Lakers yegukanye shampiyona ya NBA ku nshuro ya 17

Los Angeles Lakers yegukanye shampiyona y’umukino w’intoki wa Basketball muri Leta Zunze Ubumwe za Amerika ku nshuro yayo ya 17, itsinze Miami Heat imikino ine kuri ibiri muri itandatu bakinnye.

Umukino wa gatandatu warangiye Lakers itsinze amanota 106 kuri 93 ya Miami. Ni umukino Lakers yatsinzemo uduce dutatu twa mbere, kamwe ku manota 28 kuri 20 Miami, aka kabiri itsinda 36 kuri 16, aka gatatu 23 kuri 22 mu gihe aka nyuma Miami yagatsinze ku manota 35 kuri 19.

Ni igikombe cya kane kuri LeBron James wanabaye MVP w’imikino ya nyuma kuko yegukanye bibiri akinira Miami Heat, kimwe akinira Cleveland Cavaliers n’iki akinira Lakers.

Yanaciye agahigo ko gukina umukino wa 260 wa Playoff aho yatsinzemo amanota 28 agasama imipira 14 yavaga mu gakangara k’ikipe ye (rebound) ndetse agatanga n’imipira 10 yavuyemo amanota kuri bagenzi be mu minota 41 yamaze mu kibuga.

Usibye Michael Jordan wabaye MVP w’imikino ya nyuma inshuro esheshatu, nta wundi mukinnyi uri imbere ya LeBron James kuko we amaze kubigeraho inshuro enye.

Hari hashize imyaka icumi Lakers idatwara igikombe cya Shampiyona kuko yaherukaga icyo mu 2010 itsinda Boston Celtics.

Nkubiri B. Robert

Be the first to comment

Leave a Reply

Your email address will not be published.


*