Burera: Hatashywe icumbi ry’abagana ibitaro bya Butaro rifite agaciro k’amafaranga asaga miliyoni 500

Ku wa Gatatu tariki ya 14 Kanama 2019, i Butaro mu karere ka Burera hatashywe inzu izafasha abivuza indwara za kanseri ndetse n’abarwaza kubona aho bacumbika. Iyi nzu izacumbikira abantu 70 yuzuye itwaye amafaranga y’u Rwanda asaga miliyoni magana atanu.

Iyi nzu y’icumbi yitezweho gufasha benshi baburaga aho barara kubera ubwinshi bw’abarwayi bagana ibitaro bya Butaro ndetse ikazabongerera ikizere cyo gukira nk’uko byagarutsweho n’abatambukije ubutumwa bwabo muri uyu muhango.

Umuhango wo gutaha inzu nshya izacumbikira abivuriza Kanseri ku bitaro bya Butaro witabiriwe n’abashyitsi batandukanye, barimo Umuyobozi w’ikigo k’igihugu kita ku buzima RBC (Dr Sabin Nsanzimana), Umunyamabanga Nshingwabikorwa w’Intara y’Amajyaruguru Jabo Paul, Umuyobozi w’Akarere ka Burera Uwambajemariya Florence, abayobozi b’inzego z’umutekano, Uwashinze Umuryango Partners In Health (PIH) Dr Paul Farmer n’abayobozi bawo ku rwego rw’igihugu n’abandi.

Umuyobozi w’Akarere ka Burera, Uwambajemariya Florence, yashimiye ibikorwa bya PIH n’urukundo bagiriye abaturage ba Burera babubakira ibitaro bya Butaro na Kaminuza mpuzamahanga ya UGHE ifite ikerekezo cyo kuzamura ibipimo by’ubuzima mu karere.

Yagize ati “…dukomeje gushimira abafatanyabikorwa bacu, Dr Paul Farmer uyoboye Partners In Health ku bwitange n’urukundo bahora bagaragariza abaturage bacu mu guteza imbere ibokorwa by’ubuzima bafatanyije na leta y’u Rwanda.”

Akomeza atangaza ko mu byagezweho mu buzima mu karere ka Burera, hashize imyaka itanu nta mubyeyi ushobora kwanduza umwana agakoko gatera SIDA igihe amubyara. Ibyo bakaba barabiherewe igihembo na Madamu Jeannette Kagame.

Umuyobozi w’Akarere ka Burera Uwambajemariya Florence, Uwashinze umurya Partners In Health Dr Paul Farmer, Umuyobozi Mukuru wa RBC Dr Sabin (RBC), Umuyobozi wa Partners In Health Dr Joel n’Umunyamabanga Nshingwabikorwa w’Intara y’Amajyaruguru Jabo Paul bafungura inzu y’icumbi i Butaro (Ifoto/Ferdinand)

Umunyamabanga nshingwabikorwa w’Intara y’Amajyaruguru, Jabo Paul, yagarutse ku musanzu wa PIH mu iterambere ry’ubuzima bw’Abanyarwanda aho na we yashimiye Dr Paul Farmer n’Umukuru w’igihugu Paul Kagame ku bw’ubufatanye bafitanye mu kurengera ubuzima bw’abanyarwanda.

Yasabye abaturage ba Burera n’abivuriza i Butaro muri Rusange kugira uruhare mu kwita ku buzima bwabo babungabunga ibikorwa bagezeho ndetse na bo ubwabo bakagira ibyo bikorera.

Ati “Reka abaturage ba Butaro dutangirire ku bikorwa abagiraneza batugejejeho maze tuvugurure uburyo tubayeho… ntituzatekereze ko abatwubakiye ibitaro na kaminuza bazaza no kutwubakira ingo zacu. Oya”

Umunyamabanga Nshingwabikorwa w’Intara y’Amajyaruguru yasabye umuyobozi w’Akarere ka Burera kwiha umuhigo wo guhindura Butaro igasa n’inyubako yatashywe. Ni ukuvuga, igatera imbere ku buryo abagana aka gace bazabona ko hari icyakozwe kigaragara.

Ati “Meya, uhiga neza kandi nabitangira ubuhamya. Ariko noneho ndagira ngo mu mihigo itaha ushyiremo ko Butaro igiye gusa n’inyubako twatashye uyu munsi, igiye gusa na kaminuza ya Butaro.”

Umuyobozi Mukuru w’Ikigo k’igihugu kita ku buzima (RBC), Dr Sabin Nsanzimana, atangaza ko Kanseri ari indwara ya kabiri ihitana ubuzima bw’abantu benshi kw’Isi, mu Rwanda abarenga ibihumbi icumi na bo bafatwa n’iyo ndwara kandi ubusanzwe uwamenyekanaga ko yanduye iyo ndwara umuryango watangiraga kumusezeraho uvuga ko atazakira.

Atangaza ko inzu yatashywe ije ari inyongera mu gufasha abarwayi ba Kanseri muri serivisi z’ubuvuzi bahabwaga kuko abarenga 50 kw’ijana bivuriza i Butaro baba baturutse mu tundi turere.

Agira ati “Iyi nzu izafasha abarwayi kuruhuka bamaze kuvurwa, hanyuma nibamara gufata agatege batahe. Yubatswe mu buryo n’imivurire ya Kanseri, ku buryo uzaba amaze kuvurwa ashobora kwiyakira, kuruhuka no kugirwa inama kuko hazaba hari abaganga babakurikirana.”

Akomeza atangaza ko iyi nzu ari inyongera ikomeye yo koroshya ubuvuzi bwatangwaga ku barway ba Kanseri no kuborohereza gucumbika, kuko hari n’abarwayi baryamaga hasi bategereje gutora agatege bagataha, ariko bitazongera kubaho.

Dr Nsanzimana Sabin asaba abakoresha iyo nzu kuyifata neza bakayigirira isuku bakanafata neza ibikoresho birimo kuko n’abandi baba bagomba kubikoresha kandi bifite isuku n’inzu igahora isa neza.

Ibitaro bya Butaro bifite ubushobozi bwo gucumbikira abarwayi 175 ku bitanda. Inzu yatashywe ifite ibitanda bisaga 70 byose bizifashishwa mu gucumbikira abaje kwivuza indwara za Kanseri.

Yubatswe ku bufatanye bw’Akarere ka Burera n’Umuryango w’Abanyamerika, Inshuti mu Buzima (Partners In Health), ari na wo wubatse ibitaro bya Butaro bivura indwara ya Kanseri. Byuzuye bitwaye amafaranga y’u Rwanda asaga miliyoni magana atanu.

Ferdinand Dukundimana/Butaro

1 Comment on Burera: Hatashywe icumbi ry’abagana ibitaro bya Butaro rifite agaciro k’amafaranga asaga miliyoni 500

Leave a Reply

Your email address will not be published.


*