Gatsibo: Havumbuwe uruganda rw’inzoga zitemewe zifunyitse mu macupa y’amatoragurano

Ku kabiri tariki ya 12 Ukwakira 2020, Polisi ikorera mu karere ka Gatsibo mu Murenge wa Rugarama yafashe  umuturage wakoze uruganda mu rugo iwe rukora inzoga zitujuje ubuziranenge. Iyo nzoga yitwa Akeza k’ibimera, yapfunyikwaga mu macupa ya pulasitiki y’amatoragurano kandi asanzwe yarakoreshejwe.

Umuvugizi wa Polisi mu ntara y’Iburasirazuba, Chief Inspector of Police (CIP) Hamdun Twizeyimana, yavuze ko gufatwa k’uyu muturage kwaturutse ku  makuru yatanzwe na bagenzi be. Abapolisi bageze aho akorera basanga akora icyo kinyobwa kitujuje ubuziranenge, aho akorera hari amacupa 417 yuzuyemo icyo kinyobwa.

Yagize ati  “Ni ikinyobwa kimeze nk’inzoga ariko ibintu agikoramo ntiwabimenya kuko avangavanga ibintu bitandukanye, aho acanira amazi agashyiramo isukari na Tangawizi n’ibindi bintu byinshi bituma gihindura ibara kigasa nk’umuhondo. Iyo yamaraga kugikora yakiranguzaga abandi bacuruzi, izindi akazicururiza aho akorera.”

CIP Twizeyimana yakomeje avuga ko abapolisi basanze ahakorerwa icyo kinyobwa hari umwanda ndetse n’amacupa agipfunyikamo atujuje ubuziranenge.

Ati   “Habimana iyo yamaraga gukora icyo kinyobwa yagipfunyikaga mu macupa ya pulasitike atoragura hirya no hino kandi ntabwo byemewe. Byongeye, ingunguru yashyiragamo icyo kinyobwa zirimo umwanda. Ibi bishobora gutera indwara  umuntu wese unyoye icyo kinyobwa. Ibyo binyobwa byahise bimenwa ndetse n’aho yakoregaga harafungwa.”

Umuvugizi wa Polisi mu ntara y’Iburasirazuba yashimiye abaturage batanze amakuru yatumye Habimana afatwa. Yasabye n’abandi baturage kujya bihutira gutanga amakuru igihe cyose babonye umuntu ukora ibinyuranyijwe n’amategeko kandi bishobora kugira ingaruka k’umutekano n’ubuzima bwabo.

Ingingo ya 5 y’Iteka rya Minisitiri Nº 001/MoH/2019 ryo ku wa 04/03/2019 rigena urutonde rw’ibiyobyabwenge n’ibyiciro byabyo rishyira inzoga zikozwe mu buryo budakurikije ibisabwa n’amabwiriza y’ubuziranenge n’andi mategeko mu biyobyabwenge byoroheje.

Itegeko Nº 68/2018 ryo ku wa 30/08/2018 riteganya ibyaha n’ibihano muri rusange, ingingo ya 263 ivuga ko umuntu wese ukora, uhinga, uhindura, utunda, ubika, uha undi, ugurisha mu gihugu ibiyobyabwenge cyangwa urusobe rw’imiti ikoreshwa nka byo mu buryo bunyuranije n’amategeko, aba akoze icyaha. 

Iyo abihamijwe n’urukiko ahanishwa igifungo cya burundu n’ihazabu y’amafaranga y’u Rwanda arenze miliyoni makumyabiri (20.000.000Frw) ariko atarenze miliyoni mirongo itatu (30.000.000Frw) ku byerekeye ibiyobyabwenge bihambaye.

Mu gika cya Gatatu muri iri tegeko bagaragaza ko ufatanwe ibiyobyabwenge byoroheje ahanishwa igifungo kitari munsi y’imyaka irindwi (7) ariko kitarenze imyaka icumi (10) n’ihazabu y’amafaranga y’u Rwanda atari munsi ya miliyoni eshanu (5.000.000 Frw) ariko atageze kuri miliyoni icumi (10.000.000 Frw).

Rwanyange Rene Anthere

1 Comment on Gatsibo: Havumbuwe uruganda rw’inzoga zitemewe zifunyitse mu macupa y’amatoragurano

  1. Itegeko Nº 68/2018 ryo ku wa 30/08/2018 riteganya ibyaha n’ibihano muri rusange, ingingo ya 263 ivuga ko umuntu wese ukora, uhinga, uhindura, utunda, ubika, uha undi, ugurisha mu gihugu ibiyobyabwenge cyangwa urusobe rw’imiti ikoreshwa nka byo mu buryo bunyuranije n’amategeko, aba akoze icyaha. iyi ngingo ikwiye gusubirwamo bakareka ubikora akaba yabigurishiriza ahatari mu Rwanda.

Leave a Reply

Your email address will not be published.


*