Burera: Imyumvire ituma hari abagabo badakozwa gahunda zo kuboneza urubyaro

Abagore bakarere ka Burera barashinja abagabo babo kutabemerera kwitabira kuri gahunda yo kuboneza urubyaro, nubikoze ugasanga umugabo atabyumva neza aho ahitamo kumuca inyuma akamubyariraho abandi bana hanze. Abagabo ubwabo ntibashobora kuboneza urubyaro aho usanga hari abatabyumva bakigendera ku myumvire ivuga ko ari uguca urubyaro. Ibi bituma ubwitabire bw’abagore mu kuboneza urubyaro buba buto batinya guharikwa.

Ndagijimana Jean Bosco utuye mu murenge wa Rwerere, avuga ko adashobora kwifungisha ariko akaba yumva ko umugore abikoze nta kibazo. Agira ati “Kwifungisha ku mugabo ni uguca umuryango. Umugabo wifungishije aba atakibasha gutera akabariro neza bikaba bibatera impungege.”

Ndagijimana avuga ko n’abagore babigiyemo bakwiye kubihagarika kuko hari abo bigiraho ingaruka, ahubwo hakwiye gushakwa ubundi buryo bwo gukoresha butagira ingaruka.

Mugabo Lambert na we avuga ko atakwifungisha burundu. Agira ati “Mfite impugenge ko mu gihe nifungishije burundu nkagira ibyago abana bange bagapfa ntazongera kubona abandi. Hakwiye gushyirwao ubundi buryo kuringaniza urubyaro byakorwamo ariko ntibafunge abagabo burundu, kugira ngo naramuka ashatse kongera kubyara atazagira ikibazo.”

Nduwayezu Beatrice avuga ko asanga abagore aribo bitabira kuboneza urubyaro kuko bavuga ko kurera abana benshi bitoroshye ndetse no kubabonera mituweli bitapfa korohera umuryango mugari.

Agira ati “Kuboneza urubyaro abagore babyumva cyane kuko hari nabo usanga ababangamiwe n’abagabo babikora batabibabwiye. Hakwiye gahunda zo gushishikariza n’abagabo kwitabira iyo gahunda ariko hakabaho ubundi buryo bwasimbura ubwo kwifungisha burundu, kuko hari igihe bashobora gukenera kongera kubyara ariko ntibikunde, nyamara ku mugore bishoboka.”

Abagore bayobotse gahunda zo kuboneza urubyaro batanga ubuhamya ko byabafashije kwita ku burere bw’abana babo no kwita ku muryango. Ikindi ni uko ngo byabashije gucunga umutungo kuko kubyara abana benshi bitwara amafaranga atagira ingano umubyeyi ajya kwa muganga, aho bitaborohera kubera ikibazo cy’imihanda.

Umuyobozi w’Akarere ka Burera wungirije ushinzwe iterambere ry’ubukungu, Munyaneza Joseph, atangaza ko gahunda zo kuboneza urubyaro kimwe n’izindi gahunda za Leta abagore bazitabira cyane kurusha abagabo, kuko abagore ubasanga k’ubwitabire nibura bwa 80 kw’ijana, kuringaniza urubyaro bakaba bageze kuri 45 kw’ijana.

Agira ati “Ubwitabire bw’abagore muri gahunda za Leta mu karere ka Burera buri hejuru kuko ubasanga mu buyobozi bw’amakoperative, umugoroba w’ababyeyi kandi gahunda yo kuboneza urubyaro baruta kure cyane abagabo. No muri gahunda zindi zijyanye no kwa muganga usanga abagore bazirimo kurusha abagabo n’amahirwe kuba amavuriro yaregerejwe abaturage usanga babikurikiranira hafi. Abagabo usanga batarumva neza gahunda zo kuboneza urubyaro cyane cyane kwifungisha burundu, ariko imiryango yabigezehe ifasha abandi mu guhindura imyumvire.”

Uyu muyobozi akomeza atangaza ko gahunda zo kuboneza urubyaro zegerejwe abaturage abaturage kuko buri murenge wahawe Ikigo nderabuzima, kandi hari n’amavuriro y’ibanze (Postes de Santé) yegerejwe abaturage, bityo bitagoranye ko abaturage babona serivisi zo kuboneza urubyaro bitabagoye.

Yongeraho ariko ko ikibazo ari imyumvire igishingiye ku bagabo batarabona neza akamaro kabyo. Ati “Ni ugukomeza ubukangurambaga kandi abamaze kubogeraho bagafasha bagenzi babo kumva akamaro ko kuboneza urubyaro.”

Munyaneza yongeraho ko indi mbogamizi bagihanganye na yo ari imyumvire ishingiye ku myemerere ariko nk’ubuyobozi biteguye gukomeza kubishyiramo imbaraga, iyo myumvire igahinduka.

Munezero Jeanne d’Arc

Be the first to comment

Leave a Reply

Your email address will not be published.


*