Qatar Airways yegukanye 60 ku ijana y’ikibuga mpuzamahanga cy’indege cya Bugesera

Guverinoma y’u Rwanda na Kompanyi y’indege “Qatar Airways” ku wa 9 Ukuboza bagiranye amasezerano y’uufatanye mu ishoramari mu kibuga mpuzamahanga k’indege cya Bugesera. Ayo masezerano agabanyijemo ibice bitatu birimo kucyubaka, kugiramo imigabane no kugikoresha.

Nk’uko tubikesha Umunyamabanga wa Leta muri Minisiteri y’Ububanyi n’amahanga n’ubutwererane, Amb. Nduhungirehe Olivier binyuze ku rubuga rwe rwa Facebook, Qatar Airways yemeye gufata 60 ku ijana by’imigabane muri uyu mushinga, iyi migabane ikaba ifite agaciro kangana na Miliyari 1.3 y’amadolari ya Amerika.

Ikibuga Mpuzamahanga k’indege cya Bugesera gifite ubushobozi bwo kwakira, ku ikubitiro, abagenzi bagera kuri miliyoni indwi ku mwaka, na ho igice cya kabiri kikazuzura gifite ubushobozi bwo kwakira abagenzi bagera kuri miliyoni 14 ku mwaka, biteganyijwe ko bizatangira mu 2032.

Aya masezerano yashyizweho umukono agaragaza imbaraga u Rwanda rwashyize mu guteza imbere ubwikorezi bwo mu kirere binyuze mu mubano w’ubufatanye hagati ya Qatar n’u Rwanda.

Muri Werurwe uyu mwaka nibwo Itsinda ry’intumwa za Qatar, riyobowe na Minisitiri w’Intebe wungirije akaba na Minisitiri w’Ububanyi n’Amahanga, Sheikh Mohamed bin Abdulrahman Al Thani, zagiranye ibiganiro na Leta y’u Rwanda birimo gutera inkunga umushinga wo kubaka ikibuga mpuzamahanga cy’indege cya Bugesera.

Ni mu gihe Leta y’u Rwanda ikomeje gushyira imbaraga mu gushaka amafaranga yo kubaka ikibuga mpuzamahanga cy’indege cya Bugesera, cyatangijwe mu 2017, bikaba byari biteganyijwe ko kigomba kuzura mu 2020.

Inzira y’aya masezerano

Nk’uko tubikesha igihe.com, mu mwaka ushize nibwo byatangajwe ko igishushanyo mbonera cy’Ikibuga Mpuzamahanga k’Indege cya Bugesera, cyavuguruwe hagamijwe kucyagura, kongera ubwiza bwacyo ndetse no kuvugurura imyubakire, hagendewe ku biranga ibibuga mpuzamahanga bigezweho.

Ikemezo cyo gusubiramo igishushanyo mbonera cy’iki kibuga cyatangajwe na Perezida Kagame, mu kiganiro yagiranye n’abanyamakuru ku wa Gatanu tariki ya 14 Ukuboza 2018.

Muri Nzeri 2016, u Rwanda rwari rwasinyanye amasezerano na Sosiyete y’Ubwubatsi yo muri Portugal yitwa “Mota Engil Engenharia e Construcao Africa”, kugira ngo izubake icyo kibuga. Ubwubatsi bw’icyo kibuga bwari bwashyizwe mu byiciro. Icya mbere cyagombaga gutwara miliyoni 418 z’Amadolari ya Amerika, byari biteganyijwe ko kizaba cyuzuye mu Ukuboza 2019.

Nyuma y’icyo kiciro hagombaga gukurikiraho ibikorwa byo kwagura ahamaze gukorwa, byari byaragenewe agera kuri miliyoni 400 z’amadolari ya Amerika; ku buryo cyari gukoreshwa u Rwanda rwakira inama y’Umuryango w’Ibihugu bikoresha icyongereza, Common Wealth, muri Kamena 2020.

Minisitiri w’Ibikorwaremezo, Amb. Claver Gatete, muri Nzeri yabwiye Abadepite ko igishushanyo mbonera kivuguruye kigeze kure, ndetse u Rwanda ruri mu biganiro n’abafatanyabikorwa batandukanye barufasha mu iyubakwa ry’iki kibuga cy’indege.

Amb. Gatete yavuze ko Ikibuga cy’Indege cya Bugesera ari kinini cyane kuko gifite hegitari 2500, bisobanuye ko kiruta inshuro zirenga ebyiri icya Heathrow -gifite hegitari 1,214 cyo mu Bwongereza, kiri mu byakira abagenzi benshi ku Isi.

Ati “Ntabwo dushaka ngo dupfushe ubutaka ubusa, turashaka kubikora mu buryo bwa kinyamwuga bitaba nk’ibindi bibuga by’indege mubona hano ku rwego rwa Afurika ariko twigereranya n’ibindi bibuga by’indege hose ku Isi.”

Hari ibikorwa remezo bizafasha iki kibuga birimo imihanda ikerekezaho nk’uzava kuri Pariki y’Akagera ukigeraho, ndetse ubwo hamurikwaga igishushanyombonera kivuguruye cy’Umujyi wa Kigali, ku wa 4 Ukuboza 2019, hagaragajwe impinduka ku miturire mu gice cya Gahanga, bihuzwa n’ikerekezo kijyanye n’iki kibuga mpuzamahanga k’indege cya Bugesera. Hanatangiye kwagurwa umuhanda Sonatubes-Nyamata na wo uhura n’iki kibuga.

Hari undi muhanda uzava i Masaka ugakomeza ukagera ku kibuga k’indege, kugira ngo hagize ikiba ku muhanda umwe hazabe hari undi wakoreshwa. Ikindi ni uko umushinga wo kubaka iki kibuga uzarangira ibintu byose biri mu buryo, nk’aho amashanyarazi aturuka kuri Nyiramugengeri azaba yagezeyo avuye mu kerekezo cya Mamba-Rwabusoro-Bugesera- Gahanga.

Rwanyange Rene Anthere

Be the first to comment

Leave a Reply

Your email address will not be published.


*