Musanze: Abo amateka agaragaza ko basigajwe inyuma barasaba akarere kubafasha gusubirana ubutaka bahugujwe

Zimwe mu nzu zubakiwe abo amateka agaragaza ko basigajwe inyuma n'amateka mu murenge wa Nyange, akarere ka Musanze (Ifoto/Rene Anthere)

Abo amateka agaragaza ko basigajwe inyuma batuye mu murenge wa Kinigi n’uwa Nyange yo mu karere ka Musanze, bavuga ko bahawe ubutaka kugira ngo babubyaze umusaruro ariko bakabuguzwa, akarere na ko kakabashyira mu keragati.

Aba baturage batujwe mu Kinigi abandi batuzwa muri Nyange bakuwe ku ishyamba ry’Ibirunga aho bari batunzwe n’ubuhigi ndetse no kubumba. Bishimira ko Leta yabatuje hamwe n’abandi baturage ariko babangamiwe n’ubutaka buri hafi kungana na hegitari bahugujwe buri muri santeri ya Kinigi. Bavuga ko kandi basabwa ingurane y’ubutaka batujweho, nyamara Leta ariyo yabatuje.

Munyagahinga François utuye mu mudugudu wa Bazizana, Akagari ka Muhabura, Umurenge wa Kinigi, avuga ko yatujwe muri uwo mudugudu akuwe ahandi ariko afite ikibazo cy’uko yakwa ingurane y’ubutaka nyamara atari we wahatujwe.

Agira ati “Singira umurima wo guhinga, icyo bampaye ni ikibanza ntuyemo gusa. Baransaba ingurane se nayikurahe? Leta yadutuje ni yo yagombye kuyidutangira!”

Munyemana Daniel avuga ko hari abo leta yagereye n’abo itagereye. Agira ati “Nyakatsi yaracitse biba ngombwa ko twese dutura mu midugudu. Byabaye ngombwa ko batuzana hano ariko hari abo yagereye abandi ntiyatugerera. Nta butaka dufite bwo gutangaho ingurane kuko iyo tuza kubugira tuba twarabutanze.”

Bizimana Emmanuel atuye mu murenge wa Nyange, Akarere ka Musanze. Avuga ko kuva avutse bari batunzwe no guhiga no kurya ubuki bahakuraga mu biti. Agira ati “Badutuje mu mudugudu duturana na bagenzi bacu batasigajwe inyuma n’amateka. Twabaye inshuti zikomeye. Ubu namenye guhinga ariko ntunzwe no guca incuro. Aho ntuye nahahawe na Leta ariko mfite ikibazo cy’uko uwo duturiye mu butaka adusaba kumugerera kandi ari Leta yadutuje.”

Akarere gatungwa agatoki

Si ikibazo cyo gusabwa ingurane gusa kuko aba amateka agaragaza ko basigaye inyuma batuye mu mirenge ya Kinigi n’uwa Nyange, bavuga ko bahawe ubutaka buri hafi kungana na Hegitari imwe hafi ya santeri y’ubucuruzi ya Kinigi ariko hakazamo undi muntu akabutwara n’ubu akarere kananiwe kubakemurira ikibazo.

Nyirabahutu Cecile atuye mu murenge wa Nyange, Akagari ka Kabeza. Avuga ko yatujwe avuye mu kagari ka Ninda aho yari atuye muri Pariki y’Ibirunga batunzwe n’ubuhigi. Nyuma baje gutuzwa hamwe n’abandi banyarwanda, ndetse banahabwa ubutaka bwo kubyaza umusaruro.

Agira ati “Twatujwe neza ariko dufite ikibazo cy’ubutaka twahugujwe kandi abayobozi guhera mu kagari, umurenge n’akarere bakizi. Hari rwiyemezamirimo wigabije ubutaka twahawe ariko akarere kananiwe kubudusubiza. Twaburanye na Eric wabubohoje turamutsinda ariko ntibarabudusubiza.”

Nyirabahutu avuga ko ubutaka babuhawe kugira ngo bubafashe kwiteza imbere babubyaza umusaruro ariko batarabona uburenganzira, kuva mu kwezi kwa Werurwe 2019. Ati “Ni ikibazo kitambitse mu iterambere ryacu.”

Munyaziboneye Jean Baptiste ni Umuyobozi w’Umudugudu wa Nyabutaka, mu kagari ka Ninda. Avuga ko bamwe mu bo amateka agaragaza ko basigajwe inyuma hari abamaze guhindura imyumvire ariko abandi batarahinduka. Ku kibazo k’ingurane basabwa agira ati “hari bamwe ubuyobozi bwagereye mu mirima ariko hari abandi bataragererwa. Icyo abaturage bakora ubu ni ukwihangana bagategereza icyo ubuyobozi buzakora.”

Ubuyobozi bubivugaho iki?

Umuyobozi w’Akarere ka Musanze, Madamu Nuwumuremyi Jeannine, ku bijyanye n’ibi bibazo avuga ko ari mushya atarabimenya neza ariko Abanyamabanga Nshingwabikorwa b’imirenge ya Nyange na Kinigi baduhaye ukuri kwabyo.

Rudasingwa Agire Fred, Umunyamabanga Nshingwabikorwa w’Umurenge wa Kinigi, avuga ko ikibazo cy’ubutaka akizi, ahubwo ubwo na Minisitiri w’Ubuhinzi n’ubworozi yasuraga uwo murenge yasabye akarere ko kafatanya n’izindi nzego kakakirangiza.

Yagize ati “Ubu butaka bamwe mu bagize Komite y’abo amateka agaraza ko basigajwe inyuma bagurishije ubutaka bwabo uwitwa Eric na abugisha abandi bantu babiri. Nyuma basanze ubutaka Eric yarabwiyandukujeho mu buryo bwemewe n’amategeko. Uwo Minisitiri yasuraga uyu murenge yasabye Akarere ko kafatanya n’izindi nzego ikibazo kikarangira burundu ariko ntikirarangizwa, turacyategereje.”

Umunyamabanga Nshingwabikorwa w’Umurenge wa Nyange, Nsengiyumva Telesphore, ku kibazo kijyanye n’uko aho abo amateka agaragaza ko basigajwe inyuma batujwe, Leta yatanze ingurane ku butaka batujweho ariko ahakiri ikibazo bazabikurikirana bikanozwa.

Agira ati “Uburyo batuzwa ni kimwe n’uko dutuza abandi batishoboye. Iyo adafite ubutaka bw’ingurane Leta ni yo ibutanga ariko ikibazo cy’uko bakwa ingurane nticyari cyakatugezeho, ariko turaza kugikurikirana tugikemure.”

Mu murenge wa Nyange habarurwamo imiryango 150 y’abo amateka agaragaza ko basigajwe inyuma batujwe mu midugudu ine, na ho mu murenge wa Kinigi ho habarurwa imiryango igera kuri 19 bose bakaba baturanye n’abandi baturage kandi barinjijwe muri gahunda za Leta.

Rwanyange Rene Anthere

Be the first to comment

Leave a Reply

Your email address will not be published.


*