Gisagara: Inshuti z’umuryango zifasha mu guhosha amakimbirane mu miryango

Bamwe mu batuye mu murenge wa Musha mu karere ka Gisagara, bishimira uruhare rw’incuti z’umuryango mu kurwanya no gukemura amakimbirane no kurwanya ihohoterwa bikorerwa mu muryango. Hari imiryango yari yarananiranye ariko ikaba yarahindutse babifashijwemo n’inshuti z’umuryango.

Aganira n’umunyamakuru ukorana na Pax Press (Umuryango w’Abanyamakuru baharanira amahoro) dukesha iyi nkuru, Mukeshimana Annonciata utuye mu kagari ka Kimana mu murenge wa Musha, yavuze ko inshuti z’umuryango zamukemuriye ikibazo yari afitanye n’umugabo we wamuharitse, agashaka no kumwambura uburenganzira ku mutungo ndetse akanamuhohotera.

Agira ati “baramfashije baraza babwira umugabo ngo niba yaranyanze akaba atagishaka kubana nanjye, nagende yiyubakire indi nzu abanemo n’uwo mugore njyewe andekere mu nzu twarimo n’umwana wanjye. Ubu ndatekanye nta kibazo mfite ndetse yashatse no kujya aza kumpohotera twahura agashaka kunkubita baramwiyama ngo niba yaranyanze nareke kumpohotera ntabwo yongeye.”

Sendegeya Jean Nepomscène umwe mu nshuti z’umuryango utuye mu mudugudu wa Nyabiduha mu kagari ka Kimana, avuga ko mu bibazo bakunze kwakira kandi bakanakemura ahanini bishingiye ku mitungo.

Akomeza avuga ko kubera ko baba baturanye nabo bamenya byihuse ibibera mu ngo zo mu mudugudu wabo, bakihutira kubikemura, ababananiye babakorera raporo bakabimenyesha ubuyobozi bw’akagari na bwo bukabafasha.

Agira ati “hari ubwo umwe mu bashakanye adusanga akatugezaho ikibazo afite tugahita tubasanga abadukundiye bakatwakira, bakatwumva, tukabaganiriza, tuhava ikibazo cyabo gikemutse. Ariko hari n’abanga kutwakira, icyo gihe ibibazo byabo tubishyikiriza akagari. Twari dufite imiryango itanu ibanye nabi, ine yemeye guhinduka, ubu ibanye neza; na ho umwe wo waratunaniye bitabaza inkiko birangira banatandukanye.”

Kugirirwa Ikizere

Niyonizeye Francine na we ni umwe mu ncuti z’umuryango; avuga ko abaturage bamaze kubagirira ikizere kuko abafite ibibazo baza kubishakira mu rugo kugira ngo babasure bumve ikibazo cyabo.

Agira ati “akenshi usanga abagabo ari bo bafite amakosa aho usanga imitungo bayisahura bayijyana mu buraya, ugasanga abana babayeho nabi umugore akaza kuduhamagara tukabafasha tukabereka icyo amategeko avuga ku mitungo y’abashakanye. Ubundi urebye ihohoterwa ryiganje hano ni irishingiye ku micungire y’umutungo hagati y’abashakanye.”

Tumusifu Jérôme, Umunyamabanga Nshingwabikorwa w’Umurenge wa Musha, mu karere ka Gisagara, avuga ko Inshuti z’umuryango zagize uruhare runini mu kugabanya ihohoterwa rikorerwa mu ngo.

Agira ati “Amakimbirane ya hato na hato yabonekaga mu miryango, yabaga ashingiye ku busa, ariko binyuze mu biganiro bagirana n’imiryango irimo amakimbirane, ari na yo abyara ihohoterwa, byagize umumaro munini kuko byatumye umubare w’ingo zari zibanye nabi ugabanuka, bigatuma umuryango uba mwiza binyuze no muri gahunda z’umugoroba w’ababyeyi banagiramo uruhare. Inshuti z’umuryango zifite akamaro kanini kandi gakomeye mu kubaka umuryango”

Umurenge wa Musha ugizwe n’imidugudu 42, harimo Inshuti z’umuryango 84. Mu mwaka wa 2018/2019, hari imiryango ibanye nabi igera kuri 214, iyamaze guhinduka ikaba ibanye neza ni 81. Kugeza ubu mu Rwanda hose harabarurwa inshuti z’umuryango zigera ku bihumbi 30.

Inshuti z’umuryango ni urwego rwashyizweho mu 2015 na Minisiteri y’Uburinganire n’iterambere ry’umuryango ifatanije na Komisiyo y’Igihugu y’abana mu rwego rwo gufaha umuryango gutera imbere no kwimakaza uburere bwiza bw’abana n’umuco wo kuganira mu muryango.

Ubwanditsi

Be the first to comment

Leave a Reply

Your email address will not be published.


*