#COVID19: Abacuruzi 44 bahaniwe kuzamura ibiciro by’ibicuruzwa mu mujyi wa Kigali

Minisiteri y’ubucuruzi n’inganda yaciye amande abacuruzi 44 bo hirya no hino mu mu Mujyi wa Kigali bkubera ko bazamuye ibiciro ku bicuruzwa, bitwaje icyorezo cya koronavirusi, COVID-19. Abaciwe amande kubera kongera ibiciro bose hamwe batanze agera kuri 3.810.000Frw. Bamwe bahise basubiza abaguzi amafaranga bari barengeje ku biciro byashyizweho. Ku itariki ya 19 Werurwe 2020 amande tatanzwe agera kuri 2.130.000Frw.

Mu gace k’ubucuruzi ka Nyabugogo ahazwi nko kwa Mutangana no hirya no hino mu Mujyi wa Kigali, ni ho abakozi ba Minisiteri y’Ubucuruzi yatahuye abacuruzi bazamuye ibiciro ku muceri wa Tanzania ndetse n’isukari. Bamwe muri aba bacuruzi batahuwe kubera inyemezabwishyu bahaye abaguzi.

Abaguzi baganiriye na RBA dukesha iyi nkuru, bavuga ko abacuruzi babahenda, aho usanga nk’umuceri uturuka muri Tanzania waguraga amafaranga y’u Rwanda ibihumbi 26 ubu hari abawugurisha ibihumbi 31.

Muhongayire Nadine yagize ati “Twawuguraga ku bihumbi 26,500 ubu ni 31000, twebwe nk’abaguzi twumvise byazamutse cyane ntabwo tuzi niba ari ikibazo cya koronavirusi, ntituzi niba ariko baba baranguye ku isoko.”

Uwababyeyi Francoise we ati “Muri rusange ibintu byose byaruriye nk’umuceri twaguraga ibihumbi 26, ubu ugeze ku bihumbi 31 mu bindi bisanzwe nk’indimu ikilo twakiguraga 600 none ubu ni 2500.”

Impaka zari zose hagati y’abacuruzi bagaragaweho guhenda abaturage n’ababakoreraga ubugenzuzi. Bavuga ko barangura umuceri wa Tanzania ku mafaranga ibihumbi 29 bakawugurisha ku bihumbi 31.

Nyamara inyemezabwishyu baranguriraho zigaragaza ko baba bawuranguye ku mafaranga ibihumbi 26.

Nyuma baje kwemera amakosa basubiza abakiriya bari bakiri aho amafaranga barengeje ku giciro cyashyizweho ndetse bamwe bemera gucibwa amande.

Umucuruzi witwa Kwizera Jacques yagize ati “Turabyemera bo barenganuye abaguzi ariko twe twumvaga icyo giciro ari cyo twagombaga kugurishaho. Hari bimwe mu byagiye byurira ariko ibyazamuye ibiciro n’abakiriya baguraga.”

Nkurunziza Justin we avuga ko ibyo yari asanzwe acuruza yabigurishije birashira, umuceri akaba yawugurishaga ku mafaranga 26.500 urashira ariko agiye kurangura bamuca amafaranga ibihumbi 29.

Mu bugenzuzi bwakozwe na Minisiteri y’Ubucuruzi n’Inganda yatahuye abacuruzi 43 bakoresha uburiganya burimo guhenda abaturage, kutamanika ibiciro ku bicuruzwa ndetse no kudatanga inyemeza bwishyu ihwanye n’amafaranga abaturage bishyura.

Umukozi muri iyi minisiteri Mukaniyonzima Dative avuga ko abaciwe amande hakurikijwe itegeko rirengera umuguzi ndetse n’itegeko ry’ubucuruzi bw’imbere mu gihugu.

Yagize ati “Aha ngaha bose kuri uyu murongo bicururizaga uko bishakiye ndetse n’ibiciro byo hejuru, ntibagaragaze n’ibiciro abaguzi bakaharenganira.”

Akomeza avuga ko iyo hatabayeho ku manika ibiciro ndetse hakabaho no guhenda abaguzi, amande ava ku mafaranga y’u Rwanda ibihumbi 20 kugera kuri miliyoni 5. Ahanwe hagiye harebwa ikosa ryakozwe bacibwa amande ari hagati y’amafaranga y’u Rwanda ibihumbi 50 na 300.

Ibicuruzwa abaturage bavuga ko byazamuriwe ibiciro birimo isukari, umuceri, akawunga, amavuta yo guteka ndetse n’imbuto. MINICOM ikaba igiye gukomereza uyu mukwabu wo kugenzura abacuruzi ko bubahiriza ibiciro ku masoko yo mu turere hirya no hino mu gihugu.

Rwanyange Rene Anthere

Be the first to comment

Leave a Reply

Your email address will not be published.


*