Kwishyura Mituweli birakomeza kugendera ku byiciro by’ubudehe bisanzwe

Ikigo cy’Igihugu cy’ubwiteganyirize (RSSB) cyasabye abaturage kwishyura imisanzu y’umwaka wa 2021-2022, bakurikije ibyiciro by’ubudehe basanzwe bishyuriraho.

Bamwe mu baturage bahisemo kwishyurira ubwisungane mu kwivuza hakiri kare mu rwego rwo kwirinda gukererwa kuzishyura, bahangayikishijwe no kutamenya uburyo bazishyura n’amafaranga bagomba kwishyura bitewe n’uko ibyiciro bishya by’ubudehe bitaratangazwa.

Ku mirenge SACCO ndetse n’ahatangirwa serivisi z’Irembo n’ahandi hishyurirwa imisanzu y’ubwisungane mu kwivuza, uhasanga bamwe mu baturage baje kwishyura imisanzu y’umwaka utaha wa 2021-2022.

Baganira na RBA dukesha iyi nkuru, abaturage bavuga ko muri uku kwezi kwa mbere ari bwo baba batangiye kwishyura imisanzu kugira ngo umwaka mushya w’ubwisungane mu kwivuza uzatangire bararangije kuzuza imisanzu yose basabwa y’umuryango wose.

Gusa ngo bari mu gihirahiro cyo kutamenya umubare w’amafaranga umunyamuryango azishyura kuko hatazongera gushingirwa ku byiciro by’ubudehe ndetse n’uri kujya kuyishyura ari kubwirwa ko ikoranabuhanga ritarafungurwa ngo bemererwe kwishyura.

Havugimana Moses ni umwe mu bifuje kwishyura ubwisungane hakiri kare bitewe n’umurango mugari afite yahisemo gutangira hakiri kare gusa avuga ko afite impungege z’uko batakira amafaranga bategereje ibyiciro bishya.

Yagize ati “twabaga twatangiye ku yatanga ariko ubungubu ntituzi neza ayo dusabwa gutanga, kuko twajyaga tuyatanga tugendeye ku byiciro twabaga turimo. Ku bwanjye binteye ikibazo kuko nabikoraga mu rwego rwo kwirinda kuzagira ikibazo kuko mfite umuryango mugari. kuyabonera rimwe biragoye, ni nayo mpamvu nari narahisemo gutya mu rwego rwo kubahiriza amabwiriza yo kwishyura ubwisungane. Nageraga ku gihe cyo gutangira kwivuza nararangije.”

Uwikeza Agathe na we ni umwe mu bari barahisemo uburyo bwo kwishyura mbere kugira ngo yirinde ibibazo bwo kutangira ubwisungane mu kwivuza.

Yagize ati “mubyatumye mpitamo ubu buryo ni uko ndi umupfakazi. Rero simbanshaka ko naba ikibazo mu mudugudu mu gihe narwaye cyangwa narwaje, kandi na none kuyabonera rimwe birangora kuko ntakazi gahoraho ngira; nari narahisemo nibura kujya nishyura buhoro buhoro kugeza nyamazemo kuko hari ubwo umuntu aba yafashe mu kimina agahita ayatanga. Ubu rero byatubereye urujijo.”

Ikigo cy’igihug cy’ubwiteganyirize RSSB kivuga ko abaturage bakomeza kwishyura imisanzu, bakurikije ibyiciro by’ubudehe basanzwe bishyuriraho.

Umuyobozi w’ishami rishinzwe ubukangurambaga no kwandika abanyamuryango ba mituweli muri iki kigo, Ntigurirwa Deogratias, asaba inzego zakira iyi misanzu gufasha abaturage bakishyura nk’uko byari bisanzwe, niharamuka habaye impinduka bazabimenyeshwa.

Yagize ati “ubu uwashaka kwishyura we yabikora ntakibazo, kuko birashoboka n’ubu hari imiryango igera kuri 69 imaze kwishyurira umwaka utaha. Kugeza ubu turacyakurikiza icyiciro cy’ubudehe gisanzwe, nihagira igihinduka abanyamuryango tuzabamenyesha; ariko kugeza ubu kuba ntacyo turababwira ni uko ntakibazo. Buri wese aracyokoresha icyiriro yari asanzwe akoresha, ni cyo akishyuriramo.”  

Kugeza ubu abanyamuryango b’ubwisungane mu kwivuza bamaze gutanga imisanzu yose y’umwaka wa 2020-2021 bageze ku kigero cya 84,5 ku ijana.

Munezero Jeanne d’Arc

Be the first to comment

Leave a Reply

Your email address will not be published.


*