Habonetse umubare munini w’abanduye Coronavirus ku munsi umwe, bwa mbere ku Isi

Ishami ry’Umuryango w’Abibumbye wita ku buzima (OMS) ryagaragaje ko kuwa gatatu gusa abantu ibihumbi 106 banduye, naho abandi hafi ibihumbi bitanu barapfa. Ni ubwa mbere kandi handuye abantu bagera kuri uriya mubare mu masaha 24 gusa.

Ishami ry’Umuryango w’Abibumbye wita ku buzima (OMS), ryatangaje ko abandura icyorezo cya Coronavirus ku Isi bageze kuri miliyoni 5,090,642 ariko abandi 2 025 716 na bo bamaze kuva mu bitaro mu gihe 329,754 bamaze gupfa.

Umuyobozi wa OMS, Tedros Adhanom Ghebreyesus, yagaragaje ko biteye impungenge kuba ubwandu bukomeje kwiyongera mu Bihugu biri mu nzira y’amajyambere n’ibifite ubukungu buciriritse.

Ati “Mu masaha 24 hari abantu 106,000 banduye, nibo benshi babayeho mu munsi umwe kuva icyorezo cyatangira. Hafi bibiri bya gatatu ni abo mu bihugu bine!”

Leta Zunze Ubumwe za Amerika nizo zikomeje kuza imbere mu kugira umubare w’abanduye n’abamaze gupfa ku Isi, u Burusiya buri ku mwanya wa kabiri mu banduye kuko ari 308 705, hamaze gupfa 2 972.

Muri Leta Zunze Ubumwe za Amerika, kuri uyu wa Gatatu bapfushije abantu barenga 1400, abandi barenga ibihumbi 22 barandura.

Ibi byatumye abamaze kwandura Coronavirus muri iki gihugu baba 1 593 039, naho abandi ibihumbi 94 941 bamaze gupfa.

Uko icyorezo cyifashe muri Afurika

Ku mugabane wa Afurika wose hamaze kugaragara abantu 97 404 banduye Coronavirus, abamaze gupfa basaga 3 020 naho abakize ni 39 425. Afurika y’Epfo niyo iri imbere mu kugira abafite ubwandu benshi kuko ifite abagera kuri 18 003, abamaze gupfa ni 339. Ikurikirwa na Misiri ubu ifite abamaze gupfa benshi kuri uyu mugabane, kuko bageze kuri 680, naho abamaze kwandura ni 14 229.

Kugeza ubu muri Afurika y’Iburasirazuba Igihugu kiza imbere mu kugira ubwandu bwinshi ni Kenya kuko hamaze kwandura 1 029, hapfuye 50. Tanzania iza ku mwanya wa kabiri, kuko handuye 509 hagapfa 21.

Abantu 320 nibo bamaze kwandura Corona virus mu Rwanda naho abamaze gukira ni 217, muri Uganda hamaze kwandura 264, mu Burundi handuye abantu 42 hapfa umwe naho muri Sudani y’Epfo hamaze kwandura abantu 290 hamaze gupfa bane.

Munezero Jeanne d’Arc

Be the first to comment

Leave a Reply

Your email address will not be published.


*