Gicumbi: Baterwa ipfunwe no kugurira udukungirizo aho buri wese abareba

Ndayambaje Felix, Umuyobozi w’Akarere ka Gicumbi

Bamwe mu baturage bo mu Murenge wa Byumba mu Karere ka Gicumbi, bavuga ko baterwa isoni no kugura udukingirizo aho abandi bababona. Ibi bikaba biri mu bituma bashobora kwishora mu mibonano mpuzabitsina idakingiye, babitewe n’ipfunwe.

Aba baturage biganjemo urubyiruko bavuga ko batinya kugura udukingirizo muri butike ndetse no kujya kudushaka ku bajyanama b’ubuzima, ngo kuko baziranye bakaba bikanga kutagirirwa ibanga.

Mutuyimana Consolée ni umwe muri bo. Yagize ati “Aho udukingirizo tuboneka hateye isoni iyo bakubonye ni ubwo wagakoraho gusa, nkatwe b’abakobwa cyangwa se undi wese bahita bavuga ko uri indaya.”

Yongeyeho ko bakeneye kuba bafashwa, bagashyirirwa udukingirizo ahantu bajya batubona ku buryo bworoshye.

Bizimana Patrick, ukora akazi ko gutwara abagenzi kuri Moto agira ati “Nanjye kukagura muri butike byangora. Ndubatse urumva ko umugore wanjye amenye ko naguze agakingirizo ntiryarema, rero gushyiraho uburyo bwo kutubona bitagoranye byaramira benshi.”

Umuyobozi w’Akarere ka Gicumbi, Ndayambaje Felix, avuga ko ntawe gakwiye gutera ipfunwe. Kuko usibye kuba agakingirizo kakurinda kwandura indwara zandurira mu mibonano mpuzabitsina, kanakoreshwa mu kuboneza urubyaro ari na ko karinda urubyiruko gutera no gusama inda zitifujwe.

Yagize ati “Usanga abantu bamwe bagifite imyumvire ko gukoresha agakingirizo ari iby’urubyiruko, ariko bakwiye kumva ko umuntu ufashe agakingirizo ataba abaye igicibwa.”

Mu mwaka wa 2019 Ikigo cy’Igihugu gishinzwe ubuzima, RBC, cyatanze udukingirizo ibihumbi 31,4 mugihe isi yose itanga uturenga miliyoni 600. Muri uyu mwaka (2020) RBC ikaba itegana kuzatanga  milioni 33 z’udukingirizo tw’abagabo, hagamijwe gukuramo icyuho kigaragara mu kutwegereza benshi.

Munezero Jeanne d’Arc

Be the first to comment

Leave a Reply

Your email address will not be published.


*