Amafaranga Leta igenera VUP amaze kwikuba inshuro zisaga 65

Guverinoma y’u Rwanda imaze gukuba incuro zisaga 65 ingengo y’imari igenera gahunda ya VUP mu myaka 12 imaze itangiye. Icyakora ntabwo abagenerwabikorwa b’iyi gahunda irabageraho bose 100 ku ijana kubera ingengo y’imari idahagije.

Bamwe muri abo baturage babashije kwitabira VUP bose kuri ubu barayivuga imyato kuko yabafashije kwikura mu mibereho mibi aho bamwe bashoboye kwiyubakira amacumbi abandi bigurira amatungo bakaba bavuga ko babikesha leta yabahaye VUP.

Mu mwaka wa 2011 ni bwo Habisoni Pascal wo mu karere ka Musanze, aganira na RBA dukesha iyi nkuru, avuga ko yahawe akazi muri VUP mu mirimo yo guca amaterasi ndetse n’imirwanyasuri mu murenge atuyemo wa Gashaki, umwe mu yo iyi gahunda yatangiriyemo ku ikubitiro.

Uyu mugabo uvuga ko yahembwaga amafaranga y’u Rwanda 1.500 ku munsi yarangije muri ako kazi yakuyemo asaga ibihumbi 800 ayaheraho yiteza imbere.

Icyakora Habisoni avuga ko ubuzima bwe bwatangiye guhinduka nyabyo mu mwaka wa 2017 ubwo yafataga inguzanyo ya mbere muri koperative Umurenge SACCO binyuze muri gahunda ya VUP, atangiza ububiko bw’ibyo kunywa bisembuye n’ibidasembuye.

Abaturanyi be na bo bashimangira ko ibyo uyu mugabo amaze kugeraho abikesha VUP ari urugero rw’ibishoboka.

Banziririki Clautilde wo mu murenge wa rushashi ari naho hatangiriye VUP mu Rwanda nawe avuga ko kuba yarakoze muri VUP ari kimwe munzira yiterambere ariho uyu munsi.

Yagize ati: “kuri ubu ndi umudamu wifashije utagisaba umugabo umunyu cyangwa isabune nabashije kwigurira amatungo ubu mfite inka eshatu sinyumva ko umugabo ariwe byose nk’uko byari biri mbere y’uko VUP ibaho. Abana ndabishyurira, nubwo ntayanga yose icyarimwe, ariko ndishyura nkayarangiza kandi mbere abana banjye barangwaga no kuba aba mbere mu kwirukanwa. Ubu rero ntacyambuza gushimira leta yatwitayeho kandi ihora itureberera.”

Mu nkingi 3 z’ingenzi ziri muri VUP harimo Gahunda y’inkunga y’ingoboka akaba ari na yo yonyine imaze kugera mu mirenge yose yo mu gihugu uko ari 416. Indi gahunda ni iy’inguzanyo ziciriritse na ho iya gatatu ikaba iy’imirimo y’amaboko aho abaturage bahabwa akazi. Izi gahunda za nyuma uko ari ebyiri ni zo zimaze kugera mu mirenge isaga 300 kandi na bwo 70 ku ijana by’abagenerwabikorwa bujuje ibisabwa ni bo babona akazi muri gahunda y’imirimo y’amaboko kubera ingengo y’imari idahagije.

Umuyobozi w’ishami rishinzwe kurengera abatishoboye muri LODA Gatsinzi Justin avuga ko icyifuzo ari uko inkingi zose za VUP zagera ku bagenerwabikorwa bose.

Ati “Amafaranga ntabwo arahaza ngo inkingi zose zigere mu mirenge yose icyarimwe ariko ni yo ndoto, ni cyo cyifuzo cya Leta, ni cyo cyifuzo cya Minisiteri y’Ubutegetsi bw’Igihugu. Aho twumva mu mwaka w’ingengo y’imari utaha igenamigambi dufite ni iry’imirenge yose ariko iyo igihe kigeze hasuzumwa ya mikoro.”

Gahunda ya VUP yatangiye mu mwaka wa 2008 itangirana ingengo y’imari ya miliyari imwe na miliyoni 58 mu mirenge 30, ni ukuvuga umurenge umwe muri buri karere. Uko imyaka ishira ni ko iyi gahunda yakomeje kwaguka igera no mu yindi mirenge ndetse n’ingengo y’imari irongerwa aho kuri ubu igeze kuri miliyari 70 z’amafaranga y’u Rwanda buri mwaka.

Munezero Jeanne d’Arc

Be the first to comment

Leave a Reply

Your email address will not be published.


*