Ibiro bikuru bya ADEPR biracumbamo umwotsi w’amakimbirane

Nyuma y’iminsi itageze kuri mirongo itatu (30) Umuvugizi wungirje wa ADEPR, Rev. Karangwa John, agizwe umwere ku byaha yaregwaga byatumye amara muri gereza ya Nyarugenge amezi agera ku munani, mu minsi mike arekuwe yahise asubira mu nshingano, ariko umwotsi w’amakimbirane watangiye gucumba hagati ye n’Umuvugizi wa ADEPR, Rev. Karuranga Ephrem.

Aya makimbirane atangiye kugaragara mu gihe gito, Rev Karangwa asubiye mu nshingano, yatangiye kugaragarira mu nzandiko zisubirikanya hagati y’aba bayobozi bombi.

Mu nyandiko Ikinyamakuru Panorama gifitiye kopi, ku wa 23 Nyakanga 2020, Umuvugizi wa ADEPR yandikiye Umuvugizi wa ADEPR wungirije, amugira inama yo kwandika urwandiko rumenyesha itorero aho yari aherereye, rukomekwaho ibyemezo by’urukiko bigaragaza ko yabaye umwere.

Ibyo bikaba byaravuye mu myanzuro y’inama ya Biro Nyobozi ya ADEPR yateranye ku wa 22 Nyakanga 2020, bikazafasha inzego z’itorero kumenya no kugena ibikurikije amabwiriza itorero rigenderaho n’imicungire y’abakozi.

Rev. Karangwa ntiyihanganiye ibaruwa imugira inama yo kwandika asobanura aho yari aharereye, kuko ku wa 24 Nyakanga 2020 yandikiye Umuvugizi wa ADEPR, mu ibaruwa dufitiye kopi, amukurira inzira ku murima ko iyo nama itigeze ibaho kandi atigeze anayitabira, kuko kuri iyo tariki Umuvugizi wa ADEPR ngo yari yohereje Rev Karangwa mu nama n’abakozi bo muri Banki ya Kigali (BK), akavuga ko niba yaranabaye atigeze ayitumirwamo nk’Umuvugizi wungirije.

Avuga ko kugira ngo asubize ibikubiye mu ibaruwa yandikiwe ari uko yabanza guhabwa imyanzuro y’inama ya Biro Nyobozi y’Itorero yo ku wa 22 Nyakanga 2020.

Iyi nkundura y’umwuka utari mwiza muri ADEPR uzagarukira he mu gihe hagikomeje urubanza rwa ADEPR n’abahoze ari abayobozi bakuru b’itorero na bamwe mu bakozi baryo mu rubanza ADEPR yaruririye ubwo yari imaze gutsindwa abaregwa bakagirwa abere, ahubwo Ubuyobozi bw’Itorero bukihutira kubakura mu nshingano no kubambura ubushumba; ahubwo imanza zigakomeza.

Ubwanditsi