Minisiteri y’Ubuzima yatangaje ko abana bari hagati y’imyaka 12 na 17, barenga miliyoni 1.3, bamaze guhabwa inkingo za COVID-19. Aba barimo ibihumbi 750 bahawe doze ebyiri z’urukingo, n’abangana na 570 bamaze guhabwa doze imwe.
Umunyamabanga wa Leta muri Minisiteri y’Ubuzima, ushinzwe Ubuvuzi bw’Ibanze, Dr Mpunga Tharcisse, yatangaje ko aba bamaze gukingirwa bagize hafi 70% by’abagomba gufata urukingo bose, bari muri iyi myaka.
Yavuze kandi ko abana batarahabwa urukingo na rumwe, cyangwa abatarafata urwa 2, bazakingirirwa mu mashuri; kugira ngo bitazabangamira amasomo yabo, yagiye asubikwa kenshi kubera iki cyorezo.
Ati “Muri iyi minsi dufite gahunda navuga ko yihariye, yo mu gihe gito mu byumweru bigera nko muri 2, yo kugira ngo abantu bagera kuri miliyoni n’igice batarabona inkingo, na bo tubakingire bitarenze ku itariki 25 Mutarama 2022. Muri aba hazaba harimo abanyeshuri, abacikanwe no gufata urukingo n’abageze mu zabukuru babuze imbaraga zo kugera kuri site zo gukingirwaho; aho bo bazajya bakingirwa basanzwe mu ngo zabo hagamijwe kutagira n’umwe usigara inyuma mu rugamba rwo guhashya COVID-19.”
U Rwanda rufite intego yo kuzagera muri Nyakanga 2022, rwaramaze gukingira hafi miliyoni icyenda z’abaturage. Ni 70% by’abagomba gukingirwa, nk’uko bisabwa n’Ishami ry’Umuryango w’Abibumbye ryita ku Buzima_OMS.
Dr. Mpunga yavuze ko u Rwanda rufite inkingo zihagije zo gukingira abantu kugeza ubu, asaba abatarikingiza kujya gufata urukingo, kuko ari byo bigabanya uburyo ‘Corona virus’ yihinduranya.
Abanyarwanda barenga miliyoni 6.2 bamaze guhabwa doze ebyiri z’urukingo rwa COVID-19, abangana na miliyoni 7.8 bahawe gusa doze ya mbere, na ho abandi 585.982 bafashe urukingo rushimangira.
UMUBYEYI Nadine Evelyne
