Bugesera/Kamabuye: Ubushimusi bw’inka bushobora kubaca ku gutunga

Abatuye mu murenge wa Kamabuye mu karere ka Bugesera, baratabaza nyuma yo kubona ko ubushimusi bw’inka bukomeje nubwo hari harafashwe ingamba zo kuraza inka mu biraro rusange, ikibazo gikomeye ni uko na ho abashimusi bazisangamo.

Ikibazo cy’ubushimusi bw’inka, ni kimwe mu bibazo by’ingutu ukigera mu murenge wa Kamabuye mu karere ka Bugesera abaturage bagusanganiza, bavuga ko byageze ku rwego rukomeye.

Abaturage bavuga ko ubusanzwe ubu bujura bwari buhari, biza kugera ubwo hafatwa gahunda yo kujya baraza inka mu biraro rusange aho hari abazirarira, nyamara ariko ngo ibi ntibyacitse kuko abajura bazisanga muri ibyo biraro bakaziba.

Umuturage utashatse ko tuvuga amazina ye, yagize ati “twazijyanye mu biraro rusange tuzi ko zitazongera kwibwa, none turabona byananiranye, kuko ubu n’izo twari dusigaranye tugiye kuzigurisha rwose.”

Mugenzi we nawe twasanze mu kagari ka Kampeka, avuga ko batazihanganira guhora bibwa inka. Uyu twamusanze ikiraro ke nta nka zirimo, avuga ko yazigurishije kubera kwanga ko zibwa agahomba.

Agira ati “ntubona kiriya kiraro ko nta nka iherukamo, banyibiye iya mbere mu kiraro rusange, mbonye ukuntu na bagenzi banjye barimo kuzibiba, mfata ikemezo cyo kuzigurisha izari zisigaye kuko yari iya kabiri nibwe. Ibi rero byatumye ducika intege zo korora.”

Aba baturage bakomeza bavuga ko ubundi inka zabo zajyaga zishimutwa zikajyanwa i Burundi, kubera ko uyu murenge unahana imbibi n’igihugu cy’u Burundi, nyamara ariko kuri ubu bavuga ko ngo hari amamodoka arara agenda ijoro, bakeka ko inka zishimutwa zaba zibagwa bagatwara inyama. Barasaba ko uwajya afatwa yibye yahanwa ku buryo bwihanukiriye.

Umusaza twaganiriye, agira ati “twebwe ikibazo gikomeye dufite ni icy’ubujura bw’inka, akaba ari wo mutekano tubuze inaha. Twifuza ko uwajya afatwa, bajya bamuhana bihanukiriye n’abandi bakaboneraho.”

Umunyamabanga Nshingwabikorwa w’Umurenge wa Kamabuye, Murenzi Jean Marrie Vianney, avuga ko ubuyobozi bwahagurukiye ubu bujura, aho iyo inka yibiwe mu gikumba rusange abaraye irondo kuri icyo gikumba bayiriha.

Agira ati “dukurikije uko mbere byari bimeze zitarajyanwa mu bikumba rusange, tubona ubu byaragabanutse, gusa ariko koko hari izikibwa. Zimwe mu ngamba ni uko iyo inka yibwe, abaraye izamu aho nibo bayiriha; gusa nanone dufite ikibazo cy’abagabo usanga biyibisha inka zabo bagamije kutazisangira n’abo bashakanye kubera amakimbirane baba bafitanye mu miryango, ariko nabyo twarabihagurukiye.”

Murenzi akomeza avuga ko uretse izi ngamba zo kurihisha, mu guca ubujura mu murenge wa Kamabuye, kuri ubu wafashe gahunda y’uko abaturage bagomba kujya bavuga abo bakekaho ko ari abajura.

Agira ati “Dusaba abaturage kutubwira abo bakeka ko ari abajura kabone nubwo baba batafatiwe mu cyuho. Abo tubajyana muri taranziti tukabaha amasomo bakanadufasha gufata abajura kandi ibi ni ibintu dukomeje gukora.”

Ku kibazo cy’amamodoka agenda nijoro abaturage bakeka ko yaba atwaramo inyama z’inka zibwe, ubuyobozi bw’umurenge busaba abaturage kujya batanga amakuru kuyo baketse, kugira ngo ifatwe isakwe, kuko muri uyu murenge hari na sitasiyo ya Polisi.

Iki kibazo si mu murenge wa Kamabuye gusa gikunze kugarukwaho, kuko no mu yindi mirenge igize akarere ka Bugesera, abaturage bakomeje gutaka ubujura, bikaba bisaba ko ubuyobozi burushaho gukaza ingamba kuko bikomeje gutya bishobora guca intege aborozi.

Habimana Cypridion

Be the first to comment

Leave a Reply

Your email address will not be published.


*