#COVID-19: ADEPR yagiriwe inama yo kwita ku ntama aho kuzikama muri ibi bihe bikomeye

Muri ibi bihe byo kwirinda ikwirakwiza ry’icyorezo cya Koronavirusi, COVID-19, kimwe n’ibindi bihugu, u Rwanda rwafashe ingamba zo kugabanya urujya n’uruza ndetse n’uko bantu bahura ari benshi. Mu ngamba zafashwe harimo no guhagarika ibiterane n’insengero, abantu bagasengera mu ngo zabo.

Amwe mu madini n’amatorero yafashe gahunda yo gusenga hifashishijwe Radio ndetse na Televiziyo, ubutumwa bashaka bugatangwa.

Bigeze ku ngingo y’amaturo n’icya 10, bamwe mu bayobozi bakuru b’amadini batanze nimero za Konti abakristo bazajya bashyiraho amafaranga ariko bitababujije no kuyanyuza kuri nomero za Telefoni zatanzwe, amaturo n’icyacumi bikanyuzwa kuri Mobile Money.

Mu ibaruwa No 329/2/1.2 yo ku wa 20 Werurwe 2020, Umuvugizi wa ADEPR Rev. Karuranga Ephrem yandikiye abashumba b’indembo bose, yaberekaga uburyo bwo kwakira amaturo muri ibi bihe bidasanzwe.

Muri iyo baruwa Umuvugizi wa ADEPR yatanze uburyo butatu burimo gukoresha udusanduku tuba mu rusengero, gukoresha konti bazahabwa ndetse no gukoresha Mobile Money na Airtel Money ku nomero bagomba kugurirwa n’ubuyobozi bukuru.

Umwe mu bakristo ba ADEPR, Hon Bamporiki Edouard, abinyujije ku rukuta rwe rwa Tweeter, yakebuye ubuyobozi bwa ADEPR abibutsa ko mu bihe bikomeye badakwiye kubeshwa n’intama ahubwo ari umwanya wo kugira ngo bazitunge.

Yagize ati “Mushumba wacu @ADEPR, muri iyi minsi idasanzwe twari dukwiye gutekereza uko abashumba batunga intama, kurusha ko intama zatunga abashumba, kuko nizo zifite intege nkeya. Mubyiteho aho mubona bishoboka, mufashe abakene bo mu itorero ryacu. Tumaze imyaka dutura mukore mukigega.”

Bamwe mu bakristo baganiriye n’Ikinyamakuru Panorama ariko batifuje ko dushyiramo amazina yabo, banenze uburyo Umuyobozi wabo agaragaje imyitwarire muri ibihe bikomereye Abanyarwanda n’abatuye Isi muri rusange, by’umwihariko abakristo ba ADEPR batishoboye. Bavuga ko Itorero ryabo ridakennye ku buryo muri ibi bihe by’amage bakwiye kwaka amaturo, ahubwo bari bakwiye gushishikariza abakristo bishoboye kugoboka abatishoboye.

Umwe muri bo yagize ati “Uku ni ukwikunda, ni ukwirebaho gusa. Yego babona imibereho binyuze mu maturo yacu ariko iki si igihe cyo kuyaka. Ahubwo ubonye iyo basaba abafite uko bameze bagatanga inkunga zo kugoboka abadafite ibibatunga muri iki gihe!”

Undi na we ati “Amaturo n’icyacumi biteganywa na Bibiliya ariko iki si igihe cyo gutanga nomero za Konti ndetse na Telefoni zo kunyuzaho amafaranga. Ese tuzamenya zizacungwa nande? Ahubwo hari hakwiye gukorwa mu kigega tugatangira kugoboka abadashobora kubona ibibatunga muri ibi bihe bikomeye. Abantu barushaho kubona no kumva imbaraga z’itorero.”

Mu minsi yatambutse, Rev. Karuranga yigeze gutangaza ko nibura mu cyumweru cya gatanu baba bageze ku mafaranga y’u Rwanda agera kuri Miliyoni 150 (150.000.000Frw) zikomoka ku maturo. Imibare iheruka igaragaza ko ADEPR ifite abayoboke bagera kuri Miliyoni ebyiri (2.000.000), bivuze nibura buri mukristo aba yaratanze nibura ituro ringana na 75Frw. Magingo aya iri torero ribarizwamo abashumba bakabakaba 500, bahabwa umushahara n’itorero.

Amwe mu makuru Ikinyamakuru Panorama cyahawe n’abakurikiranira hafi ADEPR bigaragara ko abafite imibereho bari muri iryo torero batagera kuri 1/3 ni ukuvuga ko babarirwa mu bihumbi magana atandatu (600.000), kandi ari na bo bafite uruhare runini mu mirimo ikorerwa itorero. Muri aba buri wese atanze nibura 1.000Frw haboneka amafaranga agera kuri Miliyoni 600 (600.000.000Frw) ashobora kugira icyo afasha abatishoboye muri ibi bihe bikomeye.

Binavugwa ko biramutse bidakozwe bityo, habayeho kwitanga muri ibi bihe bikomeye kugira ngo hagobokwe abadafite imibereho muri iki gihe, hatabura nibura miliyoni 150 cyangwa se agakurwa mu isanduku ya ADEPR ariko abo bakristo ntibazagondoze Imana basaba amaramuko, aho kugira ngo hakwe amaturo ajya mu nzego zo hejuru kandi abayoboke batorohewe.

Past. Pascal Habimana, Umukuru w’itorero rya ADEPR muri Paruwasi ya Gasave mu rurembo rw’Umujyi wa Kigali, aganira n’ikinyamakuru The Voice Magazine ku wa 19 Werurwe 2020, yavuze ko icyacumi ari ngombwa ariko amaturo atangwa ari uko abantu bateranye.

Yagize ati: “Nubwo mu itorero rya ADEPR nta tangazo rirashyirwa ahagaragara ryibutsa abakirisitu ko bagomba gukomeza gutanga amaturo n’icyacumi nk’uko bisanzwe, ubwabo barabizi ko nk’icyacumi ari ngombwa, kuko ni kimwe mu biranga umukirisitu mwiza. Gusa amaturo yo atangwa kuko abantu bateranye, mu gihe batateranye ntaryo batanga keretse babikoreye mu matsinda mato.”

Si itorreo rya ADEPR ryonyine ryafashe umwanzuro wo kwaka abayoboke amaturo n’icyacumi hifashishijwe kunyuza amafaranga kuri Konti z’itorero cyangwa kuri telefoni.

Mu itangazo ryavuye mu buyobozi bw’itorero ry’abadivantisiti b’umunsi wa karindwi mu Rwanda, ryo ku wa 19 Werurwe 2020, mu byo bibukije abakristo harimo no gutanga amaturo, hanatangwa Nomero za telefoni zizakoreshwa.

Itorero Evangelical Restoration Church naryo ryatangaje uburyo bushobora kwifashishwa ku basengera muri iryo torero, bohereza amaturo n’icyacumi hakoreshejwe uburyo bw’ikoranabuhanga.

Ambasaderi Olivier Nduhungirehe, Umunyamabanga wa Leta muri Minisiteri y’Ububanyi n’amahanga n’Ubutwererane (MINAFFET), abinyujije ku rukuta rwe rwa Twitter, yasabye amatorero n’amadini kureka gusaba abayoboke amaturo n’icyacumi ahubwo bagashaka uburyo bafasha abayoboke babo batakibona ibibatunga.

Rwanyange Rene Anthere

Be the first to comment

Leave a Reply

Your email address will not be published.


*