Nyuma yo gutsinda igitego Tanzania, Saido Ntibazonkiza yatwawe na Young Africans

Saido Ntibazonkiza, wakiniraga ikipe ya Vital’o muri shampiyona y’u Burundi, yasinye amasezerano yo gukinira ikipe ya Young Africans muri Tanzania nk’uko iyi kipe yabitangaje.

Uyu ni umwe mu bakinnyi bagenderwaho ukina mubusatirizi mu ikipe y’igihugu y’ u Burundi , agiye muri iyi kipe nyuma yo gutsinda igitego kimwe ku busa, u Burundi bwatsinze Tanzania, mu mukino wa gicuti wahuje ibibi bihugu ku cyumweru tariki ya 11/10/2020.

Gusa ibikubiye mu masezerano hagati y’ikipe ya Young Africans na Vital’O kuri uyu mukinyi ntibirashyirwa ahagaragara.

Ntibazonkiza yaheruka gukinira Intamba mu rugamba hari haciye imyaka itanu, mu mukino wari wabahuje n’ibirwa bya Morise (Maurice), aho ibyo bihugu bibiri byari byanganije igitego kimwe ku kindi.

Muri uwo mukino wabereye mu birwa bya Morise, Ntibazonkiza  yashinjwe kwitwara nabi harimo no kubuza bagenzi be gukina, bituma ahagarikwa n’ishyirahamwe ry’umupira w’amaguru mu Burundi, FFB, kongera  gukinira ikipe y’igihugu.

Umurundi Ntibazonkiza, muri Young Africans asanzeyo Haruna Niyonzima  kapiteni w’ikipe y’igihugu y’u Rwanda. Saido ni umukinnyi uzwi muri Tanzaniya nubwo atari yarigeze ahakina.

Saido Ntibazonkiza amaze gukina mu makipe menshi mu bihugu bitandukanye mu karere, i Burayi nko muri Holande, Polonye n’u Bufaransa.

Azwi mu gihugu cye nk’umukinyi ukomeye wagiye afasha bagenzi be bo mu ikipe y’igihugu y’u Burundi,  Intamba ku rugamba, abatera inkunga mu buryo butandukanye.

Nkubiri B. Robert

Be the first to comment

Leave a Reply

Your email address will not be published.


*