Megawatt 15 za mbere z’amashanyarazi aturuka kuri Gaz Methane yo mu Kivu zigiye gutangira gukoreshwa

Uruganda rutunganya amashanyarazi akomoka kuri Gaz Methane rugiye kuzura mu murenge wa Nyamyumba, Akarere ka Rubavu.

Imirimo yo kubaka ibikorwaremezo bizifashishwa mu gucukura gazi mu kiyaga cya Kivu irimbanyije kugira ngo itunganywemo amashanyarazi. Mu kwezi kwa Kamena 2021 byitezwe ko hazaboneka icyiciro cya mbere cya Megawatt 15 z’amashanyarazi.

Ku nkengero z’ikiyaga cya Kivu, mu Murenge wa Nyamyumba, imirimo y’ubwubatsi bw’impombo irarimbanyije ahubatswe uruganda rwa Shema Power Lake Kivu Ltd ruzabyaza amashanyarazi Gaz Methane icukurwa mu kiyaga cya Kivu.

Harubakwa impombo zubatswe imusozi zizakira Gaz, mu birometero bitanu ujya hagati mu kiyaga hashyizwe ibitembo binini mu mazi hejuru yabyo hamanikwa utumenyetso dutukura, tuburira abashobora kuba babyangiza banyuze inzira y’amazi nk’ubwato.

Ibyo bitembo bizahuzwa n’andi matiyo azamanurwa hasi mu mazi mu bujyakuzimu bwa metero zisaga 350 kuko ikiyaga cya Kivu gifite metero zisaga 500 z’ubujyakuzimu, akaba ariho bizakurura Gaz Methane bikayivangura n’amazi.

Gaz Methane yo mu Kiyaga cya Kivu igiye kuba itanze Megawatt 15 muri 56 zitegerejwe.

Abaturage bo mu karere ka Rubavu bijwe ko batazongera kubura umuriro kuva muri kamena kuko amashanyarazi aturuka kuri gaz methane yo mu kivu azaba yarabagezeho.

Abaturage barashima cyane ubwo bufatanye no kuba bagiye kubona amashanyarazi kuko bavuga ko batazongera guterwa ibihombo bitewe nibura ryu muriro wa kunze kubura cyane muri kano karere

Nyiranzabandora Charlotte ni umucurizi wo mu mujyi wa Gisenyi. Agira ati “ni kenshi usanga nta muriro uboneka kandi ducuruza amata ndetse ni bindi byose bikenera gushyirwa muri firigo rero birangirika tukagira igihombo ariko ubwo tuzabona amashanyarazi aturutse kuri Gaz Methane twizeye ko biazongera kubaho.”

Kubwimana Alexis ni umuturage wo mu karere ka Rubavu. Aravuga ko bizeye kutazongera ku bura umuriro kuko begereye uruganda nta bikoresho bikenera umuriro bizongera kwangirika ndetse n’ibibazo byose byaterwaga n’iryo bura ry’umuriro bitazongera.

Ing. Sibomana Laurent avuga ko gaz yayunguruwe igatandukanwa n’amazi, izahuzwa n’ikindi gice cy’uruganda ruyihinduramo amashanyarazi.

Yagize ati “Twebwe tuzafata iyo gaz tuyohereze mu kindi kigega cya washing tank. Ni ahantu dukorera kugira ngo tuyiyungurure, kuko tuba dukeneye Methane Gaz yonyine noneho tukayohereza mu yandi matiyo ikajya gu sapulayinga andi mamashini, nyuma gazi ikazicana, noneho izo mashini zigakora amashyanyarazi. Ayo mashyanyarazi tukayafata tukayashyira mu muyoboro wa REG.”

Aha ibyo bikubiye mu cyiciro cya mbere cy’imirimo irimo gukorwa aho byitezwe ko izasozwa mu kwezi kwa 6 k’uyu mwaka wa 2021, kugira ngo uru ruganda ruzashobore gutanga icyiciro cya mbere cy’’ingufu zingana na Megawatt 15.

Ariko uyu mushinga wose wo kubyaza Gaz Methane amashanyarazi witezweho gutanga Megawatt 56, uzubakwa mu byiciro bine bizatwara asaga miliyoni 400 z’amadolari y’Amerika.

Izi ngufu nizimara kuboneka zizanyuzwa mu muyoboro mugari wa REG, ufite ubushobozi bwa KV 220, ariko mbere yo koherezwa mu baturage ukava kuri KV 220 ukajya kuri KV 30, izo ngufu zizabanza kugenzurirwa ahahurizwa amashanyarazi hubatswe transfo iri mu kagari ka Murambi mu murenge wa Rubavu.

Ibi bizakemura ikibazo cy’umuriro muke n’ibura ryawo rya hato na hato nk’uko bisobanurwa na Butera Laurent umuyobozi w’ishami rya REG mu Karere ka Rubavu.

Yagize ati “Ni ukuvuga ngo niba hari amashyanyarazi twakuraga i Karongi, yatangaga ingufu mu baturage andi akava muri musanze, ni ukuvuga aho ikibazo cyabaga muri utwo turere twombi byatumaga twebwe tuyabura kuko turi kure,ariko noneho kuba twifitiye substation yacu ya Rubavu bizadufasha gukurikirana aho ikibazo cyabaye tunagikemure vuba kuko ni hafi, numva rero mu by’ukuri ku kigereranyo kiri hejuru twakwizeza abaturage ba Rubavu ko ibura ry’amashyanyarazi tugiye gutandukana na ryo.”

Imirimo yo kubaka aho izo ngufu z’amashanyarazi azaturuka muri gaz methane uzagenzurirwa muri sub-station ya Rubavu igeze ku gipimo cya 40%. Bimwe mu bikoresho by’amashanyarazi byarahagejejwe birimo amapironi, n’ibikoresho bizamura cyangwa bimanura umuriro mu rwego rwo kuwugenzura, aho icyiciro cya mbere cy’iyi mirimo cyarangiye gitwaye amafaranga arenga miliyari imwe y’amadorali.

Izi ngufu nizitangira gukoreshwa, zizakemura ibibazo by’ibura ry’umuriro ndetse no kuba muke ugatuma na bimwe mu bikoresho by’abaturage bo mu Karere ka Rubavu byangirika.

Umuyobozi w’Akarere ka Rubavu, Habyarimana Gilbert, we avuga uyu mushinga wo kuvoma gaz methane mu Kivu igatunganywamo amashanyarazi, uzatuma abaturage bose b’akarere bagerwaho n’amashanyarazi afite ingufu. Byongeye kandi uyu mushinga wabahaye akazi.

Nk’uko biri muri gahunda ya Guveronoma y’u Rwanda mu iterambere rirambye y’imyaka 7 izasozwa muri 2024, mu Karere ka Rubavu bafite icyizere ko abaturage bose bazaba bafite amashyanyarazi afite ingufu zihagije akabafasha mu bikorwa by’iterambere. Imibare igaragaza ko 73.4% by’abaturage b’aka karere ari bo bamaze kugezwaho amashanyarazi.

Munezero Jeanne d’Arc

Be the first to comment

Leave a Reply

Your email address will not be published.


*