Urubyiruko rufite umukoro wo gutwara urumuri rw’ubumwe bw’Abanyarwanda

Urubyiruko rwitabiriye umunsi mpuzamahanga w'amahoro rwahawe umukoro wo gutwara urumuri rw'ubumwe bw'abanyarwanda babumbatira Ndi Umunyarwanda (Ifoto/Everyne)

Ni umunsi wizihizwa ubusanzwe ku wa 21 Nzeri buri mwaka, ku rwego rw’Isi; mu Rwanda ukaba wizihijwe ku wa 27 Nzeri 2019, ufite insanganyamatsiko igira iti: “Twara Urumuri”. Urubyiruko rwawitabiriye mu Ngoro y’Inteko Ishinga Amategeko, rwahawe ubutumwa bwo gutwara urumuri rugakomeza igihango cy’ubunyarwanda.

Urumuri abanyarwanda bakongeje mu gihe cyatambutse, nirwo abariho ubu by’umwihariko urubyiruko, bakwiye gutwara nk’umurage ukazashyikirizwa n’abazabakomokaho.

Ibi bazabifashwamo n’abamaze gusobanukirwa agaciro k’ubumwe bw’Abanyarwanda, na buri wese wiyumvamo indangagaciro yo kuba yabiharanira. ‘Abarinzi b’igihango’ ni abaza kw’isonga mu kuberekera uburyo bishoboka, nk’uko byagarutsweho n’umwe muri bo.

Mudenge Boniface, yagize ati “Ubumwe bwacu buraharanirwa kandi burashoboka hamwe no kwambara ubumuntu, by’umwihariko ubunyarwanda. Bidufasha kurenga ibikomere by’amateka tugashyikira ubumwe n’ubwiyunge.”

Yakomeje asaba urubyiruko nk’abagize umubare munini w’abanyarwanda, kuba ‘abatwararumuri’ birinda mu mibereho yabo ya buri munsi kuvuga indimi ebyiri.

Ati “Mureke ‘Ndi Umunyarwanda’ ibe mu mitima yacu; bizadufasha kwema, bityo tubashe gufasha n’abandi kwigobotora amateka mabi.”

Urubyiruko kandi rwibukijwe kugira ubuhanga, ubushishozi no gucukumbura kugira ngo amahoro n’agaciro k’Abanyarwanda bitazahungabana. Ahubwo bagatwara urumuri biziguye baharanira amahoro kubw’ahazaza heza habo.

Gukomeza kubaka ubumwe bw’Abanyarwanda byashimangiwe n’abitabiriye kwizihiza Umunsi Mpuzamahanga w’Amahoro, bahagarariye imiryango itegamiye kuri Leta.

Urubyiruko rwibumbiye mu muryango w’urubyiruko rwisunze Mutagatifu Karoli Lwanga (Ifoto/Everyne)

Padiri Iyakaremye Theogene, uhagarariye AJECL (Umuryango w’urubyiruko rwisunze Mutagatifu Karoli Lwanga); yagize ati “Icyo nisabira urubyiruko ni ukwifuza kugira umutima ufunguriye abanyarwanda, cyanecyane abarimo kubyirukira hanze. Umutima uzatuma twongera amahirwe yo kugira amahoro arambye, bityo ubuvandimwe bukazongera bukabaho.”

Ibi yabisobanuye nko kwizitura ku mateka ahanini yafungaga ibitekerezo bya bamwe kubw’uburere bwahawe urubyiruko, ubu bikaba ahubwo bikwiye rugira ubwisanzure mu kwihitiramo amateka noneho ababereye ndetse no kuyasangiza abandi.

Gukomeza gusigasira ibyagezweho

Kwizihiza Umunsi Mpuzamahanga w’Amahoro byahuriranye n’igihe cy’imyaka 25 Abayarwanda bamaze mu rugendo rw’ubumwe n’ubwiyunge, nyuma ya Jenoside yakorewe Abatutsi mu 1994.

Uwashema Annet, umwe mu rubyiruko rwitabiriye uyu munsi, yagaragaje ko gusigasira ibyagezweho ari umukoro batahanye nk’abafite imbaraga zo gukomeza kubaka u Rwanda.

Ati “Nitwe bireba koko kandi tuzanabishobora hamwe n’imbaraga zubaka, urubyiruko tuzakomeza kwigiramo ndetse biri mu myanzuro twafatiye mu kwizihiza uyu munsi twemera ko izagerwaho.”

Perezida wa Komisiyo y’Igihugu y’Ubumwe n’Ubwiyunge, Musenyeri John Rucyahana (Ifoto/Everyne)

Agaragaza ibyo U Rwanda rwagezeho muri iyo myaka yatambutse, Perezida wa Komisiyo y’Igihugu y’Ubumwe n’Ubwiyunge, Musenyeri John Rucyahana, yasobanuye ko byose Igihugu kibikesha kwimakaza ubunyarwanda.

Yagize ati “Byinshi byagezweho muri iyi myaka bishingiye ku kwimakaza ubunyarwanda, no komora ibikomere by’amateka mabi y’amacakubiri yagejeje u Rwanda ku icuraburindi rya Jenoside yakorewe Abatutsi mu mwaka wa 1994.”

Umunsi Mpuzamahanga w’Amahoro wizihijwe ku rwego rw’Isi ku wa 21 Nzeri 2019, wibanda ku mihindagurikire y’ikirere igamije amahoro. U Rwanda rukaba rwawizihije ku nshuro ya cyenda, nk’uko watangiye kwizihizwa mu mwaka wa 2011; bitangijwe na Komisiyo y’Igihugu y’Ubumwe n’Ubwiyunge.

UMUBYEYI Nadine Evelyne

Be the first to comment

Leave a Reply

Your email address will not be published.


*