Musenyeri Birindabagabo yamuritse igitabo kigereranya ibiyobyabwenge na Goliyati “Goliyati araguye”

Musenyeri Birindabagabo Alexis avuga ko ibiyobyabwenge ari nka Goliyati na ho Dawudi wamutsinze akamugereranya n'u Rwanda (Ifoto/Munezero)

Kuba igitabo cyariswe “Goriyati araguye” bifitanye isano no kwerekana ko n’ubwo ibiyobyabwenge ari ikibazo gikomeye ariko gishobora gutsindwa nk’uko igihangange kivugwa muri Bibiliya cyahangamuwe n’umusore witwa Dawidi kandi mu gihe gito. Ibiyobyabwenge na byo n’ubwo ari ikibazo byahangamurwa mu gihe gito.

Ku wa Gatanu tariki ya 29 Ugushyingo 2019, mu Isomero rya Kigali ku Kacyiru habereye umuhango wo kumurika ku mugaragaro Igitabo cyiswe “Goliyati araguye” cyanditswe na Musenyeri Birindabagabo Alexis.

Musenyeri Birindabagabo avuga ko icyo gitabo ari urugendo rwamutwaye imyaka cumi n’ine, kuko yarutangiye mu 2003 nyuma yo kubona umusore wishwe na bagenzi be bane bafashe ku biyobyabwenge.

Ahandi avuga yakuye igitekerezo ni ukwitabira ubukangurambaga bwa Madamu Jeanette Kagame bwo gukangurira umuntu kwita ku mwana wese nk’uwe ati “Nasanze kwita ku mwana wese nk’uwawe ari ukumurinda ibimubangamiye byose. Nemera ko ibiyobyabwenge twabica mu Rwanda burundu kandi mu gihe gito. Ibindi twahanganye na byo twarabitsinze, na byo tuzabitsinda.”

Musenyeri Birindabagabo agereranya ibiyobyabwenge na Goliyati, u Rwanda akarugeranya na Dawidi. Yagize ati “ni ukuvuga ngo arimo aragwa ariko ntiyariyagera hasi. Buriya iyo Goliyati aza kwitura hasi Dawidi ntamuhorahoze yanakoresheje inkota ya Goliyati. Dawidi nta n’inkota yari afite iyo atamuhorahoza byashobokaga ko Goliyati yongera akabyuka agakomeza noneho agakora amarorerwa ariko ni ngombwa ko Goliyati yitura hasi, agacibwa igihanga ibye bikarangira.”

Aha nanone u Rwanda arufata nka Dawudi uvugwa muri Bibiliya nk’igihugu kimaze kwiyubaka mu gihe nyuma ya Jenoside hari abumvaga ko cyasenyutse burundu, avuga ko guhashya ibiyobyabwenge ari urugamba kandi hari icyizere ko bizacika.

Nyuma muri gahunda yo guhangana n’ibiyobyabwenge, hakurikiyeho gahunda y’ijisho ry’umuturanyi mu 2006, avuga ko yatanze umusaruro kuko hari abahisemo kureka ibiyobyabwenge kandi ubu bakaba bameze neza.

Musenyeri Birindabagabo avuga ko bimwe mu bikubiye mu gitabo “Goliyati araguye” ari ugusobanurira abantu ibiyobyabwenge icyo ari cyo. Yagize ati “bisa n’igikoko abantu batazi kigenda gitwara abantu ugahura n’umuntu aganya ngo igikoko cyantwariye abana ariko ntibakivuge izina ngo bagihige bagifate bakice.”

Intego ye ni uko ibiyobyabwenge bivugwa mu rwego rwo kubyamagana. Depite Theogene Munyangeyo nawe yavuze ko kuva yagera mu Nteko aribwo yabonye ubukana bw’ibiyobyabwenge mu baturage kuko yabegeraga.

Ashima ko kiriya gitabo kizafasha mu guhangana nabyo kandi ngo abashinzwe kubirwanya biteguye gukorana kugira ngo ibiyobyabwenge bicike.

Commissioner of Police Munyambo uyobora imikoranire ya Polisi n’abasivili (Community Policing), yasabye abantu bose kutarangara ngo abacuruza ibiyobyabwenge ngo babace mu jisho.

Ati: “Aho bituruka muhaterezeho kuko ari icyuho kandi uru rugamba ni urwacu mu kururwana. Mu mibare ikunda gutangazwa na Polisi y’u Rwanda yerekana ko ihohotera rikorwa mu ngo akenshi rifitanye isano no kunywa ibiyobyabwenge. Nubwo ikiri hejuru wiegue gukomeza kubirwana kandi biza cika ntakabuza.”

Umunyamabanga uhoraho muri Minisiteri y’ubutegetsi bw’igihugu Samuel Dusengiyumva yavuze ko bigoye gushaka gukura abaturage mu bukene ariko hari abandi babaswe n’ibiyobyabwenge.

Ati: “Muri Minaloc tuzabafasha gukorana kugira ngo ibiyobyabwenge bicike. Tumwijeje ubufatanye na Minisiteri kandi tuzagerageza tubahuze n’abo mu nzego z’ibanze kugira ngo mugere kubyo mwiyemeje.”

Dr Patrick Ndimubanzi, Umunyamabanga wa Leta muri Minisiteri y’ubuzima, wari umushyitsi mukuru, yavuze ko igituma ibiyobyabwenge bitarandurwa burundu ari uko nta bufatanye bwa buri wese bugaragara ariko ngo intambwe yatewe mu kubihashya ishimishije.

Munezero Jeanne d’Arc

Be the first to comment

Leave a Reply

Your email address will not be published.


*