Gisagara: Iterambere ry’ubukungu ku isonga ry’ibyo abaturage bifuza ko bafashwamo

Rukundo Eroge

Bamwe mu baturage bo mu karere ka Gisagara bagaragaje ibyifuzo biri mu nkingi eshatu zigenderwaho mu iterambere ry’igihugu ari zo imiyoborere myiza n’ubutabera, ubukungu n’imibereho myiza y’abaturage. Ibyifuzo byose hamwe byatanzwe bigera kuri 469 muri byo 347 bihabwa umurongo ku rwego rw’Akagari n’Umurenge. 111 byiganjemo iby’iterambere ry’ubukungu byagejejwe ku buyobozi bw’akarere.

Ibi byifuzo byagaragajwe mu nama ku rwego rw’Akarere n’abayobozi batandukanye, imboni z’imiyoborere myiza n’abanyamakuru kugira ngo ibyifuzo byatanzwe biganirirwe hamwe bishakirwe ibisubizo, ibindi bizashyirwe mu ngengo y’imari y’akarere y’umwaka cyangwa iy’igihe kirekire.

Karangwa Martin, uhagarariye imboni z’imiyoborere myiza mu karere ka Gisagara, zikusanya ibitekerezo by’abaturage hifashishijwe ikarita nsuzumamikorere, avuga ko ibi byifuzo baba babizaniye abakozi bo ku karere batanga serivisi ngo bihabwe umurongo.

Agira ati “Mu murenge wa Musha bafite icyifuzo cy’uko Leta yakongera nkunganire ku mashini zuhira imyaka, kuko uruhare rw’umuturage rukiri hejuru. Mu murenge wa Kigembe, abaturage bagaragaje ko bashaka imbuto nshya y’imyumbati, imigozi n’urubingo no kubakirwa amasoko mato n’aya kijyambere. Bishobotse byose byashyirwa mu ngengo y’imari kugira ngo byihute gushyirwa mu bikorwa.”

Gakwaya Jean Marie Vianney, Umuyobozi ushinzwe gukurikirana ibikorwa muri FVA (Faith Victory Association) ishyira mu bikorwa umushinga PIMA ku nkunga ya NPA utangirwamo ibi byifuzo, avuga ko iyi gahunda ari ingirakamaro ku baturage, kuko itanga umusaruro ugendeye ku byo abaturage bifuza.

Agira ati “Ku nshuro ya mbere iyi gahunda yatanze umusaruro ku byifuzo bijyanye na serivisi abaturage bahabwa. Ubu turegeranya imibare ngo twerekane ingano y’ibyakemuwe, kandi turizera ko n’ibi bijyanye n’igenamigambi bizashyirwa mu bikorwa turashima ubuyobozi ko ibyambere bitashyizwe mu biro cyitaweho.”

Umuyobozi w’Akarere ka Gisagara, Rutaburingoga Jerome, avuga ko ibitekerezo by’abaturage ari ingirakamaro, bigiye guhuzwa n’ibyo akarere gakusanya hanyuma abaturage abakajya bagezwaho ibyo bakeneye.

Agira ati “Turabashimiye icyifuzo murakivuga ukumva koko kiracyenewe. Tugiye kubigabanya mu mashami, noneho buri shami rirebemo ibyo rishinzwe; nidukora igenamigambi turebemo ibyihutirwa kurusha ibindi. Turabikurikirana ariko byose bifite ubishinzwe, tuzatangariza abaturage ibimaze gukorwa mbere y’uko tujya kubabaza ibindi. Iyo ukoze ibyo abaturage bifuza no kubirinda biba byoroshye.”

Iyi gahunda irakorwa ku nshuro ya kabiri, abaturage bavuga ko ari ingirakamaro kuri bo mu kugira uruhare mu bibakorerwa, by’umwihariko ingengo y’imari y’igihugu ndetse no mu gukemurirwa ibibazo bibugarije.