Burera: Abana bagera kuri 43 kw’ijana bari munsi y’imyaka itanu bugarijwe n’igwingira

Munyaneza Joseph, Umuyobozi w’Akarere ka Burera wungirije ushinzwe iterambere ry’ubukungu (Ifoto/Panorama)

Ikibazo k’imyumvire y’abaturage mu karere ka Burera ku birebana no gutegura indyo yuzuye ku bana no ku mubyeyi utwite byatumye abana bagera kuri 42,9 kw’ijana bari munsi y’imyaka itanu bagaragaraho igwingira. Mu gihe abasaga 9 kw’ijana bagaragaraho ibiro bike nk’uko bigaragara mu mibare y’umwaka wa 2017/2018 itangwa n’ubuyobozi bw’akarere.

Raporo ya Gahunda y’igihugu yita ku mikurire y’abana (NECDP) igaragaza ko mu Rwanda umubare w’abana bagwingira wavuye kuri 38 kw’ijana mu 2015, ukagera kuri 35 kw’ijana mu 2018. Iyi raporo igaragazako iki gipimo kizaba cyagabanyutse mu mwaka wa 2024 cyageze kuri 19 kw’ijana, kuko buri mwaka hagabanyukaho 1,5 kw’ijana. Mu karere ka Burera, kugeza mu mwaka wa 2018, igipimo k’igwingira ku bana bari munsi y’imyaka itanu, kiri kuri 42,9 kw’ijana.

Munyaneza Joseph, Umuyobozi w’Akarere ka Burera wungirije ushinzwe iterambere ry’ubukungu, atangaza ko kuba mu karere ka Burera bafite imirire mibi ari na yo ntandaro y’igwingira, atari uko bateza ahubwo biterwa n’imyumvire mibi y’abaturage.

Agira ati «aho usanga abaturage bacyumvako kurya byinshi ariko kurya, usanga umuntu yarura isahane yuzuye akumvako ariko kurya, kandi yariye indyo imwe, bikaba ari na bimwe mu bitera ingwingira ry’abana.

Ni naho usanga ababyeyi bamwe bibera mu kabari ndetse no mu biyobyabwenge, ntibabashe kwita ku bana bikanatera amakimbirane mu ngo ndetse no kwicana bya hato na hato.»

Amavuriro y’ibanze (Postes de Sante) yitezweho gufasha abaturage guhindura imyumvire y’abaturage ku gutegura indyo iboneye no kurwanya igwingira ry’abana (Ifoto/Panorama)

Uyu muyobozi akomeza atangaza ko bafashe ingamba zo gukemura ikibazo k’imirire mibi bubaka uturima tw’igikoni, bashishikariza ababyeyi bombi kwitabira irerero. Ati «kubera imyumvire usanga bamwe mu baturage akenshi banagaragaraho icyo kibazo badakunze kwitabira gahunda za Leta kugira ngo bakurikirane inama bagirwa. Kubera icyo kibazo, twahisemo kuzashyiraho umuntu ukurikirana ababyeyi bari muri za VUP cyangwa abari ku mashatsiye kugira ngo abana babone ifunguro ryuzuye, bibarinde kugwingira.»

Ku bijyanye n’umugore utwite kuko na we aba agomba kubahiriza gahunda yo kurya indyo yuzuye kugira ngo bitazagira ingaruka ku mwana, bashyizeho gahunda yo kwigisha ababyeyi gutegura indyo yuzuye mu mugoroba w’ababyeyi no mu gikoni cy’umudugudu.

Imibare igaragazwa n’akarere ka Burera mu mwaka 2017/2018, abana bagaragaye mu mirire mibi bageraga kuri 288, muri bo 275 barakize, na ho 13 baracyakurikiranwa. Mu bana bagera kuri 42,9 kw’ijana bagagayeho igwingira, 9.4 kw’ijana bagaragayeho ibiro bike na 1.8 kw’ijana barwaye bwaki.

Mukamusana Leontine, umuturage wo mu karere ka Burera, avuga ko ikibazo k’igwingira ku bana bari munsi y’imyaka itanu biterwa n’ubukene n’imyumvire aho usanga ntacyo umubyeyi yinjiza ahubwo akirirwa yimwera inzoga.

Agira ati «Ikibazo k’imyumvire no kuba hari ababana batarasezeranye bituma hari abagabo babwira abagore ko bazabirukana, ndetse bakanasiganira kurera umwana, aho umugabom yibera mu kabari umugore yabaza akamumbwirako ntaho yamurega, bikarangira umwana atitaweho. Hari kandi no guhenzwa ku mutungo w’urugo bitera amakimbirane mu ngo.»

Uzabakiriho Delphine na we utuye mu karere ka Burera avuga ko igitera igwingira ari uko usanga umugabo afite abagore barenze umwe kandi nta bushobozi bafite. Ikindi ni uko nubwo ari abafite uturima tw’igikoni hari abatazi gutegura indyo yuzuye, ariko ubu hari abafashamyumvire batangiye kubigisha uko bategura indyo yuzuye ku mwana no ku mugore utwite.

Kariza Beatrice ni umujyanama w’ubuzima. Avuga ko mu rwego rwo guhangana n’ikibazo k’igwingira no kuwanya imirire mibi, bafasha gahunda yo kubigisha mu mugoroba w’ababyeyi, ariko kandi hakiri ikibazo k’imyumvire aho abagabo beza imyaka yose bakayitundira kw’isoko.

Mu rwego rwo guhangana n’ikibazo k’igwingira ku bana bari munsi y’imyaka itanu, Akarere ka Burera kashyizeho gahunda yo gukoresha abafashamyumvire n’abajyanama b’urungano mu gukangurira abaturage gutegura indyo yuzuye, no gufasha bamwe mu bagabo guhindura imyumvire ku bijyanye no kwita ku bana no gushaka ibitunga urugo. Igikoni cy’umudugudu akaba ari gahunda ihurirwaho na buri wese, aho bigishirizwa no ku mavuriro y’ibanze (Postes de Santé).

Gahunda y’igihugu ni uko myaka itanu, ni ukuvuga kugera mu mwaka wa 2024, igipimo k’igwingira kizaba cyaragabanyutse kugera kuri 19 kw’ijana kivuye kuri 35 kw’ijana.

Munezero Jeanne d’Arc

Be the first to comment

Leave a Reply

Your email address will not be published.


*