Connect with us

Hi, what are you looking for?

Imibereho myiza

Abanyamuryango ba COTTRARU bashimira ubuyobozi bakesha iterambere ry’abafite ubumuga

Abibumbiye muri Koperative ‘COTTRARU’ y’abafite ubumuga, bakorera mu Karere ka Rubavu, bashimira ubuyobozi bwa Leta bwabashije kwihuriza hamwe, ubu bakaba bakora bakiteza imbere, mu kazi ko gutwaza imizigo abacururiza ku mupaka w’u Rwanda na Repubulika iharanira Demokarasi ya Congo.

Iyi koperative imaze hafi imyaka 15, abanyamuryango bayo bishimira uko ibafasha mu guhindura imibereho, nyuma yo guhuza imbaraga nk’abafite ubumuga.

Jeannette, ni umubyeyi w’abana 2, ukorera muri ‘Cooperative de Transport Trans-frontariers de Rubavu_COTTRARU’, guhera mu mwaka wa 2016; yishimira ko guhura n’abandi muri koperative byamukuye mu bwigunge.

Agira ati “Mfite ubumuga bw’akaguru, ntaraza muri koperative nagendaga ncumbagurika ku nkoni, ariko ubu nahinduye amateka, ngendera mu igare nkanakora akazi. Abayobozi baradufashije badukoraho ubukangurambaga, bamwe mu bari bariheje tubasha kwegerana turakora, n’ubushobozi bugenda buboneka; ubu duhagaze neza, ubuzima bwacu bufite icyerekezo.”

Ruhunga Jeannette, ufite ubumuga bw’akaguru

Yongeraho ko n’ubwo hari ibyo abafite ubumuga bakenera gufashwamo, ari aha buri wese kubanza gutegura uko agomba kubaho.

Ati “Muri aka kazi ko gutwara imizigo, hari aho nkenera unsunikira igare kandi aba agomba kwishyurwa; ibyo rero bimpa imbaraga zo gukora ngo ngire icyo nzigezaho, kuko mba ngomba kumenya umuryango wanjye ndetse n’ibikorwa by’iterambere rya koperative nkabigiramo uruhare.”

Kubwimana Samuel, we avuga ko kuba muri koperative byamuhaye icyizere cyo kubaho, hamwe no guhuza imbaraga n’abandi bafite ubumuga butandukanye.

Yagize ati “Nyuma yo gukora impanuka bikaba ngombwa ko ncibwa ukuboko, nitakarije icyizere, numva kuzabaho nteze amaboko atari ibyanjye; gusa nahuye n’abandi muri koperative ndigishwa kandi mbona ko binashoboka kwibeshaho, hamwe no gukora duhuza imbaraga.”

Umwe mu bayobozi ba COTTRARU, Bahati Magela, avuga ko bishimira iterambere bamaze kwigezaho nka koperative, n’ubwo COVID-19 yaziyemo.

Bahati Magela, uhagarariye abamugariye ku rugamba muri koperative ‘COTTRARU

Ati “Twarakoze dushyize hamwe, umugabane ugenda uzamuka tubasha gutangira kwigurira amagare adufasha mu kazi. Gusa COVID-19 yaraje akazi karapfa, ariko hamwe n’ubuyobozi twabashije kongera kwisuganya, nyuma yo kugenerwa miliyoni 4 zo kwifashisha nka koperative.”

Ubumuga si uburwayi

Ubumuga busobanurwa nko gutakaza urugingo cyangwa ingingo z’umubiri, ku buryo bibuza uwazitakaje kuba yagera ku bintu bimwe na bimwe mu byo sosiyete imugomba, bityo si uburwayi nk’uko bamwe babyibeshyaho.

KWIZERA Marcel, uyobora Umuryango w’abamugariye ku rugamba_RECOPIDO, abigarukaho yibanze ku gushishikariza buri muntu gushyigikira abafite ubumuga, bakisanga mu iterambere rusange ry’Igihugu.

