Tanzania: Umuhanzi Mwana FA yasimbuye mu nteko Ishinga amategeko mugenzi we Professor Jay

Mwana FA ibumoso na Professor Jay wambaye ikositimu

Hamis Mwinjuma, umuhanzi uzwi cyane nka Mwana FA yatorewe kujya mu nteko ishingamategeko ya Tanzania ahagarariye akararere ka Muheza, naho undi muhanzi Professor Jay wari usanzwe ari umudepite atsindwa amatora.

Mwana FA umukandida w’ishyaka riri ku butegetsi CCM, yagize amajwi 47,578, uwo bari bahanganye Yosepher Komba wa CHADEMA itavuga rumwe n’ubutegetsi yagize amajwi 12,034.

Joseph Haule uzwi cyane muri muzika yo mu karere nka Profesa Jay yatsinzwe amatora yo mu karere ka Mikumi mu ntara ya Morogoro.

Professor Jay yari umudepite w’ishyaka CHADEMA, yatowe kwinjira mu bagize inteko mu 2015, kuri iyi nshuro yagize amajwi 17,375 mu gihe uwo bari bahatanye Denis Lazaro yagize amajwi 31,411. Ishyaka CHADEMA rivuga ko aya matora yaranzwe n’uburiganya.

Mu byavuye mu matora bimaze gutangazwa kugeza ubu, mu turere 264 tugize Tanzania abakandida ba CCM bamaze gutsindira imyanya 99% mu bagize inteko.

Nkubiri B. Robert

Be the first to comment

Leave a Reply

Your email address will not be published.


*