Volleyball: APR VC yegukanye igikombe cya shampiyona idatsinzwe na rimwe

Ikipe ya APR VC yegukanye igikombe cya shampiyona 2019/2020 igizwe n'abakinnyi bari mu kigero cy'imyaka y'amavuko iri hagati ya 18 na 25.

Ikipe ya APR VC y’abagabo yegukanye igikombe cya shampiyona nyuma y’imyaka itandatu itagitwara. Iki gikombe yacyegukanye ku wa 31 Ukwakira 2020 nyuma yo gutsinda UTB VC y’abagabo amaseti atatu kuri abiri.

N’ubwo UTB VC yatsinzwe n’abana ba APR VC, UTB WVC mu bagore yakinaga umwaka wayo wa kabiri yisubije igikombe nyuma yo kwihererana APR WVC ikayitsinda amaseti atatu kuri mwe.

APR VC yaherukaga gutwara igikombe mu mwaka wa 2014. Mu gusoza shampiyona iyi kipe yinjiye muri kamarampaka idahabwa amahirwe, yatunguye benshi ubwo yageraga ku mukino wa nyuma idatsinzwe. Abakinnyi ba APR VC bari mu kigero cy’imyaka iri hagati ya 18 na 25.

Uko umukino wa nyuma wagenze mu bagabo

UTB VC 2-3 APR VC

Iseti ya mbere: UTB 23-25 APR

Iseti ya 2: UTB 25-19 APR

Iseti ya 3: UTB 25-13 APR

Iseti ya 4: UTB 23-25 APR

Iseti ya kamarampaka: UTB 12-15 APR

Mu guhatanira umwanya wa gatatu mu bagabo, REG VC yawegukanye itsinze Gisagara amaseti atatu ku busa (10-25, 23-25, 22-25), mu gihe RRA W VC yegukanye umwanya wa gatatu mu bagore, nyuma yo gutsinda KVC amaseti atatu ku busa ( 27-25, 25-16, 25-17).

UTB WVC yisubije igikombe cya shampiyona kuko ariyo yari isanzwe ifite icy’umwaka ushize

Amakipe ya APR VC mu bagabo na UTB WVC mu bagore zizahagararira u Rwanda mu mikino Nyafurika y’amakipe yabaye aya mbere iwayo, mu mwaka w’imikino 2020-2021.

Nkubiri B. Robert

Be the first to comment

Leave a Reply

Your email address will not be published.


*