Nyaruguru: Abaturage bafite ubutaka butabyazwaga umusaruro batangiye gufashwa kubuhingaho icyayi

Ubwo hatangizwaga umushinga wo kongera ubuso buterwaho icyayi muri Nyaruguru mu kwezi k"ukuboza 2017, bizafasha abatuye ako gace kwikura mu bukene (Ifoto/KigaliToday)

Abaturage bo mu karere ka Nyaruguru bari bafite ibisambu bavuga ko byari byarabarumbiye barishimira ko basigaye bafashwa kubihingamo icyayi ndetse bamwe  bakaba baratangiye gukora ku ifaranga.

Akarere ka Nyaruguru gahinga icyayi ku buso bwa hegitari 6043 kavuye kuri hagitari 5142 zari zarahinzwe mu 2016. Hari icyayi gihingwa n’abaturage ndetse n’igihingwa n’abashoramari.

Muri aka karere habarizwa kandi  inganda 3 zitunganya umusaruro, hakaba hateganywa kubakwa izindi nganda 2 bityo ngo hakenewe umusaruro mwinshi.

Abatuye mu murenge wa Mata  bakora ubuhinzi bw’icyayi, bavuga ko mbere bari babayeho nabi bataratangira guhinga ayo masambu yari  agizwe n’amashinge gusa.Ubu bakaba bahamya ko imibereho yabo yahindutse.

Ni  nyuma y’aho ubuyobozi n’abafatanyabikorwa babafashije guhinga  icyayi muri ibyo bisambu.

Nyiraromba Francine avuga ko mbere bakibabwira ngo bahinge icyayi muri ubwo butaka butabyazwaga umusaruro, babanje kubyanga bumva ko hatakwera, ko  baba bavunikiye ubusa.

Avuga ko nyuma bapfuye kubyemera bahinga icyayi, none ubu bakaba basigaye babona inyungu.

Ati: “Haje abadufasha batwereka uko duhinga icyayi ndetse banaduha inguzanyo ihwanye n’ amafaranga 900.000 adufasha gutegura umurima no kuwuhingisha. Umusaruro iyo ubonetse twishyura inguzanyo neza kuko icyayi tukigurirwa n’uruganda, tukagira andi dusigarana.”

Nyiraromba watangiye guhinga icyayi muri 2018, ahamya ko icyayi cyabafashije kwishyura ubwishingizi mu kwivuza, kuvugurura inzu yabagamo ndetse ubu akazanabasha kurihirira umunyeshuri muri uyu mwaka.

Arakangurira abandi bataritabira guhinga icyayi guhindura imyumvire, kuko icyayi ari isoko y’ubukungu.

Nyiraromba Francine umuturage w’i Nyaruguru watangiye gutezwa imbere n’ubuhinzi bw’icyayi (Ifoto/U. Donatha)

Mungwarakarama Raissa Agoronome w’Umushinga SCON, itera inkunga aba baturage avuga ko bafasha abaturage bo mu mirenge 4 muri aka karere ari yo Mata, Munini, Kibeho na Cyahinda, bakabafasha mu bukangurambaga bwo guhinga icyayi, bakabereka ibyiza byo kugihinga, aho banafatanya  mu mirimo ya buri munsi kugeza icyayi keze.

Ati: ” Tubafasha mu buryo bw’ubushobozi aho tubaha inguzanyo y’ibihumbi 900. Hari ahantu usanga hahoze ibisambu birimo amashinge cyangwa amashyamba nta bwo umuturage imbaraga ze zakwifasha gutegura aho ahinga icyayi, ni yo mpamvu bahabwa iyo nguzanyo.”

Abo bahinzi b’icyayi ngo batangiye gukorana n’uyu mushinga guhera mu mwaka wa 2018 ndetse bamwe bakaba baratangiye kubona amafaranga aturuka ku musaruro beza.

Buri muhinzi ngo ku mafaranga abona ku musaruro w’icyayi akuraho igice akaba ari cyo yishyura andi asigaye akayakoresha mu yindi mirimo.

Agoronome Mungarakarama yabwiye itangazamakuru ko bafasha abahinzi bafite kuva kuri ari (a) imwe kugeza kuri hegitari (ha). Abahinzi bafasha kugeza ubu bagera kuri 700 bo muri iyo mirenge, bakaba bateganya kuzafasha abahinzi 7000.

Umuyobozi w’Akarere ka Nyaruguru Habitegeko Francois avuga ko inganda bashaka kubaka nizuzura bateganya kujya bahinga Toni ibihumbi 20 z’icyayi bityo bifuza gufatanya n’abahinzi, ubuhinzi bw’icyayi bukaguka bakiteza imbere ndetse  n’akarere n’igihugu muri rusange.

Avuga ko ikigorana ku muhinzi,  mu buhinzi bw’icyayi ari ukubona amafaranga yo gushoramo bwa mbere kuko biba bihenze ugategereza kuyabona imyaka 4 icyayi keze.

Gusa avuga ko muri aka karere bagize amahirwe babona umuntu ufasha abaturage guhinga icyayi muri bwa butaka bwabo butabyazwaga umusaruro,  kandi akarere kizera  ko atazabunamaho.

Uwo mushoramari ngo aha abaturage amafaranga bakazamwishyura mu musaruro wabo nta nyungu.

Meya Habitegeko avuga ko ibyo byo kubaha inguzanyo no kubafasha muri ubwo buhinzi, abaturage babyishimiye. Akaba abasaba gukomeza kugihinga ku bwinshi kuko bafite isoko ari zo nganda zibarizwa muri ako karere.

Igiciro uruganda ruhera umuturage ku cyayi, kigenwa na Leta hakurikijwe igiciro kiri ku isoko mpuzamahanga.

Uwimana Donatha

Be the first to comment

Leave a Reply

Your email address will not be published.


*