gukina gusa, ahubwo bivamo n’ubucuti bukomeye. Mbere twahuraga turasana ariko ubu turahuzwa n’ibikorwa by’iterambere byubaka igihugu.”

Byusa Wilson Ludifu aha amabwiriza umukinnyi we kugira ngo bashake intsinzi (Ifoto/Panorama)

Byusa Wilson uzwi kw’izina rya Ludifu, yahoze muri RDF; ni umutoza w’ikipe ya Kigali. Avuga ko umukino wari mwiza impande zose, gutsinda babikuye ku kuba bakoraga ibyo bazi kuko bamenyereye imikino. Avuga ko iyi mikino igaragaza ubusabane.

Agira ati “Iyi mikino ituma turushaho kugira ubusabane. Mbere twahuriraga mu masasu ariko ubu turahurira mu bikorwa byubaka igihugu. Guhura rero turi no mu mukino cyane cyane umupira w’amaguru bituma turushaho kugira ubusabane.”

Munyanziza Pascal ni umutoza w’ikipe y’i Nyanza, yahoze muri RDF. Avuga ko iri rushanwa ry’amahoro rituma buri wese yongera gutekereza uruhare rwe mu gushaka amahoro. Agira ati “Bitwibutsa gusenyera umugozi umwe nk’abanyarwanda, guhura tugasabana tunatekereza ku iterambere ry’igihugu cyacu.”

Mukantabana Selaphine ni Umuyobozi wa Komisiyo y’Igihugu ishinzwe gusubiza mu buzima busanzwe abahoze ari abasirikare. Atangaza ko iyi mikino ya Peace Tournament igamije kugira ngo habeho irushanwa ry’umupira w’amaguru hagati y’abahoze ari abasirikare n’abasiviri hagamijwe imibanire myiza.

Agira ati “Bose baba bagomba kubana mu mahoro. Imikino irunga, ibanisha abantu. Hejuru yo guhurira mu bikorwa rusange tunabatoza guhura bagasabana kuko bibatoza ubumwe n’ubwiyunge.”

Akomeza atangaza ko iri rushanwa ritagarukira mu Rwanda gusa kuko ikipe yatsinze ikina n’izindi zo mu karere u Rwanda ruherereyemo, hakaba ubusabane hagati y’abantu bahoze ari ingabo mu karere. Hashize imyaka itatu imikino ihuza abahoze ari ingabo mu bihugu byo mu karere itaba.

Peace Tournament ni imikino ngarukamwaka yatangiye mu 2012, ku ikubitiro igikombe cyatwawe n’ikipe ya Kigali ikaba imaze kugitwara inshuro ebyiri harimo n’icyo yatwaye umwaka ushize.

Irushanwa ry’abahoze ari abasirikare riyoborwa n’abasifuzi bo mu kiciro cya kabiri cya shampiyona y’igihugu mu mupira w’amaguru (Ifoto/Panorama)

Rwanyange Rene Anthere

Be the first to comment

Leave a Reply

Your email address will not be published.


*