AGESPRO irashimirwa ubunyamwuga mu gucunga umutekano

Ikigo kigenga gicunga umutekano w’abantu n’ibintu -AGESPRO, kirashimirwa ko abakozi bacyo bakora kinyamwuga imirimo bashinzwe, byose bituruka ku kuba gifata iya mbere mu kubaha amasomo karishyabwenge mu kunoza umwuga wabo ndetse n’ubunyangamugayo.

Mu mahugurwa yo kunoza ubunyamwuga, gusaka no gukunda igihugu yahawe abakozi ba AGESPRO bagera kuri 600 muri Camp Kigali, ku wa 25 Nzeri 2019, Komiseri ushinzwe ibikorwa by’umutekano n’ibigo byigenga bicunga umutekano ACP Jean Nepo Mbonyumuvunyi, yasabye abakozi ba AGESPRO Security gukomeza kuba indashyikirwa mu gucunga umutekano, ariko kandi bagashyira imbaraga mu gukorana na Polisi mu gukumira ibyaha batangira amakuru ku gihe.

ACP Mbonyumvunyi, atangaza ko iki kigo kiri muri nibura bitanu bya mbere byitwara neza bikunze gushimwa n’Abashinzwe kugenzura ibigo bitanga serisi zo gucunga umutekano mu gihugu, kikaba kibikomora ku kuba ubuyobozi bwacyo bwongerera ubumenyi n’ubushobozi abakozi binyuze mu kubahugura no gutuma imibereho yabo iba myiza.

Komiseri ushinzwe ibikorwa by’umutekano n’ibigo byigenga bicunga umutekano ACP Jean Nepo Mbonyumuvunyi (Ifoto/Panorama)

ACP Muvunyi agira ati “Abacunga umutekano bagombye kudufasha gukumira ibyaha, ntibyaba aribyo umuntu ava mu kabari yasinze aba basore n’abakobwa bahari bakamwemerera kwinjira mu modoka kandi babona ko yasinze. Icyo tubasaba ni imikoranire mu kudufasha gukumira ibyaha.”

ACP Mbonyumuvunyi akomeza agira ati “…Dufite kampani zigera kuri eshanu kandi zikora neza, iyi na yo ikaba ibarirwamo, iri muri kampani zikora neza kandi zitanateza ikibazo.”

Umuyobozi Mukuru wa AGESPRO Security, Muyango Mbaguta Robert (Ifoto/Panorama)

Umuyobozi Mukuru wa AGESPRO Security, Muyango Mbaguta Robert, avuga ko aya mahugurwa ahabwa abakozi babo bayafashwamo na Polisi y’igihugu, bakabaganirizwa ku birebana no gukunda igihugu, gusaka no kunoza ubunyamwuga muri rusange.

Agira ati “Twari tumaze iminsi duhura n’ibibazo mu kazi n’ubwo Polisi yaduhaga amahugurwa menshi ari bahugura abahugura abandi. Ubu twatekereje ku guhugura abantu benshi kugira ngo dugire umubare munini w’abantu bahuguwe, bamenye icyo Polisi idushakaho, bamenye icyo inzego z’umutekano zidushakaho, bityo nibagera hanze barusheho gukora akazi kabo neza.”

Muyango avuga kandi ko abatabonetse uyu munsi, abashinzwe kubagenzura bazabahera mu kazi ku buryo bizeye ko abakozi babo bose azabageraho.

Bamwe mu bakozi ba AGESPRO bitabiriye amahugurwa, bavuga ko hari andi bari barahawe abafasha mu myitwarire mu kazi kabo, aya bahawe abafasha gukomeza muri uwo murongo baharanira gukomeza kwesa imihigo bakora kinyamwuga.

Karamira Faustin amaze imyaka 11 mu kazi ko gucunga umutekano, muri yo itandatu ayimaze akorera muri AGESPRO. yagize ati “…usanga AGESPRO iri imbere mu guhugura abakozi, ibagenera ibyangombwa mu kazi n’ibindi bidufasha kwitwara neza ku bo turinda, kubarindira ibyabo no kumenya gutanga amakuru ku gihe.”

Nibagure Marithe amaze imyaka itandatu muri AGESPRO, avuga ko amahugurwa abafasha kunguka ubumenyi no kurushaho kunoza umurimo. Agira ati “Aya mahugurwa aradufasha gukomeza kunoza ibyo dukora, nubwo turi indashyikirwa ariko ntabwo twakwirara ahubwo turabikangurira n’abandi bajye bakora neza.”

AGESPRO Security imaze imyaka 20 muri serivisi zo gucunga umutekano, ikoresha abanyamwuga bagera ku 1854, barimo abagore 228. Ikigo gikorera ku masite agera kuri 500 mu gihugu hose. Aya masomo nyongerabumenyi yahawe abakozi 600. Ubuyobozi buvuga ko butegura imfashanyigisho ikubiyemo amasomo atandukanye ku buryo izahabwa abakozi bose, abatahawe amahugurwa uyu munsi bakazayahabwa mu kazi.

Rwanyange Rene Anthere

Be the first to comment

Leave a Reply

Your email address will not be published.


*