Abajyanama b’ubuzima barasaba guhabwa ibikoresho byabafasha kwirinda bakurikirana abarwayi mu rugo

Bamwe mu bajyanama b’ubuzima bo mu karere ka Rubavu bagaragaza ko bahura n’imbogamizi nyinshi zo kubura ibikoresho bifashisha bita ku barwayi ba COVID-19 bavurira mu ngo, bityo bikabaviramo kudakora akazi bashinzwe nk’uko bikwiriye. Bifuza ko bahabwa ibikoresho harimo n’ibibafasha kwirinda nabo ubwabo.

Abajyanama b’ubuzima bavuga ko mubyo bashinzwe harimo no gusanga umurwayi mu rugo bakareba ko amerewe hirindwa ko yarembera mu rugo ndetse no kureba ko batarenze ku mambwiriza bikaba byatuma yanduza abandi.

Iyo batagiye kureba abanduye COVID19, aba bajyanama b’ubuzima baba bari mu ngo basuzuma abaturage babagana bareba niba nta bimenyetso bafite.

Gusa mu mbogamizi aba bajyanama b’ubuzima bagaragaza muri aka kazi, zishingiye ahanini ku bikoresho bidahagije birimo iby’ubwirinzi n’utwuma bapima umuriro kuko usanga n’abagafite ngo bagasaranganya ari abajyanama icumi.

Uwayezumariya avuga ko kwita ku barwayi biba bitoroshye aho usanga natwe tuba tutirinze nkuko bikwiriye mu gihe ugiye ku mureba mu rugo.

Yagize ati: “ibi twambara nabyo ntabwo bihagije hari ukuntu umurwayi ashobora kuza yarembye ugasanga ntabasha ku kwitwararikaho. Twumva bibaye ngombwa badushakira nk’indi myambaro yajya idufasha, nibura igera ku maboko bakaduha n’udupfukantoki, kuko utwo dufite ni utwo dukoresha turi kuvura malariya. Twumva baduhaye ibijyanye n’uburyo twakirinda natwe ubwacu byadufasha.”

Mu zindi mbogamizi bahura na zo ni ukutabona amafaranga y’itumanaho abunganira mu gukurikirana abarwayi. Ibyo bituma hari bamwe mu barwayi ba COVID-19 bajya kureba mu ngo zabo bagasanga bavuye mu kato, ahanini babitewe no kubura ubushobozi bw’ibibatunga.

Umuyobozi w’ibitaro bya Gisenyi, CSP Dr Tuganeyezu Oreste, agaragaza ko mu gihe hataraboneka ibikoresho bihagije, abajyanama b’ubuzima bakurikirana abarwayi mu buryo babihuguriwemo.

Yagize ati “ibikoresho bishobora kuba bikeya ariko biragenda byegeranywa. Nk’uko mubizi, iyi ndwara tugiye kuyimaraho umwaka, n’umubare w’abajyanama mu gihugu hose ni munini; gusa bagomba kwihangana kuko tugenda dutanga ibikoresho dukurikije uko umudugudu ugenda ugira abarwayi benshi.”

Kuri ubu mu karere kose ka Rubavu habarurwa abarwayi barenga 100 bavurirwa icyorezo cya COVID-19 mu ngo zabo, na ho batanu batarembye cyane baritabwaho mu bitaro bya Gisenyi. Ni mu gihe ikigo nderabuzima cya Rugerero cyahoze kivurirwamo abanduye iki cyorezo ubu kitakibakira.

Munezero Jeanne d’Arc

Be the first to comment

Leave a Reply

Your email address will not be published.


*