Bugesera: Ababyeyi basibya abana ishuri bafatiwe ingamba zikarishye

Abana bafatiwe mu isoko rya Bugesera barimo kuganirizwa (Ifoto/Cypridion)

Mu gihe mu karere ka Bugesera hakomeje kugaragara umubare munini w’abana bata ishuri, hatangijwe umukwabu wo gushakisha no gufata abana bataye amashuri, ndetse no guhangana n’abasiba ishuri uko bishakiye bajya mu masoko no mu yindi mirimo.

Umukwabu wo guhangana n’abana bata ishuri, wakozwe ku wa gatatu tariki ya 25 Nzeri 2019, utangirizwa mu isoko rya Nyamata mu murenge wa Nyamata, aho abana 36 ari bo ku ikubitiro bafatiwe muri iri soko. Abo bana barimo abasanzwe biga ndetse n’abatiga.

Abana bafashwe bavuga impamvu zitandukanye zatumye baza mu isoko, zirimo izo gushaka ibikoresho abandi bakavuga ko bari bwige ikigoroba.

Ubwo twabasangaga ku murenge wa Nyamata aho bari bahurijwe, umwe mu bana ufite imyaka 12, yagize ati “Njye nagombaga kwiga ikigoroba, ni yo mpamvu naje mu isoko nshoye inkoko ngo mbone uko ngura inkweto nzajya nambara.”

Mugenzi we na we, tutashatse kuvuga amazina ye, yagize ati “ntabwo ari ugusiba, nari naje gushaka ibikoresho by’ishuri, ni bwo bamfashe, ariko nari bwige ikigoroba.”

Nyamara ariko nubwo aba bana bavuga ibi, harimo n’abataye ishuri kubera impamvu zitandukanye, zirimo n’ibibazo byo mu miryango bavukamo.

Umwe mu babyeyi twaganiriye witwa Uwizeyimana Yozefa, ntahabanya n’ibivugwa n’aba bana, gusa akemera ko gusibya abana ishuri ari amakosa, kandi atazongera kubaho. Agira ati “ntabwo kwari ugusiba, bari kwiga ikigoroba, ariko tugiye gukoresha uburyo ababyeyi ari bo bazajya baza kugura ibikoresho mu isoko, aho kugira ngo basibye abana ishuri.”

Umunyamabanga Nshingwabikorwa w’Umurenge wa Nyamata, Mushenyi Innocent, avuga ko bimwe mu bihano bizahanishwa ababyeyi basibya abana babo ishuri ndetse n’abaribakuramo, harimo n’igifungo.

Akomeza avuga ko ubuyobozi bwahagurukiye iki kibazo bwivuye inyuma. Agira ati “twahagurutse nk’ubuyobozi n’izindi nzego, ntabwo tugomba kwihanganira ababyeyi  basibya abana ishuri. Bimwe mu bihano bazahabwa harimo n’igifungo; nibumve ko gusibya umwana ishuri ari ukumudindiza, kandi tugomba kurerera igihugu.”

Nyuma yo kubahuriza ku biro by’umurenge wa Nyamata, ababyeyi bagiranye amasezerano n’ubuyobozi ko nibyongera kubaho hazafatwa izindi ngamba.

Umukozi w’akarere ka Bugesera ushinzwe amashuri y’inshuke abanza n’ayisumbuye, Niyigena Albert, mu kiganiro n’Ikinyamakuru Panorama, yadutangarije ko guhera ubu nta mwana ugomba kujya mu isoko mu bihe by’amasomo, kandi Umubyeyi uzabirengaho akohereza umwana ku isoko azabihanirwa n’amategeko.

Agira ati “tugiranye amasezerano n’ababyeyi tubasubiza abana babo, uzabirengaho akongera gusibya umwana, ntabwo tuzamwihanganira, tuzanabahana.”

Imibare itangwa n’Akarere ka Bugesera, igaragaza ko kwitabira kujya kwiga uko bikwiye biri ku gipimo cya 93 ku ijana, bisobanuye ko hari 7 ku ijana batitabira ishuri uko bikwiye, ari na yo mpamvu hafashwe ingamba nk’izi zo gushakira abana ahantu hose hashoboka, abananiranye bakajyanwa mu bigo byakira inzererezi.

Cypridion Habimana

Be the first to comment

Leave a Reply

Your email address will not be published.


*