Isabukuru nziza y’amavuko kuri Perezida Paul KAGAME

Perezida Paul Kagame yujuje imyaka 62 y'a,mavuko 23/10/1957-23/10/2019

Ndagira nsanze naseruka,

Njye Nyir’uruhanga rw’umuhago,

Nyirimpesha y’Intambwe idasobanya

N’umuriri w’intore intoranywa

 

Ntangiye mpunga mu bisigo.

Ndumva Inganzo inkirigita

Mbwire mwese munyumva

Mwe ntore nziza muri hano

Nabo hirya nkumburwa

 

Nti mbese mwiriwe?

Ndabona ukwezi izuba ryejeje

Ndabona ukwezi kumuritse

Mazi umucyo utura mu misozi

No mu bishanga harabona

 

Dore Ukwakira turakize.

Dukize neza mbega we!

Intwari yacu yongeye

Rugira ayitiza ubushobozi

Bwo kurebera u Rwanda ibikenewe

 

Ndavuga intwari nziza byahamye

Perezida w’u Rwanda KAGAME PAUL.

Isabukuru nziza Nshongore

Manzi nziza izira ikizizi

Kuri izo nkingi horana intsinzi

 

Kirezi kiza kizira inenge

Reka ngukeshe bishyire kera

Kuri iyi tariki ni wowe simbi.

Wowe Rucyera Ibakwe bakwita

Kuri Izi ntambwe horana Imana

 

Wowe mubyeyi utagira uko usa

Wowe utubambatirira imfubyi

Wowe uzikikirira mu cyansi

Niwowe nshungu muri iri cumbi.

Ni wowe nshongore baririmba

 

Wowe amahanga ahora avuga imyato

Abanyarwanda watugize abasirimu

Ukaduha ijambo aho tugeze hose

Isabukuru nziza mfura y’u Rwanda.

Urubyiruko twese turagushima

 

Reka abasaza bararimba

N’abakecuru bo ku kabando

Dore abagore ngo baragutashya

Abo mu nteko no mu nzego

Ngo Impundu ziri kuvuga urwunge

 

23 Ukwakira yibarutse Intwari.

Reka mbicishirize ni byinshi

Nimubishaka muzansanga

I Huye aha ku Gicumbi

Ntavuga byinshi bikabacika

 

Ndabona umunsi ugana guca ikibu

Kandi aho nsha barancaka

Ngo mbavomere bace ingando.

 

Yari umusizi, usiga, aseka adasobanya amagambo,

Musangira akabisi n’agahiye mususurutse mu Rwagasabo

Umuhanzi w’umuhanga,

Rwamucyo rw’inkindi

NSENGIMANA Yohani

 

Isabukuru nziza y’amavuko kuri Nyakubahwa Perezida wa Repubulika Paul KAGAME

2 Comments on Isabukuru nziza y’amavuko kuri Perezida Paul KAGAME

Leave a Reply

Your email address will not be published.


*