Hemejwe icyicaro cya FIFA mu Rwanda

Inama y’Abaminisitiri yateranye ku wa 4 Mutarama 2021, mu myanzuro yayo, yemeje amasezerano hagati ya Guverinoma y’u Rwanda n’ishyirahamwe ry’umupira w’amaguru ku isi (FIFA), ayo masezerano yemerera FIFA kugira ikicaro mu Rwanda. 

Umunyamabanga Mukuru wa FERWAFA, Regis Uwayezu, atangaza ko gushyira Ibiro bya FIFA mu bindi bihugu n’u Rwanda rurimo ari muri gahunda yo kwegera abafatanyabikorwa ku buryo ibikenewe byose atari ngombwa kujya ku Cyicaro gikuru cya FIFA mu Busuwisi.

Ibi Biro ngo bizafa bishobora gufasha ibihugu byegeranye, ibindi bijyanye n’imikorere bikazaba biri mu masezerano hagati y’inzego za Leta na FIFA, ari na bo bashobora gusubiza ibijyanye na byo.

Regis Uwayezu mu kiganiro yagiranye n’Umuseke yavuze ko FIFA ari inkingi mwikorezi mu iterambere ry’umupira w’amaguru mu Rwanda, kuko mu ngengo y’imari ya FERWAFA, FIFA igiramo uruhare runini.

Ati “Ku rwego rw’umupira w’amaguru kuba ubuyobozi bwaza bukatwegera ni byiza cyane cyane mu rwego rwo kumenya amakuru mu buryo bwihuse, gutanga raporo tuba dusabwa mu buryo bwihuse, iyo abantu bakwegereye ni byiza imikorere n’imikoranire inoga kurushaho.”

Umunyamabanga Mukuru wa FERWAFA akomeza avuga ko amafaranga ya FIFA atangwa mu byiciro bitewe na gahunda y’ibikorwa biteza imbere ruhago bihari. Nibura politiki y’igenamigambi yayo ikaba ihinduka mu myaka ine.

Avuga ko FIFA itanga amadolari ibihumbi Magana atanu (500,000USD) agenewe ibikorwa by’umwaka muri rusange, andi nkayo agatangwa igihe hari ibikorwa by’iterambere ry’umupira byagaragajwe, aza nk’inkunga. Ibyo bikorwa ni 10 kimwe kibarirwa amadolari ibihumbi mirongo itanu (50,000USD) uko cyakozwe kikarangira.

Buri mwaka kandi FIFA itanga amadolari ibihumbi mirongo itanu (50,000USD) agenewe kugurwamo ibikoresho, n’andi ibihumbi magana abiri (200,000USD) agenewe ingendo n’amacumbi ku makipe y’ibihugu ariko u Rwanda ruyagenera amakipe y’abakiri bato. Aya atangwa buri mwaka.

FIFA itanga amadolari agana na miliyoni ebyiri (2000,000USD) mu myaka ine mu kubaka ibikorwa remezo biteza imbere umupira w’amaguru ubishatse ayafatira rimwe. Uretse ibyo kandi FIFA ifasha mu kubaka ubushobozi bw’abakozi ba FERWAFA mu bijyanye n’amahugurwa.

Uretse ibiro bikuru bya FIFA biri mu Busuwisi, ifite ibindi bidahoraho biri mu Buhinde, Malaysia, Nouvelle Zelande, Panama, Paraguay, Senegal, Barbados, Africa Y’Epfo, na Leta zunze Ubumwe z’Abarabu (United Arab Emirates), hakaba hiyongereye n’u Rwanda.

Perezida wa FIFA, Gianni Infantino yasezeranyije Perezida w’u Bufaransa, Emmanuel Macron ko mu gihugu ke naho hazashyirwa Ibiro bya FIFA bikazaba bikora mu ntangiriro z’uyu mwaka wa 2021.

Rwanyange Rene Anthere

Be the first to comment

Leave a Reply

Your email address will not be published.


*