Rulindo: Abaturage barasaba RDB gutwara inkende zibonera imyaka kuko zabateje inzara

Abaturiye ishyamba rya leta ryitiriwe umushinga wa GBK (Gishwati-Butare-Kigali), mu murenge wa Burega, mu karere ka Rulindo, mu ntara y’Amajyaruguru; babangamiwe n’inkende ziva muri iryo shyamba rikaza kubonera imyaka kuko zituma batabona umusaruro. Barasaba Ikigo k’igihugu k’iterambere -RDB, kuza kuzitwara kikazijyana aho badahinga.

Inkende zona imyaka ihinze mu gishanga no materasi akikije ishyamba. Abaturage bavuga zabateje inzara, kuko batunzwe no guhinga none ibyo bahinze byose zirabisarura kandi no kuzikumira ntibabishoboye.

Nikuze Didacienne, utuye akagari ka Karengeri, asobanura uko zona umurima w’amashaza, ku buryo utazizi yakeka ko ari umuntu wayasaruye. Avuga ko yatangiye konerwa mu mwaka wa 2012.

Agira ati “nibwo namanutse nsanga amashaza zayatonoye hasigaye ibishogoshogo, ubwo nsubira mu rugo mvuza induru ko batwibiye amashaza. Abo mu rugo bibaza umuntu wagiye kwiba ku manywa birabayobera. Nyuma naje gucunga neza mbona ko ari inkende ziyasoroma”.

Abaturage basobanura ko uretse amashaza, inkende zona n’indi myaka nk’intoryi, ibishyimbo, inyanya, ibijumba, imyumbati, ibigori, ibinyomoro, amatunda ndetse n’ubwatsi bw’urubingo bahingira amatungo.

Bakomeza bavuga ko bagerageje kuzikumira zirabitambika kuko zigenda mu matsinda ku buryo habamo izikora uburinzi mu gihe izindi zirimo kona.

Habarurema Elias, utuye mu kagari ka Taba, agira ati “ziza ari amatsinda y’inkende nka mirongo itanu, zigahurira mu murima umwe. Haba n’izijya ku nzira zikarindira izirimo kona ku buryo uhingutse ziragutangira. Kurinda imirima ntibyashoboka kuko zizi ubwenge nk’ubw’abantu.”

Abaturage ntibahwema gusaba ubuyobozi gutwara izi nkende kuko nabwo bubabuza kuzigirira nabi; ariko bukababwira ko igisubizo kiri mu maboko ya RDB ifite mu nshingano kubungabunga inyamanswa z’agasozi zirimo n’inkende.

Mbera Rodriguez, Umunyamabanga Nshingwabikorwa w’Umurenge wa Burega, ahamya ko n’ubwo abaturage batunganyije amaterasi bagahuza ubutaka, ariko nta musaruro atanga kubera inkende.

Avuga ko mu kwezi k’Ugushyingo 2018, abakozi ba RDB baje kureba uko ikibazo kimeze ariko ntihagire inkende n’imwe babona, kuko baje ku mwanywa y’ihangu bagasanga zihishe. Icyo gihe basize babijeje gushaka umwanzuro w’icyo kibazo, bakaba bagitegereje. Ati “niba bazazitwara bakazijyana aho badahinga, ntitubizi!”

Mu gihe abaturage n’ubuyobozi bifuza ko RDB yaza igatwara inkende, Ngoga Telesphore, Umuyobozi w’ishami rishinzwe kubungabunga urusobe rw’ibinyabuzima muri icyo kigo, atangaza ko ikibazo k’inkende zitaba muri Pariki zikaba zonera abaturage, kizaganirwaho n’impande zombi kikabona gufatirwa umwanzuro.

Ngoga avuga ko iki kibazo kigaragara mu ishyamba rya Shyorongi mu karere ka Nyarugenge, irya Rebero muri Kicukiro, muri Rulindo ndetse no mu karere ka Karongi.

Yongeraho ko igisubizo atari uko ahabonetse inkende hose RDB yajya gushaka uburyo bwo kuziterura zikajyanwa muri pariki cyane ko atari igikorwa cyoroshye.  Agira ati “ni ibintu bisaba ingamba z’uburyo byakorwamo.  Ariko na none aho twasanga hari aho zakomeza kuba zikabaho, nabyo icyo gihe umuntu yazihagumisha. Cyangwa se tugakorana n’abaturage mu kureba ukuntu na bo bagira uruhare mu kuzirinda kuko zona ku manywa”.

Inkende zagaragaye bwa mbere mu ishyamba rya GBK muri Burega mu mwaka 2011. Icyo gihe abaturage bazibonaga ari ebyiri ariko ubu bahamya ko zororotse zikaba zirenga 200.

Uwiringira Marie Josee

1 Comment on Rulindo: Abaturage barasaba RDB gutwara inkende zibonera imyaka kuko zabateje inzara

Leave a Reply

Your email address will not be published.


*