Huye: Kiyovu SC yanyagiriye Mukura VS iwayo ibitego 3-1

Umukino wahuzaga Mukura VS na Kiyovu SC muri Stade ya Huye ku munsi wa mbere wa Shampiyona 2020/2021 mu mupira w’amaguru, wasojwe Mukura idashoboye kwihagararaho ku kibuga cyayo ihatsindirwa ibitego 3 kuri kimwe cy’impozamarira.

Nubwo uyu mukino mu minota 25 ya mbere  Mukura  yihariye umupira  ntiyabashije gutsinda  ikipe ya Kiyovu  kuko  ku munota wa 32 byari bihagije ko  Dusingizimana  Gilbert  atsinda igitego cya mbere cya Kiyovu  ku munota  wa 45 Kiyovu  yongeye  itsinda  ikindi gitego igice cya mbere kiba kirarangiye.

Mukura yatangiye igice cya kabiri isatira ariko Kiyovu yakomeje kuyirusha ku buryo bugaragara kuko abasatirizi ba Mukura ntibabonaga izamu ntabusa. Ku munota wa 71 Serumogo Ali yabonye igitego cya gatatu cya Kiyovu, nyuma yo gucenga ba myugariro hafi ya bose ba Mukura. Umukino  wenda kugera ku musozo  Gael Duhayindavyi  yabonye  igitego cya Mukura cy’impozamarira cyabonetse kuri Penaliti nyuma yaho umukinnyi wa Kiyovu yateze umukinnyi wa Mukura  mu rubuga rw’amahina  Mukura  iba ibonye igitego cya mbere  cyayo  ku munota wa 81 umukino urangira utyo.

Umutoza wa Kiyovu Sport Karekezi Olivier mu kiganiro n’abanyamakuru yavuze ko yishimye intsinzi yabonye ku munsi we wa mbere wa shampiyona ashimira abakinnyi be babashije gutsinda.

Ku rundi ruhande umutoza wa Mukura Victory Sport yavuze ko we nta byinshi yavuga  abakinnyi be batabashije gukurikiza ibyo yababwiye akaba avuga ko ubutaha bashobora  kuzitwara neza kurushaho nubwo batsinzwe  ibitego 3.

Rukundo Eroge