Agira ati “Abafite ubumuga twibabona buri gihe nk’abagomba gufashwa, nk’abadafite icyo bashoboye muri sosiyete. Wenda ni byo kubafasha, ariko mu biri ngombwa ndetse tubafasha kwifasha ubwabo. Niba ugiye kubaka inzu, wibuke kuyishyiramo ibyangombwa ku buryo n’ufite ubumuga azayisangamo; ari inzira, ubwiherero, n’ibindi… Erega nta wamenya, nawe ejo cyangwa ejobundi ushobora kugira ubumuga.”

Akomeza asaba buri muntu gusobanukirwa, akumva ko ubumuga atari uburwayi ku buryo ubufite nta kintu na kimwe yakwimarira.

Ati “Ufite ubumuga ubu n’ubu, aba afite ibindi runaka yabasha gukora, si uburwayi ngo burabimubuza. Na we rero iterambere arigiramo uruhare, ahubwo niyoroherezwe mu buryo bwo kuryisangamo, nk’uko ubumuga buri ukwinshi kubw’impamvu zibutera.”

Umuyobozi w’Akarere ka Rubavu, Kambogo Ildephonse avuga ko abafite ubumuga bafite uruhare rugaragara mu iterambere ry’aka gace, binyuze mu mirimo y’ubucuruzi bwambukiranya umupaka.

Ati “Hamwe na gahunda y’Igihugu yo gushyigikira abakora ubucuruzi bwambukiranya imipaka, twabashije kwegeranya abantu mu makoperative 15, arimo n’Abafite ubumuga, by’umwihariko abatuye mu Mirenge yegereye ririya soko nyambukiranyamipaka (Cross-Border Market). Ubona ko bafatanya n’abacuruzi rwose mu kwihutisha ubuhahirane, ndetse n’iterambere rusange ntiribasige inyuma. Na twe dukomeje gukora ibishoboka byose ngo ibikiri imbogamizi bikemurwe, nk’ibikorwaremezo; muri NST1 twateganyije gutunganya imihanda, nay o ikaba iri mu bizafasha kunoza ibikorwa.”

Kambogo Ildephonse, umuyobozi w’Akarere ka Rubavu

COTTRARU ihuriramo abafite ubumuga kuva mu mwaka wa 2007, igizwe n’abanyamuryango 93, barimo abagabo 80 n’abagore 13; Batangiranye umugabane w’amafaranga ibihumbi 18, ubu bageze ku 885 000. Abanyamuryango b’iyi koperative bakorana na SACCO, bakoroherezwa mu kubona inguzanyo, bishyurirwa ‘Mutuel Sante’, ndetse bakizigamira muri ‘Ejo heza’ baharanira kwiteza imbere.

UMUBYEYI Nadine Evelyne

Click to comment

Leave a Reply

Your email address will not be published.

Izindi wakunda

PanoramaTV Rwanda

https://www.youtube.com/watch?v=BgBhZVIypEs

Click here to Follow our YouTube Channel

Advertisement

Address:

KG 17 Av 37
Remera-ARJ/RMC House
Amahoro National Stadium
Registration Number: RMC/C/14/015
Accreditation: RURA/ICT/LIC/210181745

e-mail: editor.panorama.rw@gmail.com; panoramarw@gmail.com

Tel: 0788300359 -0733003020

Twitter: @PanoramaNewspa1; @reneanthere
Facebook: Panorama Newspaper

Services:

Panorama Newspaper, Animation, Conducting Community debates, Organizing Talk shows, Consultancy in Media, Photography, Newsletters, Magazines, Videos, Documentaries, Translation, Editing, Book publishing, Motion picture, video and television programme production activities, Motion picture, video and television programme postproduction activities
Motion picture, video and television programme distribution activities, Motion picture projection activities, Other information service activities n.e.c.
Other publishing activities, Publishing of newspapers, journals and periodicals
Radio broadcasting, Television programming and broadcasting activities

Copyright © 2021 Panorama.