“Gahunda yo kuboneza urubyaro iragenda itanga umusaruro mu Rwanda”_Dr Sabin Nsanzimana

Mark Bryan Schreiner uhagarariye UNFPA mu Rwanda na Dr Sabin Nsanzimana Umuyobozi wa RBC baganira n'abitabiriye umuganda wo ku wa 31/08/2019 mu murenge wa Kimihurura, Akagari ka Rugando (Ifoto/Panorama)

Ubuyobozi bw’Ikigo k’igihugu cy’ubuzima, RBC, butangaza ko mu Rwanda gahunda yo kuboneza urubyaro igenda neza, kuko umubare w’abana ku muryango ugenda ugabanyuka, kuko mu myaka itanu ishize wavuye ku kigereranyo cy’abana batandatu (6), ubu bakaba bageze kuri bane (4) ku muryango.

Ibi byagarutsweho ku wa 31 Kanama 2019, ubwo RBC ndetse n’Ishami ry’Umuryango w’Abibumbye ryira ku mibereho y’abaturage (UNFPA/FNUAP), bitabiraga umuganda rusange wo mpure z’ukwezi, wabereye mu mudugudu wa Gasasa, Akagari ka Rugando, Umurenge wa Kimihurura, Akarere ka Gasabo, wahuriranye no kwizihiza Yubile y’imyaka 50 UNFPA imaze ikora ibikorwa byo kwita ku muryango n’imibereho y’abaturage.

Umuyobozi w’ikigo k’Igihugu gishinzwe Ubuzima, RBC, Dr. Sabin Nsanzimana, atangaza ko hari uburyo bwo kurinda abangavu gutwita bukiganirwaho hagati ya Leta n’Abihayimana, kuko kuboneza urubyaro bidahera ku wabyaye ahubwo bihera kuri wawundi ubiteganya.

Dr. Nsanzimana yagize ati “Dufite uburyo bwinshi bitewe n’ikiciro k’imyaka umuntu arimo, abakiri bato hari ibyo bagenerwa, abakuze hari ibyo bagenerwa. Mu byo tukiganiraho n’Abihayimana ku bijyanye n’udukingirizo ndetse no kwifungisha, hari ibyo tugerageza kuganiraho cyane kugira ngo tugire aho duhurira. Uburyo bwose bwo kuboneza urubyaro buteganywa na Minisiteri y’ubuzima, bwaba ubwo kwifata ndetse n’ubwo kwa muganga, nta na bumwe bukuraho ubundi, bwose buruzuzanya.”

Akomeza avuga ko ikibazo cy’abana baterwa inda bakiri bato muri iki gihe gihangayikishije inzego nyinshi yaba Minisiteri yita ku muryango, yaba iy’ubuzima ndetse n’iy’uburezi kuko abo bana abenshi bava mu mashuri; ariko hari ingamba zituruka muri bice by’ingenzi bihanganye n’icyo kibazo.

Agira ati “Muri rusange mu Rwanda usanga gukoresha uburyo bwo kuboneza urubyaro ku bangavu bitavugwaho rumwe n’ababyeyi. Gusa gahunda ya kuboneza urubyaro igenda itanga umusaruro mu Rwanda, kuko ubu ikigereranyo kiri ku bana bane ku muryango bavuye kuri batandatu mu myaka itanu ishize.”

Mark Bryan Schreiner uhagarariye UNFPA mu Rwanda, avuga ko ku bijyanye no kuringaniza urubyaro icyo bitaho ari ukumenya ko abantu bose amakuru abageraho uko bikwiye. Agira ati “Dushyigikiye ko abantu ari bo bifatira ikemezo; niba bakeneye kuboneza urubyaro mu buryo butangwa kwa muganga, bakabyifatiraho ikemezo kandi bagahabwa izo serivisi. Dukorana n’inzego zitandukanye kugira ngo amakuru ajyanye n’ubuzima bw’imyororokere agere no ku bato, bityo bifatire ibyemezo ubwabo.”

Abakozi ba RBC n’aba UNFPA bifatanyije n’abaturage mu muganda wo ku wa 31/08/2019 mu mudugudu wa Gasasa, Akagari ka Rugando, Umurenge wa Kimihurura, Akarere ka Gasabo (Ifoto/Panorama)

Byukusenge Leontine ni umuturage wo mu akagari ka Rugando, Umurenge wa Kimihurura. Mu kiganiro n’Ikinyamakuru Panorama yavuze ko gukoresha agakingirizo ari byiza kuko bibarinda gusama igihe kwifata byabananiye, ariko ko na we ubwe atabona aho ahera agaha umwana cyangwa ngo amusabe kugakoreagira.

Agira ati “Byaba byiza kuba agafite ariko nk’umubyeyi biragoye ko watumuha, byagaragara nko kumushishikariza gusambana; gusa aho gukoresha inshinge, ibinini cyangwa ubundi buryo burinda gusama, yakoresha agakingirizo kuko ibindi byo numva byanamugiraho ingaruka kuko aba atarabyara.”

Habimana Emmanuel na we utuye mu kagari ka Rugando, avuga ko ababyeyi bataragera ku rwego rwo kwerura ngo baganirize abana ku buzima bw’imyororokere, ko na we ubwe ataha umwana we agakingirizo mu byo amugenera agiye kw’ishuri. Avuga ko ibyo biterwa n’uko ababyeyi basiganira kuganiriza abana babo ku bijyanye n’ubuzima bw’imyororokere kubera isoni, bikarangira umwana yisanze yasamye.

Abitabiriye umuganda bose bakurikiranye ibiganiro byatanzwe (Ifoto/Panorama)

Munezero Jeanne d’Arc

Be the first to comment

Leave a Reply

Your email address will not be published.


*