Bamwe mu bakirisito ba ADEPR barinubira kuyobozwa inkoni y’icyuma na munyangire

Ubuyobozi bukuru bwa ADEPR burashinjwa na bamwe mu bakirisito kubayoboza igitugu, gucecekesha abashaka kugaragaza akarengane kagirirwa bamwe mu bashumba n’abakirisito, ndetse no kwirukana abo bumva badashaka bose. Ibi byose babihuza n’uko abakoranye n’ubuyobozi bwa ADEPR bwakuweho, abenshi birukanwe abandi bagakurwa mu nshingano bari bafite bagahabwa imirimo iciye bugufi.

Abakirisito baganiriye n’Ikinyamakuru Panorama, bavuga ko ubu mu itorero hadutsemo guhiga bukware abantu bose bakoranye na Past Sibomana Jean na Past Tom Rwagasana, abatambuwe inshingano bakoherezwa gukorera ku midugudu bakuwe ku rwego rukuru.

Bavuga ko ibyo byose byakuruwe n’icyo bo bita agatsiko kagamije kwishakira imyanya n’indonke kakimakaza munyangire na munyumvishirize. Bavuga ko ikiswe “Nzahuratorero” aricyo kigiye gusenya itorero ryabo, kuko abakirimo bagenda bigabanya imyanya birukana ushatse kugaragaza ukuri wese.

Bavuga ko imwe mu migambi mibisha yateguwe na Nzahuratorero nk’uko bivugwa n’abayivuyemo mu ibaruwa yo ku wa 04 Werurwe 2017 yandikiwe inzego za Leta zitandukanye, bavugamo Kwangisha  abayobozi ba ADEPR abakirisito (bavuyeho) ku buryo babanga urunuka; Guteranya abanyarwanda n’inzego za Leta; Guhimbira abantu ibinyoma no guhimba imikono y’abantu ndetse no Guteza urusaku mu bayoboke ba ADEPR no gukuraho ubuyobozi buriho, kandi uyu mugambi wa nyuma wamaze kugerwaho neza.

Banongeraho ko iyo migambi mibisha bateguye  yatangiye gushyirwa mu bikorwa tariki ya 03 Ugushyingo 2017 mu nama yabereye i Muhanga iyobowe na Past. Kararuranga Ephrem Umuvugizi wa ADEPR na Past. Karangwa John Umuvugizi wungirije aho batumiye komisiyo nzahuratorero igatukana ku mugaragaro igasaba kwirukana abo badashaka bari mu mirimo itandukanye muri ADEPR, bakoranye na n’ingoma ya Rev. Sibomana na Rwagasana.

Ikindi bavuga kandi ni uko ngo muri Komite Nyobozi y’Itorero na bo ubwabo batumvikana bapfa imyanya kuko buri wese ashaka kwizanira abo yiyumvamo aho gukurikiza amabwiriza y’Itorero.

Mugemana (izina rihimbano twahaye umwe mu baduhaye amakuru) agira ati “mu itorero ryacu harimo akarengane gakabije, mbese ntiwamenya ko ari mu itorero ry’Imana ahubwo wakeka ko ari ahandi hantu. Twibaza niba tuyobowe n’abashumba baragiye intama z’Imana. Turibaza iyo batwerekeza kuko bimitse munyangire na munyumvishirize. Nk’ubu birukanye abashumba b’indembo n’ababungirije hafi ya bose, birukanye abo mu turere, bohereje bamwe mu bapasitoro mu kiruhuko cy’izabukuru kandi igihe kitageze.”

Akomeza agira ati “ako gatsiko uwari ukayoboye Dr Basabose Jean de Dieu yamaze guhunga igihugu, Mbanda Samuel umwanditsi,  yagororewe kuyobora Dove Hotel birengagije ko atari umukirisito wa ADEPR. Undi ukorana n’ako gatsiko ni Birahagwa Janvier w’umucuruzi. Ubu yamaze kohereza umuryango we hanze kandi biravugwa ko na we yaba agiye kugenda.”

Umwe mu bashumba b’itorero (twahaye izina rya Ngabo muri iyi nkuru) avuga ko abayobozi b’itorero na bo ubwabo badashoboye kwiyobora ahubwo bakurikiza amabwire bitumwa babiba urwango hagati mu bakirisito, ikindi kandi itorero ubwaryo ritigeze rimenya aho igihugu kigeze.

Agira ati “Mu itorero harimo ingengabitekerezo yo kutigera tumenya aho igihugu kigeze. Itorero riracyari akazu k’abantu bamwe bakora ibyo bishakiye, bagenda bikiza abo badashaka babitirira ibyo bishakiye. Mu itorero turacyafite ibikomere bitarakira, hari byinshi bikeneye kuvurwa. Itorero ryacu mu by’ukuri usanga risa n’aho riyobowe n’abantu bari hanze y’igihugu bakoresha benewabo, na bo bagakoresha amafaranga.”

Akomeza agira ati “Amafaranga ni yo arimo gukora ibyo byose. Itorero ryacu ryarazahaye kandi ryazahajwe n’ubuyobozi bwaryo. Muri make ntibifuza ko itorero rigendana na gahunda za Leta bashingiye ku buhanuzi bw’ibinyoma, ushatse kugaragaza ukuri bakamwikiza…”

Ubuyobozi bwa ADEPR bubivugaho iki?

Twashatse kuvugana n’Ubuyobozi bwa ADEPR, duhamagara Past. Karuranga Ephrem, Umuyobozi akaba n’Umuvugizi wa ADEPR, kuri telefoni ye igendanwa, ku nshuro ya mbere atubwira ko afite abashyitsi, twongeye kumuvugisha atubwira ko ari kumwe na muganga, tumwoherereza n’ubutumwa bugufi ntiyagira icyo adusubiza.

Nyuma yo kumubura twashatse Umuvugizi Wungirije wa ADEPR, Past. Karangwa John, ku nshuro ya mbere twamuhamagaye kuri Telefoni ye igendanwa uwatwitabye yatubwiye ko ari mu nama tuza kongera, twongeye kumuhamagara we ubwe aratwitaba ariko atubwira ko ari kumwe n’abashyitsi twongera kumuhamagara; ubwo twongeraga ku muhamagara ntiyatwitabye kugeza ubwo dutangaza iyi nkuru.

Igihe umwe muri aba bayobozi azashaka kugira icyo atangaza kuri ibi bivugwa na bamwe mu bakirisito bayobora na byo tuzabibagezaho.

Abayoboke ba ADEPR baganiriye n’Ikinyamakuru Panorama bavuga ko bimwe mu bimenyetso bigaragaza ko iyo migambi mibi yatangiye gushyirwa mu bikorwa ari uko mu gihe Biro ya ADEPR  imaze igiyeho kingana n’umwaka urenga, bamaze kwirukana no kumanura mu ntera abantu barenga 50 kandi urutonde rw’abirukanwa rugikomeje, abandi bakimurwa byo kubahima.

Haribazwa kandi niba abari mu buyobozi bwa ADEPR bwakuweho kuba barambuwe inkoni y’ubushumba ndetse bakanahagarikwa (bagatengwa), niba ubwo bagizwe abere n’urukiko bazongera gusubirana umwambaro wabo w’ubushumba dore ko banaciwe ku igaburo.

Basaba ko Leta idakwiye gutererana abantu bakomeje kurengana no gutotezwa, cyane ko ngo abayobozi ba ADEPR babikangisha abakirisito ko babikora bashyigikiwe na zimwe mu nzego za Leta.

Panorama